Mukanda wa kabidi wa Kuilondena kua Mianda

18 Yeoshafate baadi na bupeta na ntumbo ikile bungi, anka bakitshine kilombeno kia bulunda na Akabe. 2 Biabia kunyima kua bipua, baadi mualale kui Akabe ku Samadiya, na Akabe nkumuipayila aye na bantu babaadi nabo mikooko na ngombe bikile bungi. Aye nkumushiishikila buabadia kukaamina mu kulua ngoshi na kibundi kia Ramote-gileade. 3 Akupu, Akabe Nfumu a Isalele nkuipusha Yeoshafate Nfumu a Yunda’shi: “Wende nami ku Ramote-gileade?” Aye namu nkumualula’shi: “Ne nka bu’be, muilo wande winka bu muilo oobe na atukukuatshishena mu ngoshi.”

4 Anka Yeoshafate nkulungula nfumu a Isalele’shi: “Banda kuipusha namu Yehowa pabitale uno muanda.” 5 Biabia nfumu a Isalele nkubunga batemuki, bantu 400, nkuibepusha’shi: “Abitungu nende mu kulua ngoshi na Ramote-gileade, su ntshendanga?” Abo nkumualula’shi: “Nda, na Efile Mukulu a binyibinyi akamutuulu mu maasa a nfumu.”

6 Yeoshafate nkuipusha’shi: “Muno ta mui mutemuki a Yehowa su? Tuipushe dingi kukiila kuadi.” 7 Biabia nfumu a Isalele nkulungula Yeoshafate’shi: “Mukii ungi muntu umune atudi balombene kuipusha Yehowa kukiila kuadi; anka ne mumushikue, muanda misango yoso t’atemukaa mianda i buwa pabintale, nka i bubi. Nyi Mikaya muana a Imela.” Ndio Yeoshafate nkumulungula’shi: “Nfumu ta mulombene kuakula muanda wi biabia.”

8 Biabia nfumu a Isalele nkuitanyina mufubi a muibalasa na nkumulungula’shi: “Fika bukidi na Mikaya muana a Imela.” 9 Binyi biabia, nfumu a Isalele na Yeoshafate nfumu a Yunda babaadi bashale muntu oso mu nkuasa aaye a bufumu, bafuale bilamba bia bufumu, babaadi bashale pa mbalo ya kukupiila ntete ku kituelelo kia kibelo kia Samadiya, na batemuki boso abaadi abatemuka kumpala kuabo. 10 Akupu Sedekiya muana a Kenaana bakitshine nsengua ya kiamo na amba’shi: “Yehowa bamba bino’shi, ‘Na ino nsengua okatapa* bena Siri mpa na puebapudisha.’” 11 Bangi batemuki boso abaadi abatemuka nka mushindo umune, bambanga’shi: “Nda ku Ramote-gileade na okatshokola; Yehowa akamutuulu mu maasa a nfumu.”

12 Biabia mukiendi bayile mu kuitanyina Mikaya bamulunguile’shi: “Tala! Batemuki boso babakula mianda i buwa pabitale nfumu. Nakusendeela, nobe namu mayi oobe ekale bu aabo, wakule mianda i buwa.” 13 Anka Mikaya nkuakula’shi: “Na bi Yehowa binyibinyi na muwa, kiakia akindungula Efile Mukulu ande nyi kiankakula.” 14 Akupu aye nkutuela mui nfumu, na nfumu nkumuipusha’shi: “Mikaya abitungu tuende mu kulua ngoshi na Ramote-gileade su tatuendanga?” Mususa umune, aye nkumualula’shi: “Nda na okatshokola; abakatuudibua mu maasa oobe.” 15 Biabia nfumu nkumulungula’shi: “Abitungu nkutshipishe misusa bungi kinyi bua’shi ondungule nka penda bia binyibinyi kushi kingi kintu muishina dia Yehowa?” 16 Biabia aye nkuakula’shi: “Namono bena Isalele boso mbapalakane ku miengie nka bu mikooko ishi na mulami. Yehowa akula’shi: ‘Bano bantu tabe na nfumu. Tadiila oso a kuabadi alukiile ku nshibo kuaye mu butaale.’”

