Wa kabidi wa Samuele
19 Babakalunguile Yoabe’shi: “Nfumu kuete kudila na e mu maalo bua Absalome.” 2 Biabia kutshimuna* kua diadia efuku kubalulukile bu maalo bua muilo oso ushima, muanda babapushishe’shi nfumu mmuinyongole ngofu bua muana aaye. 3 Bantu babalukile mu kibundi diadia efuku mbaumine nka bu bantu be na bufu muanda babasuku mu ngoshi. 4 Nfumu baadi muibuikile kilamba kumpala na baadi mutungunukie na kudila n’eyi di bukopo’shi: “Muana ande Absalome! Absalome muana ande, muana ande baboo!”
5 Akupu, Yoabe batuelele kui nfumu, amulungula’shi: “Lelo uno bokuatshisha bafubi bobe boso bufu, abo babapaasha muwa oobe na miuwa ya bana bobe balume, ya bana bobe bakashi, ya bakashi bobe na ya makupi oobe. 6 We mufule baba bakushikue, na we mushikue baba bakufule, lelo uno bolesha patoka’shi bakata ba kiluilo kiobe na bafubi bobe tabe na muulo kodi, muanda nanshinkamisha’shi su Absalome badia kuikala na muwa lelo uno na atue boso tuafua, bibaadia kuikala buwa ku meso kobe. 7 Binobino ebue, otuukie paasha na onyingishe bafubi bobe, muanda netshipi muishina dia Yehowa’shi su tue mutuukie paasha, takui muntu su ngumune ashala nobe buno bufuku. Bino abikala bubi kukila mianda yoso ibubi yodi mufumankane nayo kubanga ku bukinga bobe mpa na lelo uno.” 8 Biabia nfumu bebuele na aye nkushala ku kiibi kia kibundi, na babalunguile bantu boso’shi: “Binobino nfumu mmushale ku kiibi kia kibundi.” Akupu, bantu boso babafikile kumpala kua nfumu.
Kadi bena Isalele babapuile kusuuka, muntu oso enda ku nshibo kuaye. 9 Bantu boso ba mu bisamba bioso bia Isalele babaadi abekakena, abamba’shi: “Nfumu baadi muitupaashe kui beshikuanyi betu, na baadi muitupaashe kui bena Filistine; kadi binobino basuuku kibundi pa muanda wa Absalome. 10 Na winyi Absalome atuikalanga bele muimu bua’shi etukunkushe ngiawa bapu kufua mu ngoshi. Biabia buakinyi tanukitshi kintu su nkimune bua kualusha nfumu mu kibundi?”
11 Nfumu Davide batumine mukandu kui tshite muakuidi Zadoke na Abiatare, ebalungula’shi: “Esambeyi na bakulu ba Yunda nuibalungule’shi: ‘Buakinyi anukiebe kuikala bantu ba nfudiilo bua kualusha nfumu muibalasa diaye, aku namu nfumu mmupushe mukandu wa bena Isalele boso kuno kuaye ku nshibo? 12 Nui bakuetu na nui mase* ande. Biabia buakinyi anukiebe kuikala bantu ba nfudiilo bua kualusha nfumu?’ 13 Na nulungule Amasa’shi: ‘Obe tue mase ande* su? Biabia Efile Mukulu annyokie ngofu, su kubanga binobino toyikala mukata a kiluilo kiande kia ngoshi pa mbalo ya Yoabe.”’
14 Biabia bakumine mashimba a bantu boso ba mu Yunda, abo nkufika nka bu muntu umune. Babatumine eyi kui nfumu bua kumulungula’shi: “Alukila obe na bafubi bobe boso.”
15 Nfumu babangile luendo bua kualukila, aye nkufika ku Yordane, bantu ba mu Yunda babafikile ku Gilegale bua kufumankana na nfumu na kumusabusha muela wa Yordane. 16 Paapa Shimeyi muana a Gera, muina Benyamine a ku Bakurime bafikile lubilo na bantu ba mu Yunda bua kufumankana na nfumu Davide. 17 Baadi na bantu 1 000 ba ku Benyamine. Mpa na Ziba mufubi a mu nshibo ya Saule bafikile bukidibukidi ku Yordane na bana baye 15 na bafubi baye 20 bua kukuukila nfumu. 18 Basabukile* abua bushiya bua kukuasha ba mu nshibo ya nfumu bua’shi basabukie, na kukita kioso akikumiina nfumu. Kadi Shimeyi muana a Gera beyelele pashi kumpala kua nfumu, pabaadi nfumu takiebe kusabuka Yordane. 19 Balunguile nfumu’shi: “Muanana nfumuami tantopekanga, na tatentekieshanga kilubilo kibaakitshine mufubi aaye muifuku dibaadi muanana nfumuami akatuka ku Yelusalema. Nfumuami tatulanga namu uno muanda kuishimba, 20 muanda mufubi oobe auku’shi naadi mukite muluisho, nyi buakinyi lelo uno ne muntu a kumpala ku bantu boso ba mu nshibo ya Yosefe bafiki mu kufumankana na muanana nfumuami.”
