Yobo
3 Kunyima kua biabia, Yobo babangile kuakula na kuela efuku dibaadi mutandikue mulua. 2 Yobo nkuakula’shi:
3 “Efuku dinaadi mutandibue dishimine,
Na bufuku bubaadi muntu kampanda muambe’shi: ‘Babayimita muana mulume!’
4 Diadia efuku dikale mufito.
Efile Mukulu e muiyilu teditudilanga binangu;
Etaata dia ngumba tadidimunyikanga.
5 Mufito wi bukopo widitekie.
Ekumbi dia mpeshi didishalele.
Bintu bioso abikashaa efuku mufito biditshinyishe.
6 Mufito ubuikile buabua bufuku;
Tabuikalanga na muloo munkatshi mua mafuku a ku kipua,
Tabubadikibuanga munkatshi mua mieshi.
7 Oolo! Muntu su ngumune tatandikuanga mu buabua bufuku;
Musaase wa muloo taupushikanga muanka.
8 Baba abelaa efuku mulua bebuele mulua,
Baba bena ngobesha ya kubuusha Leviatane.*
9 Nyenyenyi yabo yapakutooka ifiite;
Butengiele etaata mu bisumanga,
Na tabumonanga nsembue ya pa kutooka.
10 Muanda tabubaadi bushite biibi bi’efu dia nyinami;
Tabubaadi bufuamishe dikienga ku meso kuande.
11 Buakinyi ntshinaadi mufue pa kutandikua?
Buakinyi ntshinaadi mufue panaadi mutuukie muifu?
12 Buakinyi makunungu abaadi antambule;
Na buakinyi mabeele abaadi angomeshe?
13 Muanda nadia kuikala mulale kushi lukalakashi;
Nadia kuikala mulale tulo na muikishe
14 Pamune na ba nfumu ba pa nsenga na bantu babo abebapeyaa malango,
Baba babaadi beyibakile abo banabene ma mbalo aluishibue lelo uno,
15 Sunga pamune na bakunkushi be na ôlo,
Sunga basha mashibo aule na kiamo kia arja.
16 Buakinyi ntshinadia kuikala sunga bu eyimi dibakatuka,
Sunga bu bana bashaamuene etaata kashaa?
17 Kuakua sunga bantu be bubi, babalekie kuikalakasha;
Kuakua bantu bakookie mbayikishe.
18 Kuakua bena lukano be boso mu butaale;
Tabapusha eyi dia muntu ebakitshisha bua kufuba pa bukopo.
19 Kuakua bashadile na basha kinemo be mumune,
Na mpika bapososhiibua kui nfumuaye.
20 Buakinyi mmupe baba be mu dikienga etaata
Na baba benyongole ngofu muwa?
21 Buakinyi abakimbi lufu, anka lufu talufiki?
Ababundula bua kuilukimba kukila biabakimba mapeta afuame,
22 Baba bakuete kusanka ngofu,
Basha muloo nsaa yabapete mashama.
23 Buakinyi apa muntu bashimisha eshinda diaye etaata,
Yawa abadi bele mu lupango kui Efile Mukulu?
24 Dikienga diande tadidi bu kiande kidibua,
Na kutompola kuande akualaala nka bu mema.
25 Muanda kiakia akinkuatshisha moo kibafiki kuandi,
Na kiakia kiantshinyi kibamponena.
26 Ntshina butaale, sunga kuiyikeela, sunga kuikisha,
Anka dikienga aditungunuka nka na kufika.”