Mukanda wa kumpala wa Kuilondena kua Mianda
28 Akupu, Davide babungile bakunkushi boso ba Isalele mu Yelusalema: Bakunkushi ba bisamba, ba nfumu ba bisaka bibaadi abifubila nfumu, ba nfumu ba bantu kinunu, ba nfumu ba bantu lukama, ba nfumu ba bintu bioso na bimunuanga bia nfumu na bia bana baye, pamune na bantu ba muibalasa dia nfumu, na bilobo bioso bia ngoshi na bantu ba kukulupila. 2 Paapa nfumu Davide nkuibua na aye nkuakula’shi:
“Nteemesheyi bakuetu, n’anue muilo wande, naadi na lukalo lukata lua kuibaka nshibo ayikala bu mbalo ya kutuula mushete wa kilombeno wa Yehowa, na bu kitudilo kia ngua ya Efile Mukulu eetu, na ne mulumbuule bintu bua luibako. 3 Kadi Efile Mukulu a binyibinyi bandunguile’shi: ‘Nta nnobe ayibaka nshibo bua eshina diande, muanda we muntu aluanga ngoshi na we musumbule mase.’ 4 Aku namu Yehowa Efile Mukulu a Isalele mmunsangule mu nshibo ya nshami buandia kufika nfumu a Isalele bua loso, muanda Yunda nyi aadi musangule bu mukunkushi, na mu kisamba kia Yunda, mmusangule nshibo ya nshami, na ku bana ba nshami, ami nyi aadi mukumiine bua kutuula bu nfumu a Isalele mushima. 5 Bu bikale’shi Yehowa mmumpe bana bebungi, ku bana bande boso, mmunsangule Salomone buadia kushala mu nkuasa a bufumu a Yehowa bua kukunkusha Isalele.
6 “Muanda bandunguile’shi: ‘Muana oobe Salomone nyi akayibaka nshibo yande na mpango yande, muanda ne mumusangule buadia kuikala bu muana ande, na nakafiki bu nshaye. 7 Su atumikila kalolo miiya yande na bitshibilo biande, bu biakuete kuibikita lelo uno, nakanyingisha bufumu buaye bua loso.’ 8 Biabia nakula kumpala kua bena Isalele boso, kakongie ka Yehowa, na kumpala kua Efile Mukulu eetu etupusha’shi: Kimbayi miiya yoso ya Yehowa Efile Mukulu eenu na kuiyitumikila, bua’shi nushale mu nsenga ibuwa, na nuiyilekiele bana benu bu bupianyi bua loso.
9 Obe muana ande Salomone, kimba bia kuuka Efile Mukulu a nshobe, na omufubile na eshimba dimune na anyima oobe oso, muanda Yehowa ataluulaa bi mu mashimba oso, na kushinguula mpango na binangu bia muntu. Su omukimba, akakitshi bia’shi omupete, kadi su omusumbushena, aye namu akakusumbushena bua loso. 10 Binobino ela binangu kalolo, muanda Yehowa mmukusangule bua kuibaka nshibo ayikala mbalo ya kishila. Biabia kankamana na obangie mudimo.”
11 Akupu Davide bapeele muana aaye Salomone, kifuatulo kia abikala kadimbo ka pa ntuelelo, abikala tungi tudimbo, tudimbo tua kulamina bintu, tudimbo tua muiyilu, tudimbo tua munda, na mu kadimbo mubaadi mputo bua kubuikila miluisho. 12 Bamupeele kifuatulo ki na bintu bioso bibaabadi bamuleeshe ku bukuashi bua kikudi kiselele bua lupango lua nshibo ya Yehowa, bua tudimbo toso tua kudiila tubaadi tuiyifunyishe, bua tudimbo tua bupeta bua mu nshibo ya Efile Mukulu a binyibinyi, na bua tudimbo tua bintu bibaabadi bekashe bia kishila. 13 Bamupeele dingi mayi a kulonda pabitale bisaka bia ba tshite muakuidi na bena Levi, pabitale midimo yoso ya mu nshibo ya Yehowa na pabitale bintu bioso bia kufubisha mu nshibo ya Yehowa. 14 Baadi mutshibe dingi bushito bua ôlo, ôlo bua bina mudimo bioso bia kufubisha mu midimo ilekenelekene, aye nkutshiba dingi bushito bua bina mudimo bioso bia kiamo kia arja, na bua bingi bina mudimo bioso bua midimo ilekenelekene. 15 Baadi dingi mutshibe bushito bua bitudilo bia bimunyi bia ôlo na bimunyi biabio bia ôlo, bushito bua bitudilo bia bimunyi bilekenelekene na bimunyi biabio, na bushito bua bitudilo bia bimunyi bia kiamo kia arja, bua kitudilo kia bimunyi kioso na bimunyi biakio muyile mufubo wabio. 16 Baadi dingi mutshibe bushito bua ôlo bubaadi abutungu kufubisha, bua mesa a kutudila mikate* ya kutuula mu milongo, bua mesa oso, na bamupeele dingi bushito bua kiamo kia arja bua mesa a kiamo kia arja, 17 baadi mutshibe dingi bushito bua ôlo bubaadi abutungu bua nsomo, bibakudi, mbidika ya ôlo, bushito bua tu bibakudi tupeela tua ôlo, bua ka kibakudi koso kapeela, na bushito bua tu bibakudi tupeela tua kiamo kia arja bua ka kibakudi koso kapeela. 18 Batshibile dingi bushito bua ôlo mulumbuulue kalolo bua kilambuilo kia kabanda na bua kifuatulo kia etempu, kuamba’shi bakeluba ba ôlo babuule mbaba yabo, bapuuta mushete wa kilombeno wa Yehowa. 19 Davide bakuile’shi: “Mboko ya Yehowa ikeele nami, na mmumpe binangu bua kufunda kantu pa kantu, mianda yoso itale kifuatulo kia abikala nshibo.”
20 Akupu Davide balunguile muana aaye Salomone’shi: “Nyinga eshimba, okankamane na obangie mudimo. Totshinanga na tosuusanga, muanda Yehowa Efile Mukulu, Efile Mukulu ande e nobe. Takakusumbushena sunga kukulekiela, anka akekala nobe mpa’nka na apakapuila mudimo oso wa nshibo ya Yehowa. 21 Dingi, we na bisaka bia ba tshite muakuidi na bia bena Levi, bua kukita midimo yoso ya mu nshibo ya Efile Mukulu a binyibinyi. We na bena mudimo bepaane na abauku kufuba kalolo midimo ya mishindo yoso, mpa na bakunkushi, na muilo oso ushima aukakokiela mayi oobe.”