Mukanda wa kabidi wa Kuilondena kua Mianda
26 Akupu bantu boso ba mu Yunda nkuata Oziase baadi na bipua 16, nkumutuula bu nfumu pa mbalo ya nshaye Amasiase. 2 Aye nkuibakulula kibundi kia Elote na nkuikialushila Yunda kunyima kua nfumu* kufua, na ku’abo kumushiika bu bamashaye kulu. 3 Oziase baadi na bipua 16 pabafikile nfumu, na baadi mumunane munda mua bipua 52 mu Yelusalema. Eshina dia nyinaye dibaadi Yekoliya a mu Yelusalema. 4 Batungunukile na kukita mianda ibuwa ku meso kua Yehowa nka bu bibaadi bikite nshaye Amasiase. 5 Batungunukile na kukimba Efile Mukulu mu mafuku a Zekariya, yawa baadi mumulongieshe bia kutshina Efile Mukulu a binyibinyi. Munda mua mafuku abaadi akimbi Yehowa, Efile Mukulu a binyibinyi bakitshine bia’shi mianda yaye yende kalolo.
6 Bayile na akalua na bena Filistine, abumbula kimano kia kibundi kia Gate, kia Yabene na kia Ashedode. Akupu, aye nkuibaka bibundi mu nsenga ya Ashedode na mu bingi bipindi bia nsenga bia bena Filistine. 7 Efile Mukulu a binyibinyi batungunukile na kumukuasha mu ngoshi ibaadi alu na bena Filistine, bena Arabe babaadi bashale mu Gurebaale mpa na bena Meune. 8 Bena Amone bababangile kutuadila Oziase milambu. Nfudiilo a bioso, nkumo yaye ibapalakene, ayo nkukafika mpa na mu Ejipitu, muanda bapetele bukome bukile bungi. 9 Dingi, Oziase bayibakile bitenta mu Yelusalema pepi na Kiibi kia Muipaka, pepi na Kiibi kia Kuibanda na pepi na Musungo ukuatshishene mudimba, aye nkuibinyingisha. 10 Akupu, bayibakile bitenta mu kabaaka na aye nkubundula biina bia kulamina mema bibungi (muanda baadi na bimunuanga bikile bungi,) bakitshine dingi biabia mu Shefela na muibanda. Baadi na ba bidime na bantu babaadi abadimi milundo yaye ya nfinyo mu miengie na mu Karmele, muanda baadi mukumiine kudima.
11 Oziase bapetele kiluilo kia basalayi ki na bina ngoshi. Babaadi abende mu ngoshi mbelumbuule mu bisaka. Babaadi bebabadikie, bebafunda mashina kui mufundi Yeyele na kui kapita Maaseya baadi ku bukunkushi bua Ananiya umune a ku bakunkushi. 12 Bungi boso bua ba nfumu ba bifuko bia bamashabo babaadi kunundu kua bino bilobo bia ngoshi bubaadi 2 600. 13 Kiluilo kibaadi ku matalua aabo kibaadi na bantu 307 500, belumbuule bua kulua ngoshi, basalayi be bukome balombene kukuatshishena nfumu p’akalu na beshikuanyi baye. 14 Oziase bapeele kiluilo kiaye kioso kishima ngabo, milumbu, bifulu, makotshi a tu biamo, mata na mabue a mu ndundo. 15 Dingi, ku Yelusalema bakitshine mashiinyi a ngoshi abaabadi bakite kui basha binangu. Babaadi beatuule ku bitenta na mu mapaka a midimba, na babaadi abaasa nao mikietue na mabue akata. Biabia, nkumo yaye ibapalakene ngofu mpa na mu maumbo e kula, muanda bapetele bukuashi bukata na bapetele bukome.
16 Kadi, nka’ye kiapete bukome, babangile kuikaamisha muishimba diaye, na abio nkumufikisha ku kabutu, bakitshine mianda na kukutua lulamato kui Yehowa Efile Mukulu aaye, pa kutuela mu ntempelo a Yehowa bua kushiika kabanda* pa kilambuilo kia kabanda. 17 Musango umune, tshite muakuidi Azariya na bangi ba tshite muakuidi ba Yehowa 80 banyingie mashimba babamulondele muamua. 18 Abo nkusaashila Nfumu Oziase, na nkumulungula’shi: “Obe Oziase tuena matalua a kushiikila Yehowa kabanda, anka penda ba tshite muakuidi nyi balombene kushiika kabanda, muanda abo mbana ba Alona, baba babadi bekashe ba kishila. Tuuka mu mbalo ya kishila, muanda bokitshi mianda na kukutua kua lulamato, na topete ntumbo kui Yehowa Efile Mukulu oobe bua bino bibokitshi.”
19 Kadi Oziase baadi na kintu kia kushiikila kabanda mu maasa muaye, bakuatshile nsungu ibukopo, na yaaya nsaa ibaadi mukuatshile ba tshite muakuidi nsungu, nsudi ibamutuukile mu mpala mu meso mua ba tshite muakuidi, kumpala kua kilambuilo kia kabanda mu nshibo ya Yehowa. 20 Pabaadi Azariya mukata a ba tshite muakuidi na ba tshite muakuidi boso bealuule kuadi, babamuene’shi nsudi ibamutuuku mu mpala, biabia abo nkumutuusha bukidibukidi muamua, na aye nabene nkutuuka bukidibukidi, muanda Yehowa bamunyokiele.
21 Nfumu Oziase bashadile na nsudi mpa na kuifuku dia lufu luaye, na batungunukile na kushala mu nshibo ya pa bupenka pa muanda wa nsudi, muanda babamubingile mu nshibo ya Yehowa. Muana aaye Yotame baadi atala mianda ya mu nshibo* ya nfumu, asambishanga bantu ba muiumbo.
22 Ingi mianda ya Oziase, kubanga ku mbangilo mpa na ku nfudiilo, ngifundibue kui mutemuki Yeshaya muana a Amoze. 23 Akupu, Oziase bafuile nka bu bamashaye kulu, na abo nkumushiika pamune na bamashaye kulu, kadi mu kipindi kia nsenga kibaadi pepi na mashama a ba nfumu, muanda babambile’shi: “E na nsudi.” Na muana aaye Yotame nkufika nfumu pa mbalo yaye.