Mukanda wa kumpala wa Kuilondena kua Mianda

11 Kunyima, bena Isalele boso babafikile kui Davide ku Ebrone bamulungula’shi: “Talanga! Ouku kalolo’shi tui mase* amune. 2 Mu mafuku ashale pabaadi Saule bu nfumu, obe nyi baadi akunkusha Isalele mu ngoshi. Na Yehowa Efile Mukulu oobe bakulunguile’shi: ‘Okalama muilo wande wa Isalele, na okafiki nfumu a muilo wande wa Isalele.’” 3 Biabia bakulu boso ba Isalele, babafikile kui nfumu mu Ebrone, na Davide nkukita nabo kilombeno mu Ebrone kumpala kua Yehowa. Akupu abo nkuela Davide muimu bu nfumu a Isalele, muyile eyi dia Yehowa dibaadi muakule ku bukuashi bua Samuele.

4 Kunyima, Davide na bena Isalele boso babayile mu Yelusalema, kuamba’shi Yebuse, nsenga ibaadi bena Yebuse bashale aa mafuku. 5 Bena Yebuse babasepele Davide bamba’shi: “Tue mulombene kutuela muno!” Anka Davide banyengiele kifuamino kia mu Siyona, kiabetamina binobino bu Kibundi kia Davide. 6 Biabia Davide nkuakula’shi: “Muntu a kumpala akayipaa bena Yebuse, afiki bu mukata a kiluilo kia ngoshi.” Paapa Yoabe muana a Seruya bayile bu muntu a kumpala, na aye nkufika bu mukata a kiluilo kia ngoshi. 7 Biabia Davide bashalele mu kiakia kifuamino. Nyi buakinyi babekitanyine bu Kibundi kia Davide. 8 Babangile kuibaka ku mpese yoso ya kibundi, kukatukila ku muengie* mpa na ku mpese yao yoso. Na Yoabe babangile kulumbuula kibundi kioso. 9 Biabia Davide baadi nka anyisha kupeta bukome, na Yehowa a biluilo baadi naye.

10 Bano nyi ba nfumu ba bilobo bia ngoshi bia Davide, babaadi bakuatshishene ngofu bufumu buaye pamune na Isalele oso, bua kumuikasha nfumu muyile eyi dia Yehowa pabitale Isalele. 11 Ano nyi mashina a bilobo bia ngoshi bia Davide: Yashobeame muana a muina Akemoni baadi kunundu kua bilobo bia ngoshi bisatu. Ungi musango bayipayile bantu 300 na mulumbu waye. 12 Babaadi bamulondele kui Eleazare muana a Dodo, muina Ahone. Eleazare baadi munkatshi mua bilobo bia ngoshi bisatu. 13 Baadi na Davide ku Pase-damime, pabaadi bena Filistine bebungie bua kulua ngoshi na bena Isalele. Binyi biabia, yaaya mbalo ibaadi efuba diule na ntete ya orje, na bantu babasuukile bena Filistine. 14 Kadi aye bayimene munkatshi mu’efuba aye nkuidikaluila, na nkutungunuka na kuipaa bena Filistine, biabia Yehowa bafuishishe kutshimuna* kukata.

15 Bantu basatu ba ku bakata 30 babayile ku ebue kubaadi Davide, mu lubuebue lua Adulame, pabaadi bena Filistine mbatuule kishalelo kiabo Muibanda dia bena Refa. 16 Mu aa mafuku Davide baadi mu kifuamino, na kisaka kia basalayi kia bena Filistine kibaadi mu Beteleme. 17 Paapa Davide nkulesha lukalo luaye amba’shi: “Su nadia kutoma mema emu buina bua kulamina mema bui pepi na kiibi kia Beteleme baboo!” 18 Paapa biabia bilobo bisatu bia ngoshi nkutuela mu kishalelo kia bena Filistine pa bukopo, na nkutapa mema mu buina bua kulamina mema bubaadi ku kibelo kia Beteleme, abo nkuiatuadila Davide, kadi Davide bapelele kuiatoma aye kuiapongoola mu nsenga kumpala kua Yehowa. 19 Bambile’shi: “Muyile mmueneno a Efile Mukulu ande, ntshi mulombene kukita su nkapeela muanda wi bino! Ne kutoma mase a bano bantu batuule muwa wabo mu masaku su? Muanda bekele batuule miuwa yabo mu masaku bua kukeantuadila.” Paapa bapelele kutoma aa mema. Ino nyi mianda ibaadi bilobo biaye bisatu bia ngoshi bikite.

