Wa kabidi wa Samuele
22 Na Davide baadi muyimbile Yehowa uno musambo, muifuku dibaadi Yehowa mumupaashe ku maasa kua beshikuanyi baye boso, na kuiyasa dia Saule. 2 Bambile’shi:
“Yehowa ndubuebue luande na kifuamino kiande, aye nyi ampaasha.
3 Efile Mukulu ande nyi ebue diande, muanfuamina,
Nyi ngabo yande, na lusengua* lua kipandilo* kiande, mbalo yande ya kufuamina
Na mbalo yande ya kusuukila, mupaashi ande. Nnobe bampaasha kui ba ntomboshi.
4 Nayitanyina Yehowa, aye mukumbene ntumbo
Na nakapaashibua kui beshikuanyi bande.
5 Mbundambunda ya lufu ayikupilanga ku mpese yande yoso;
Mieshi ya mema ya bantu ba bisumanga, ayintshinyishanga.
6 Mioshi ya mashama* ayikalanga ingifuunyishe;
Miteo ya lufu, ikeele kumpala kuande.
7 Pangikalanga mu dikienga, naadi muitanyine Yehowa,
Naadi mutungunukie na kuitanyina Efile Mukulu ande.
Biabia, kukatukila ku ntempelo aye, bapushile eyi diande,
Na kudila kuande kua kukimba bukuashi, kubafikile ku matui aaye.
8 Nsenga ibabangile kutshinkatshinka na kusuusa,
Bitako bia eyilu nkusuusa
Na abio nkutshinka, muanda babaadi bamukuatshishe nsungu ibukopo.
9 Muishi ubakaamine, autukila mu mpembe yaye,
Kaalo ke bukopo kabatukile mukanua muaye,
Na makala aatembe ngofu, abatukile kuadi.
10 Pabayikile, baadi mutonte eyilu,
Na mufito wibukopo ubaadi muushi mua ngua yaye.
11 Bakaamine pa mukeluba, na aye nkufika afu’apapamanga.
Pabafikile baadi amueneka pa mbaba ya kipangua kia mu kikudi.*
12 Akupu, baadi muishikiile mufito ku mpese yaye yoso nka bu mbalo ya kufuamina,
Na mema afiita na makumbi afiita.
13 Makala a kaalo akatembe bi bukopo, abaadi aatukila ku etaata dibaadi ku mpala kuaye.
14 Yehowa babangile kukungula muiyilu nka bu kapandapanda.
Sha Kuiyilu Kula bakitshine bia’shi eyi diaye dipushikie.
15 Baashile mikietue yaye, aye nkuibapalakasha.
Baadi mueleshe mipenyo, aye nkuibatuesha mu kafuutakanyi
16 Muushi mua kalunga mubamuenekiele.
Bitako bia nsenga bibaadi bitushibue patoka, pa muanda wa nsungu ya Yehowa,
Kui muwa autuku mu mpembe yaye.
17 Kukatukila muiyilu baadi moole mboko yaye.
Bankuatshile, aye nkuntusha mu mema e bula.
18 Bampaashile kui muishikuanyi ande mukata,
Na kui baba banshikue babaadi na bukome kunkila.
19 Babantukile ngoshi mu efuku diangikalanga mu malua,
Anka Yehowa baadi mukuashi ande.
20 Bantuadile mu mbalo ishii masaku.*
Bampaashile, muanda baadi munfule.
21 Yehowa anfutu muyile kululama kuande.
Anfutu muanda ntshi musoole muanda.
22 Ne mulame mashinda a Yehowa,
Na ntshi mukite muluisho wa kusumbushena Efile Mukulu ande.
23 Bitshibilo biaye bioso bi kumpala kuande,
Ntshi mupambukie mu miiya yaye.
24 Nashala kushii matope kumpala kuaye,
Na nakelama bua kupela kukita kilubilo.