21 Musango umune, Abishai muana a Seruya nkuakula’shi: “Abitungu Shimeyi ayipayibue, muanda mmuele muedibue muimu a Yehowa milua.” 22 Kadi Davide nkuakula’shi: “A uno muanda nguinutale ku kinyi anue bana ba Seruya, buakinyi anukiebe kukita bianshakumiina? Lelo uno mbalombene kuipaa muntu mu Isalele su? Tanuku’shi lelo ne nfumu mu Isalele mushima?” 23 Paapa nfumu nkulungula Shimeyi’shi: “Tofu nya.” Akupu nfumu nkuitshipa kuadi.
24 Mefiboshete muikulu a Saule bafikile namu mu kutundayisha nfumu. Kubanga muifuku dibayile nfumu mpa na pabalukiile mu butaale, tabaadi muitumpe mema ku ngua yaye, tabaadi mutshibe miefu sunga kutumpa bilamba biaye. 25 Kadi pabafikile* ku Yelusalema mu kuimonena na nfumu, nfumu bamuipuishe’shi: “Mefiboshete buakinyi tuemuende nami?” 26 Paapa bamualuluile’shi: “Muanana nfumuami, mufubi ande ekeele mundimbe. Muanda ami mufubi oobe nambile’shi: ‘Bu biandi mulemane, banganyine kishalelo pa mpunda bua’shi nkamine nyende na nfumu.’ 27 Kadi mmundimbiile mianda kui muanana nfumuami. Sunga mbiabia, obe muanana nfumuami we’nka bu muikeyilu a Efile Mukulu a binyibinyi, kita kiakia kioso kiomono’shi ki buwa ku meso kobe. 28 Obe muanana nfumuami bodia kuikala muipee bantu boso ba mu nshibo ya nshami, kadi we muntule ami mufubi oobe pamune na baba abadiyaa ku mesa oobe. Biabia buakinyi nekuidila’nyi kui nfumu?”
29 Anka nfumu nkumulungula’shi: “Buakinyi okiotungunuka na kuakula biabia? Ne muate kitshibilo kia’shi obe na Ziba nuiabishene mafuba.” 30 Paapa Mefiboshete nkulungula nfumu’shi: “Mutadiile aate mafuba oso, bu bikale’shi muanana nfumuami balukila binobino ku nshibo kuaye mu butaale.”
31 Akupu, Barzilayi muina Gileade bakatukile ku Rogelime, aye nkuenda ku Yordane bua kusabusha nfumu muela wa Yordane. 32 Barzilayi baadi mupue kununupa bikile, baadi na bipua 80 na baadi apa nfumu bia kudia pabaadi mushale ku Mahanaime, muanda baadi na bupeta bui bungi. 33 Paapa nfumu nkulungula Barzilayi’shi: “Sabuka wende nami, na nekala nankupa bia kudia mu Yelusalema.” 34 Kadi Barzilayi nkulungula nfumu’shi: “Kubanshadila dingi mafuku* bungi kinyi buandia kuikala na muwa, bua’shi nyende na nfumu ku Yelusalema? 35 Lelo uno tandi na bipua 80. Ne mulombene dingi kushingula bibuwa na bibubi su? Mufubi oobe mmulombene dingi kupusha muenyi wa kiadi na kiatomo? Nki mulombene dingi kushingula eyi dia tuyimba tulume na tukashi? Buakinyi mufubi oobe mmulombene kuikala bu bushito kui muanana nfumuami? 36 Mbilombane penda’shi mufubi oobe afikie mu kuleka nfumu ku Yordane. Buakinyi abitungu’shi nfumu ampe dino efuto di biabia? 37 Ntadiile namu ami mufubi oobe ngalukile, bua’shi nkafuile mu kibundi kietu pepi na mashama a nshami na a nyinami. Kadi mufubi oobe Kimame biadi’bi. Mutadiile asabukie na muanana nfumuami, na we kumukitshina bioso abimueneka buwa ku meso kobe.”
38 Paapa nfumu nkumulungula’shi: “Bi buwa, Kimame asabuka nami na nakamukitshina bioso biomono’shi bi buwa ku meso kobe; kioso kiontekie nankukitshina kianka.” 39 Bantu boso bababangile kusabuka Yordane, kumpala kua nfumu kusabuka, bakuatshile Barzilayi kiipa na aye nkumuelela miabi; akupu Barzilayi nkualukila kuaye. 40 Nsaa ibaadi nfumu musabukie bua kuenda ku Gilegale, Kimame basabukile naye. Bantu boso ba mu Yunda na kia pankatshi kia bantu ba mu Isalele babafikile mu kusabusha nfumu.
41 Akupu, bangi balume boso ba mu Isalele babaadi befubuile kui nfumu, abo nkumuipusha’shi: “Buakinyi bakuetu bena Yunda mbakuyibe na bantu boso ba mu nshibo yobe na benusabusha Yordane pamune na bafubi bobe boso?” 42 Bantu boso ba mu Yunda nkualula bantu ba mu Isalele’shi: “Muanda nfumu mmukuetu a mu kifuko. Buakinyi anuitukuatshila nsungu? Tatui badie kintu kia nfumu su nkimune, na nfumu ta mmuitupe kia buntu.”
43 Akupu, bantu ba mu Isalele babaluluile bantu ba mu Yunda’shi: “Atue tui bisamba ekumi, biabia tui na matalua ebungi kui Davide kuinukila. Kadi buakinyi nuibetubepuule? Tubadia kuikala ba kumpala ba kufika mu kuata nfumu eetu bua kumualusha.” Anka bena Yunda babaadi bakambile bena Isalele mu kuakua kuikakena.