17 Akupu nfumu a Isalele nkulungula Yeoshafate’shi: “Tanyikalanga mukulungule’shi, ‘T’atemukaa mianda i buwa pabintale, nka penda mianda i bubi su’?”

18 Akupu Mikaya nkuakula’shi: “Biabia, teemesha eyi dia Yehowa: Nemumone Yehowa mmushale mu nkuasa aaye a bufumu, na kiluilo kioso kia muiyilu nkimane ku mboko yaye ibalume na ku mboko yaye ibakashi. 19 Akupu Yehowa nkuakula’shi: ‘Nnanyi akadimbi Akabe Nfumu a Isalele bua’shi ende na akafuile ku Ramote-gileade?’ Na muikeyilu umune baadi akula muanda umune pabaadi ungi muikeyilu akula ungi muanda. 20 Akupu ungi muikeyilu* nkuifubuila, nkuimana kumpala kua Yehowa na nkuakula’shi, ‘Namudimbi.’ Yehowa nkuipusha’shi, ‘Webikitshi naminyi?’ 21 Aye nkualula’shi, ‘Nende na neyikashe bu kikudi akidimbanaa mukanua mua batemuki baye boso. Biabia aye nkuakula’shi, ‘Omudimbi, na dingi obesha. Nda na webikite.’ 22 Binobino Yehowa mmutuule kikudi akidimbanaa mukanua mua bano batemuki bobe, anka Yehowa bakula’shi dikienga adikufikila.”

23 Sedekiya muana a Kenaana nkuifubuila na nkukupila Mikaya kapata kuitama na nkuakula’shi: “Kikudi kia Yehowa kibankidi bua’shi kiakule nobe, kibakidila eshinda kinyi?” 24 Mikaya nkualula’shi: “Tala! Okamono eshinda diakibakidila muifuku diokatuele mu kadimbo ka munda ngofu bua kufuama.” 25 Akupu nfumu a Isalele nkuakula’shi: “Ata Mikaya omualushe kui Amone nfumu a kibundi na kui Yoashe muana a nfumu. 26 Webalungule’shi: ‘Nfumu bakula’shi: “Elayi uno muntu mu lukano na nuikale anumupa mukate upeela na mema mpa na pankalukiila mu butaale.”’” 27 Mikaya nkuakula’shi: “Su walukiila mu butaale, Yehowa ta muisambe nami.” Akupu aye nkulombasha’shi: “Anue bantu boso, lamiinayi uno muanda.”

28 Biabia nfumu a Isalele na Yeoshafate nfumu a Yunda nkuenda ku Ramote-gileade. 29 Nfumu a Isalele nkulungula Yeoshafate’shi: “Nedimbi bu ungi muntu na ntuele mu ngoshi, anka abitungu ofuale bilamba biobe bia bufumu.” Biabia nfumu a Isalele nkuidimba bu ungi muntu na abo nkutuela mu ngoshi. 30 Binobino nfumu a Siri baadi mutumine bakata baye ba matempu eyi’shi: “Tanuluanga na muntu su ngumune, biabikala musalayi sunga mukata a basalayi, kukatusha penda nfumu a Isalele.” 31 Anka bakata ba matempu baki’abamono Yeoshafate, abambile’shi: “Nyi nfumu a Isalele.” Biabia abalulukile bua kulua naye; na Yeoshafate nkubanga kuela misaase bua’shi bamukuashe, paapa Yehowa nkumukuasha. Musango umune Efile Mukulu nkukita bia’shi bakatukie kuadi. 32 Pabaadi bakata ba matempu bamone’shi ta nfumu a Isalele, mususa umune abalekiele kumulonda.

33 Anka ungi muntu nkuela mukietue waye kushi kuuka, na nkuasa nfumu a Isalele pankatshi pa malunga a ekotshi diaye dia tu biamo. Biabia nfumu nkulungula muntu atambushaa etempu diaye’shi: “Ekonye na otuukie nami mu ngoshi,* muanda natapika bi bubi ngofu.” 34 Ngoshi ibafikile bukopo bukile mu diadia efuku dioso, na bibaadi abitungu kukuatshishena nfumu a Isalele bua’shi ashale muimane mu etempu, bua kumona bena Siri mpa na ku kiolua, na aye nkufua pa kupona kua nguba.