Yobo
34 Biabia Elihu batungunukile na kualula’shi:
2 “Teemeshayi mayi ande, anue ba sha binangu;
Mpusheyi, anue abauku mianda ibungi.
3 Muanda etui aditompaa bishima
Anka bu abitompaa ludimi* bia kudia.
4 Tutaluule atue banabene kiakia kilulame;
Tuate kitshibilo mukantshi muetu pabitale kiakia kibuwa.
5 Muanda Yobo bakula’shi: ‘Ne mubingie,
Anka Efile Mukulu bapele kumbingisha.
6 Ne kudimba pabitale bi kuikala kiimu kia bantshibila su?
Elonda diande tadi bia kupanda, sunga bianshi musoole muanda.’
7 Nnanyi e bu Yobo,
Kuete kutoma kasaabu bu mema?
8 E mu kisaka kia ba nkitshishi ba bubi
Na mu kisaka kia bantu bebubi.
9 Muanda muankule’shi: ‘Muntu te na ki’apete
P’akimbi kusankisha Efile Mukulu.’
10 Biabia nteemesheyi, anue bantu basha kushinguula kua mianda:*
Efile Mukulu a binyibinyi tamulombene su nkapeela kukita mianda na eshimba dibubi,
Na Sha Bukome Boso tamulombene kukita mianda ibubi!
11 Muanda akafutu muntu muyile biakitshi
Na kumufuishila bipeta bia mashinda aaye.
12 Mbinyibinyi, Efile Mukulu t’akitaa mianda n’eshimba dibubi;
Sha Bukome Boso akitaa nka mianda ilulame.
13 Nnanyi mumutuule bua kukunkusha nsenga,
Na nanyi mumutuule kunundu kua nsenga?*
14 Su atuma binangu* biaye kuabadi,
Su akatusha kikudi kiabo na muwa wabo,
15 bantu boso abafu pamune,
Na bantu abalukiila ku lufufi.
16 Biabia su we na kushinguula kua mianda, tuula binangu ku uno muanda;
Teemesha kalolo biangakula.
17 Muntu mushikue kululama mmulombene kukunkusha,
Sunga’shi we kuponeesha muntu sha bukome muikale mululame kilumbu?
18 We kulungula nfumu’shi: ‘We muntu abisumanga,
Sunga bantu ba kinemo’shi: ‘Nui bantu bebubi’?
19 Kui Yawa sh’aleshaa bakunkushi ntondo
Na sh’aleshaa ba mpeta kalolo kukila balanda,*
Muanda boso mmufubo wa maasa aaye.
20 Be kufua kibatu, munkatshi a bufuku;
Abasuusu bibukopo na abashimina;
Mpa na basha bukome abakatushua, anka kushi ku maasa a bantu.
21 Muanda meso a Efile Mukulu e pa mashinda a muntu,
Na amonaa matabula aaye oso.
22 Takui mufito sunga mufito wi bukopo
Mulombene ba nkitshishi ba bubi kufuama.
23 Muanda Efile Mukulu tamutshibe kipungo kia’shi muntu
Afikie kumpala kuaye mu kusamba.
24 Atshokolaa basha bukome kushi lukalo lua’shi akimbuule
Na atuulaa bangi mu ma mbalo aabo.
25 Muanda auku mianda y’abakuete kukita;
Ebaponeshaa bufuku na abafingika.
26 Ebakupilaa muanda wa bubi buabo,
Mu mbalo ayimono mbatu boso,
27 Muanda mbalekie kumulonda
Na tabe na kanemo bua mashinda aaye;
28 Abatakula balanda mu kumuididila,
Biabia apusha kudila kua bantu bashi na bukuashi.
29 Apashala Efile Mukulu muumine, nnanyi e kumutopeka?
P’afuamisha mpala yaye, nanyi e kumumona?
Biabikala kui muilo sunga kui muntu, kipeta ki nka mumune,
30 Buashi muntu sh’atshinaa Efile Mukulu* takunkushanga
Sunga kutee bantu miteo.
31 Muanda muntu mmulombene kulungula Efile Mukulu’shi:
‘Nemunyokibue aku namu ntshi musoole;
32 Ndongieshe kiakia kiandi mukutue kumona;
Su nemukite muanda wi bubi, ntaneukitshi dingi su’?
33 Abitungu nka akufute muyile biokumiina sunga bibopele kiimu kiaye?
Abitungu wate kitshibilo, ntanami nya.
Biabia ndungule kiakia kiouku kalolo.
34 Bantu basha kushinguula kua mianda
Na muntu oso sha binangu ampusha, akandungula’shi:
35 ‘Yobo akula kushi kiukilo,
Na mayi aaye taena lushinguluilo.’
36 Yobo atompibue* mpa na ku nfudiilo
Muanda mianda y’alula inka bu ya bantu be bubi!
37 Akumbasha etombo ku muluisho waye;
Akupila nkasa na kasaabu koso kumpala kuetu
Na afuimisha bishima biaye bua kutopeka Efile Mukulu a binyibinyi!”