Mukanda wa kumpala wa Kuilondena kua Mianda
13 Biabia Davide besambile na ba nfumu ba bantu kinunu na ba bantu lukama, na bakunkushi boso. 2 Akupu Davide nkulungula kakongie koso ka Isalele’shi: “Su abimueneka’shi bi buwa ku meso kuenu, na su mbikuminyibue kui Yehowa Efile Mukulu eetu, tutumeyi eyi kui bakuetu bashale mu bipindi bioso bia nsenga ya Isalele, mpa na kui ba tshite muakuidi, na bena Levi be mu bibundi biabo bi na mapia a kudishila nyema, bafikie bebungie netu, 3 bua’shi tukaate Mushete wa Efile Mukulu eetu ufikie pano.” Muanda tababaadi beupasukile mu mafuku a Saule. 4 Kakongie koso kashima kabaadi kakumiine bua kukita biabia, muanda muilo oso ushima ubamuene’shi bi buwa. 5 Paapa Davide nkuitanyisha Isalele oso mushima, kukatukila ku muela wa Ejipitu mpa na ku Amate, bua kukaata mushete wa Efile Mukulu a binyibinyi ku Kiriate-yearime.
6 Davide na bena Isalele boso babayile ku Baala ku Kiriate-yearime, mu nsenga ya Yunda, bua kukaata Mushete wa Yehowa Efile Mukulu a binyibinyi, aye mushale mu nkuasa a bufumu kunundu* kua bakeluba kuabetanyiinaa eshina diaye. 7 Anka babatudile Mushete wa Efile Mukulu a binyibinyi ku etempu dipia, abo nkuiukatusha mu nshibo ya Abinadabe. Uza na Akiyo nyi babaadi abakunkusha diadia etempu. 8 Davide na Isalele oso mushima babaadi abasanka kumpala kua Efile Mukulu a binyibinyi na bukome buabo boso, bayimbanga misambo na luseese, matumba, sembale, mpungi na bingi biombuanga bia mioshi. 9 Kadi pabaabafikile pa mbalo ya kukupiila ntete ya Kidone, ngombe ibakiebele kuponesha Mushete, biabia Uza nkoola eyasa diaye nkuiukuata. 10 Paapa nsungu ya Yehowa nkutembela Uza, na Aye nkumuipaa, muanda baadi moole eyasa diaye akuata Mushete, aye nkufuila nka paapa kumpala kua Efile Mukulu. 11 Kadi Davide bakuatshile nsungu, muanda nsungu ya Yehowa ibukopo ibaadi itembele Uza. Abayitanyinaa yaaya mbalo bu Pereze-uza mpa na lelo.
12 Diadia efuku, Davide batshinyine Efile Mukulu a binyibinyi ngofu, aye nkuamba’shi: “A ne kuenda na Mushete wa Efile Mukulu a binyibinyi ku mbalo yandi mushale naminyi?” 13 Davide tabaadi muende na Mushete ku Kibundi kia Davide kubaadi mushale. Kadi baadi mukeutudishe mu nshibo mua Obede-edome muina Gate. 14 Mushete wa Efile Mukulu a binyibinyi ubashalele mu nshibo ya Obede-edome munda mua mieshi isatu, na Yehowa baadi nka elela Obede-edome na ba mu nshibo yaye na bintu bioso bibaadi nabio miabi.