Yobo
36 Elihu batungunukile na kuakula’shi:
2 “Banda kuishinka kapeela pakiangakula,
Muanda nki na mianda ya kuakula bua Efile Mukulu.
3 Nakakula mianda yoso yanguuku,
Na nakakula bi Mupangi ande mmululame.
4 Binyibinyi mayi ande tanga madimi nya;
Yawa mupuidikie mu kiukilo e pano kumpala kobe.
5 Binyibinyi, Efile Mukulu nsha bukome na tasumbushenaa muntu;
Mmukata mu bukome buaye bua kushinguula kua mianda.*
6 T’akakaluila miuwa ya bantu be bubi nya,
Anka akatshibila bantu abakiengie kiimu kilulame.
7 T’akatushaa meso aaye kui bantu balulame;
Ebatuulaa mu ma nkuasa a bufumu bu ba nfumu,* na abatumbishibuaa bua loso.
8 Anka su mbanyibue mu nkano
Na mbakuatshibue mu mioshi ya dikienga,
9 Ebafumbuila kiakia kiabadi bakite,
Bilubilo biabo abifiki mu kuitatula kuabo.
10 Ashikulaa matui aabo bua badia kupusha elango
Na ebalungulaa bua badia kuleka mianda ibubi.
11 Su bakokiela na bamufubila,
Abakekala na nshalelo e buwa mu mafuku a muwa wabo,
Na bipua biabo abikekala bia muloo.
12 Anka su ta mbakokiele, abakayipayibua ku lupete lua ngoshi*
Na bafue kushi kiukilo.
13 Bantu bash’abatshinaa Efile Mukulu* abakalama nsungu.
T’abeele musaase bua kuteka bukuashi sunga padi muibanye.
15 Anka Efile Mukulu* apashaa bantu abakiengie mu mafuku a dikienga diabo;
Ashikulaa etui diabo p’abebakiengiesha.
16 Akukatusha ku dikienga
Akutuale ku mbalo ikata, ishi dikienga,
Na bia kudia bi buwa bituule pa mesa oobe bua kukusamba.
17 Paapa, okasanka bua kiimu ki’abakatshibila bantu bebubi,
P’abakatshibi kiimu na kululama koso.
18 Anka dimuka tala nsungu yakufikisha mu kukita bubi,*
Na totadilanga kutshibibua kua milomo kukata kua kupambusha.
19 Kudila kobe bua kuteka bukuashi
Sunga kuitatshisha kobe kui bukopo mbilombene nkukaluila ku dikienga su?
20 Tuekalanga na lukalo lui bukopo lua’shi bufuku buile,
Nsaa i bantu abashimina mu ma mbalo aabo.
21 Dimuka tala wepaana mu kukita mianda ibubi,
Tosangulanga bua kukita bubi, anka sangula bua kunyingila dikienga.
22 Efile Mukulu mmutumbishibue pa muanda wa bukome buaye;
Mmulongieshi kinyi e bu’ye?
23 Nanyi e kuludika* eshinda diaye
Sunga kumulungula’shi: ‘Kiakia kibokitshi ki bubi’?
24 Tentekiesha bua kutumbisha mufubo waye,
Ubaadi bantu bayimbile ngono.
25 Bantu boso mbeumone,
Muntu afuiyaa eutadila ku bula.
26 Efile Mukulu mmukata kukila biatudi balombene kuuka;
Bungi bua bipua biaye bui bukopo kushinguula.
27 Akakaa makopola a mema;
Milemba ayibungu, ayikitshi mpeshi;
28 Akupu makumbi a eapongoola paashi;
Na aanokiela bantu bu mpeshi.
29 Nanyi mulombene kushinguula abipalakanaa makumbi,
Kabadibadi akafiki mu kashibo kaye k’epema?*
31 Uno nyi mushindo w’adishaa* bantu;
Ebapaa bia kudia bi bungi.
32 Abuikila mipenyo na maasa aaye,
Eyiludika ku kintu ki’asa.
33 Kabadibadi kaye akakula pabimutale,
Mpa na bimunuanga abiukisha kuete* kufika.