20 Abishai mukuabo na Yoabe bafikile mukata a kingi kisaka kia bilobo bisatu, dingi efuku bayipayile bantu 300 na mulumbu waye, na baadi na nkumo nka bu ya biabia bilobo bisatu. 21 Ku biabia bilobo bisatu, aye nyi baadi mukile kuukibua na baadi mukata aabo; anka tabaadi mufikie mu mulongo wa biabia bilobo bisatu bia kumpala.

22 Benaya muana a Yehoyada baadi muntu sh’eshimba dinyingie bakitshine mianda ikata ibungi ku Kabeseele, bayipayile bana babidi ba Ariyele muina Moabe. Bayikile’nyi mu buina bua mema ayipaa ntambue efuku dibaadi adinoko neje. 23 Nnaye dingi baadi muipee ungi muana mulume muina Ejipitu baadi bula bua kukaanya, kuamba’shi kude* itano. Sunga mbibaadi yawa muina Ejipitu na mulumbu muiyasa wi nka bu mutshi w’abanyaa buanda ku kiamo kia kuluka nakio bilamba, aye bayile mu kulua naye na mukombo, amunyenga mulumbu muiyasa, aye nkumuipaa nka na wawa mulumbu waye. 24 Ino nyi mianda ibaadi Benaya muana a Yehoyada mukite, na baadi na nkumo nka bu ya biabia bilobo bisatu bia ngoshi. 25 Sunga mbibaadi muukibue ngofu kukila mpa na biabia bilobo 30, tabaadi mufikie mu mulongo wa biabia bilobo bia ngoshi bisatu. Anka Davide bamutuudile kunundu kua bantu babaadi abamulama.

26 Bino nyi bilobo bia ngoshi bia mu kiluilo kia basalayi: Asahele mukuabo na Yoabe, Elanane muana a Dodo a ku Beteleme. 27 Shamote muina Arore, Elese muina Pelone, 28 Ira muana a Ikeshe muina Tekoa, Abiezere muina Anatote. 29 Sibekayi muina Usha, Ilai muina Ahohi, 30 Marayi muina Netofa, Elede muana a Baana muina Netofa, 31 Itai muana a Ribayi a ku Gibeya a Benyamine, Benaya muina Piratone, 32 Urayi a ku bibandabanda* bia Gashe, Abiele muina Arba, 33 Azemawete a ku Bakurime, Eliaba muina Shalabone, 34 bana ba Asheme muina Gizoni, Yonatane muana a Shagee muina Arare, 35 Akiame muana a Sakare muina Arare, Elifale muana a Ure, 36 Kefere muina Mekerate, Akiya muina Pelone, 37 Eselo muina Karmele, Naarayi muana a Ezebayi, 38 Yowele mukuabo na Natane, Mibare muana a Ageri, 39 Zeleke muina Amone, Nakrayi muana a Berote, yawa baadi atuadila Yoabe muana a Seruya bina ngoshi; 40 Ira muina Yitre, Garebe muina Yitre, 41 Uriya muina Ite, Zabade muana a Alai, 42 Adina muana a Shiza muina Rubene, nfumu a bena Rubene, na bantu 30 babaadi naye; 43 Anana muana a Maaka, Yoshafate muina Mitene, 44 Uziya muina Ashetarote, Shama na Yeyele bana ba Otame muina Arowe; 45 Yediaele muana a Shimiri, na Yoka mukuabo mulume na Tise; 46 Eliyele muina Mahawi, Yeribayi na Yoshawiya bana ba Elename, na Itema muina Moabe; 47 Eliyele, Obede na Yaasiyele muina Mesoba.