Mukanda wa kabidi wa Kuilondena kua Mianda
28 Akaze baadi na bipua 20 pabafikile nfumu, na aye nkumunana munda mua bipua 16 mu Yelusalema, tabaadi mukite mianda ibuwa ku meso kua Yehowa bu bibaadi nshaye kulu Davide mukite. 2 Anka baadi mulonde eshinda dia ba nfumu ba Isalele, na aye nkukita mpa na ma nkishi a kilonda* a ba Baale. 3 Baadi mpa na mufitshishe miishi ya milambu mu Ebanda dia Muana a Hinome,* na nkushiika bana baye mu kaalo, aye nkulonda bikitshino bi bubi bukile bia miilo ibaadi Yehowa mubingie kumpala kua bena Isalele. 4 Dingi, baadi mutungunukie na kulambula milambu, na kufitshisha miishi ya milambu ku ma mbalo e kunundu, ku miengie ipeela na muushi mua mutshi oso utshimpukie.
5 Biabia, Yehowa Efile Mukulu aaye nkumutuula mu maasa mua nfumu a Siri, babaadi bamutshimune, abo nkukuata bapika bakile bungi na nkuenda nabo ku Damase. Bamutuudile dingi mu maasa mua nfumu a Isalele, bayipayile bantu baye bakile bungi. 6 Biabia Peka muana a Remaliya bayipayile muifuku dimune bantu 120 000 mu Yunda, boso babaadi balume banyingie mashimba, muanda babaadi basumbushene Yehowa Efile Mukulu a ba nkambua babo. 7 Na Zikri, kilobo kia ngoshi kia mu Efraime, kibayipayile Maaseya muana a nfumu na Azerikame baadi atala mianda ya muibalasa mpa na Elkana baadi mulondele nfumu. 8 Dingi, bena Isalele babakuatshile bakuabo 200 000 benda nabo, kubaadi bakashi, ba nsongualume na ba nsonguakashi. Babapawile dingi bintu bikile bungi, abo nkuibituala mu Samadiya.
9 Kadi mutemuki a Yehowa abetamina bu Odede baadi paapa. Bayile mu kufumankana na kiluilo kibaadi akifiki ku Samadiya na nkuibalungula’shi: “Talayi! Bu bikeele Yehowa Efile Mukulu a ba nkambua benu mukuatshile Yunda nsungu, nyi buakinyi ekeele muibatuule mu maasa muenu, anka, nubebayipaa na nsungu ikile bukopo, ikafikie mpa na muiyilu. 10 Binobino, anukiebe kutuula bantu ba mu Yunda na ba mu Yelusalema bu bafubi benu balume na bu bafubi benu bakashi. Kadi tanuuku’shi n’anue namu nuibapiile kumpala kua Yehowa Efile Mukulu eenu su? 11 Binobino nteemesheyi, na nuposole bakuenu banudi bakuate, muanda Yehowa mmuinukuatshile nsungu ibukopo.”
12 Paapa, bangi ba ku ba nfumu ba bena Efraime, kuamba’shi: Azariya muana a Yehokanane, Berekiya muana a Meshilemote, Yeizekiya muana a Shalume na Amasa muana a Adelayi, babebuele bua kusaashila baba babaadi abalukila mu ngoshi. 13 Abo nkuibalungula’shi: “Tanutuelanga muno na bantu banudi bakuate, muanda atuikala bapiile kumpala kua Yehowa. Biabia bianukimbi kukita abifuimisha miluisho yetu na kunyisha kuitupiisha, muanda miluisho yetu tayidi ikile bungi, na Efile Mukulu mmukuatshile Isalele nsungu ibukopo.” 14 Biabia basalayi babapeele bakunkushi na kakongie kashima, bantu babaabadi bakuate na bintu bibaabadi bapaule. 15 Akupu, bantu babaabadi basangule muyile mashina aabo babebuele, nkuata bantu babaadi bakuatshibue, na abo nkuata bilamba mu bintu bibaabadi bapaule, nkupa baba boso babaadi musua. Babaadi bebafuadikie bilamba, abo nkuibapa nsandale, bia kudia na bia kutoma, na muimu wa kuifikinya.* Dingi babatuadile baba babaadi babofule ku mpunda, abo nkuenda nabo kui bakuabo mu Yeriko, kibundi kia mabo. Akupu, abo nkualukila ku Samadiya.
16 Mu aa mafuku, nfumu Akaze batekiele ba nfumu ba Asiri bua’shi bamukuashe. 17 Bena Edome babafikile dingi mu kuluisha Yunda ngoshi, na abo nkukuata bantu, nkuenda nabo. 18 Bena Filistine namu, babatuelele mu bibundi bia Shefela na mu Negebe a Yunda, abo nkukuata Bete-shemeshe, Ayalone, Gederote, Soko na bibundi bimuifunyishe, Timena na bibundi bimuifunyishe, Gimezo na bibundi bimuifunyishe. Abo nkuimushala. 19 Yehowa bayishile Yunda milongo pa muanda wa Akaze nfumu a Isalele, muanda baadi mutadiile Yunda bua kukita mianda kushi kuikanda, abo nkukita miluisho ibungi na nkukutua lulamato kui Yehowa.
20 Tilgate-pilenesere nfumu a Asiri bafikile mu kulua naye, aye nkumukiengesha pamutue pa kumunyingisha. 21 Muanda Akaze baadi mupaule bintu bia mu nshibo ya Yehowa, bintu bia mu nshibo* ya nfumu na bintu bia mu mashibo a bakunkushi, aye nkuibipa nfumu a Asiri bu biabuntu. Anka tabibamukuashile ku kintu su nkimune. 22 Na mu kipungo kibaadi mu dikienga, Nfumu Akaze banyishile’nyi kukita mianda ibubi ku meso kua Yehowa. 23 Aye nkubanga kulambula b’efile ba ku Damase babaadi bamutshimune milambu, na aye nkuakula’shi: “Bu bikale’shi b’efile ba ba nfumu ba bena Siri bakuete kuibakuasha, nebalambula milambu bua’shi bankuashe namu.” Anka babaadi bamufikishe aye na Isalele oso mushima mu kupona. 24 Dingi, Akaze bakonguele bina mudimo bia mu nshibo ya Efile Mukulu a binyibinyi, akupu aye nkutanya tupesetupese bina mudimo bia mu nshibo ya Efile Mukulu a binyibinyi, nkufunga biibi bia nshibo ya Yehowa, na nkuikitshina bilambuilo mu mapaka oso a Yelusalema. 25 Bakitshine ma mbalo e kunundu mu bibundi bioso bia Yunda bua kufitshisha miishi ya milambu kui bangi b’efile, aye nkukuatshisha Yehowa Efile Mukulu a ba nkambua baye nsungu.
26 Ingi mianda ya Akaze, pabitale bioso bibakitshine kubanga ku mbangilo mpa na ku nfudiilo, ngifundibue mu Mukanda wa ba Nfumu ba Yunda na ba Isalele. 27 Akupu Akaze bafuile nka bu bamashaye kulu, na abo nkumushiika mu kibundi kia Yelusalema, muanda tababayile naye mu mashama a ba nfumu ba Isalele. Na muana aaye Ezekiya nkufika nfumu pa mbalo yaye.