25 Yehowa anfute muyile kululama kuande,
Muyile kukutua kuande kua kusoola muanda kumpala kuaye.
26 Kui muntu e na lulamato, okitshi mianda na lulamato,
Kui muntu shi na matope, okitshi mianda kushi matope.
27 Kui yawa oso akitshi mianda ibuwa, obe omukitshinaa nka mianda ibuwa,
Anka kui yawa akitaa mianda ituelakane, weleshaa mudimukie.*
28 Muanda opaasha bantu beyishe,
Anka meso oobe taakuminaa kumona ba sha kuitatula, na we bayisha milongo.
29 Muanda obe Yehowa we kimunyi kiande,
Yehowa nyi amunyikaa mifito yande.
30 Ku bukuashi bobe, ne kuilondena na kisaka kia bantomboshi,
Ku bukome bua Efile Mukulu, ne mulombene kuitumba kimano.
31 Eshinda dia Efile Mukulu a binyibinyi ndipuidikie;
Eyi dia Yehowa nditoshibue kalolo.
Aye nyi ngabo kui baba boso abakimbi kifuamino muadi.
32 Muanda nnanyi muikale Efile Mukulu, kukatusha Yehowa?
Na nnanyi muikale ebue, kukatusha nka penda Efile Mukulu eetu?
33 Efile Mukulu a binyibinyi nkifuamino kiande kinyingishibue,
Na akalulamisha eshinda diande.
34 Ayikasha mikoolo yande bu ya ntengu,
Angimika mu ma mbalo e kuiyilu.
35 Alongiesha maasa ande bia kulua ngoshi,
Maboko ande ngalombene kunana buta bua kiamo kia munyinga.
36 Ompa ngabo obe a kipandilo,
Na kuiyisha kobe, akungikasha muntu mukata.
37 Otamishila ngua yande eshinda,
Mikoolo yande tayiselemukaa nya.
38 Nebingena na beshikuanyi nami na nebabutula,
Ntankalukiila mpa na panebashimisha.
39 Nebashimisha na kuibafigakasha, bua’shi tabebuanga dingi,
Abakapono kuushi kua ngua yande.
40 Okampa bukome bua kulua ngoshi,
Okaponesha beshikuanyi bande kumpala kuande.
41 Okasuukisha beshikuanyi bande kumpala kuande,*
Nakayipaa baba banshikue.
42 Abedidi bukuashi, kadi takui muntu a kuibapaasha,
Abeele misaase kui Yehowa, kadi tebalula nya.
43 Nebatu bua’shi bashale nka bu lufuufi lua pa nsenga,
Nakebafingakasha, nebafunte nka bu matekie a mu bilayi.
44 Okampaasha ku bilema biabangamba kui bantu ba mu muilo wande.
Okankaluila bua’shi nekale kunundu kua bisamba,
Muilo wanshanguku aukanfubila.
45 Benyi abakafiki mu kuinama kumpala kuande bua’shi banfubile,
Abakankokiela penda bua biabakapusha pa muanda wande.
46 Benyi abakabofula ku mashimba,
Abakatuku mu bifuamino biabo, bakuete kusuusa.
47 Yehowa e na muwa! Ebue diande ditumbishibue!
Efile Mukulu, aye muikale ebue dia kipandilo kiande atumbishibue.
48 Efile Mukulu a binyibinyi angobuela,
Atuulu miilo ku bukunkushi buande.
49 Ampaasha kui beshikuanyi bande.
Onkaamisha kunundu kua baba abanduisha,
Ompaasha kui muntu sha etombo.
50 Ô Yehowa! Nyi buakinyi nakakutumbula munkatshi mua miilo,
Na nakayimbi bua kutumbisha eshina diobe:
51 Akitshi mianda ikata ya kukaanya, bua kupaasha nfumu aaye,
Alesha kifulo kia lulamato kui muedibue muimu aaye,
Kui Davide, na kui bekulu baye bua loso.”