Yobo
35 Elihu batungunukile na kualula’shi:
2 “We mushinkamishe’shi we mubingie bodia kuakula’shi:
‘Ne mululame kukila Efile Mukulu su’?
3 Muanda buakula’shi: ‘Mbikutale ku kinyi?*
Ne biya kukila panadia kuikala mukite muluisho su?’
4 Nnakualula obe
Na bakuuku bobe bodi nabo.
5 Tala muiyilu na omone,
Tala makumbi, e kuiyilu kunundu kobe.
6 Su bokitshi muluisho, omukitshina bubi ku kinyi?
Su bilubilo biobe bibafuimi, abimukitshi kinyi?
7 Su we mululame, nkinyi ki’omupa;
Nkinyi ki’apete kodi?
8 Bubi bobe abukitshina nka penda muntu bu obe bi bubi,
Na kululama kobe akukuasha nka penda muana a muntu.
9 Bantu abadidi pabebakiengiesha ngofu;
Abadidi bua’shi bebapaashe ku bukunkushi* bua bantu basha bukome.
10 Anka takui muntu su ngumune akula’shi: ‘Efile Mukulu e kunyi, Mupangi ande Mukata,
Yawa akitaa bia’shi ngono imbibue bufuku?’
11 Etulongieshaa kukila nyema ya pa nsenga,
Na etuikashaa na binangu kukila tonyi tua muiyilu.
12 Bantu abadidi, anka t’alula,
Pa muanda wa kuitatula kua bantu be bubi.
13 Binyibinyi Efile Mukulu t’apushaa kuidila kua bisumanga;*
Sha Bukome Boso ta teyaa matui kuanka.
14 Biabia bikuikala naminyi, pu’edidi’shi tuemumumone!
Kilumbu kiobe ki kumpala kuaye, biabia abitungu omutengiele n’eshimba kuiyilu.
15 Muanda tamukukuatshile nsungu na tamukunyokie;
Sunga kuimeena pa mianda y’uakula na kuitatula.
16 Yobo abuula mukanua muaye bikata mu bisumanga;
Afuimisha bishima kushi kiukilo.”