Yobo
39 “Ouku mafuku aatandaa mbushi ya mu ma ngulu su?
Tobomuene ntengu patanda tuana tuaye su?
2 Obadikaa mieshi ayikitaa bana bayo muifu su?
Ouku mafuku ayitandaa su?
3 Ayikunamaa bua kutanda bana bayo,
Na mitanyo yayo ya pa kutanda ayipu.
4 Bana bayo abafiki bukome na abakudila mu mapia;
Abende na tabalukiila kuabadi.
5 Nnanyi baadi muposole mpunda a kisuku,*
Na nnanyi badi muangule mioshi ya mpunda a kisuku?
6 Nemuikashe kabaka bu nshibo yaye
Na nsenga i mungua bu kishalelo kiaye.
7 Abepuula tuleo tua kibundi;
Na t’apusha misaase ya muntu akunkusha nyema.
8 Atambakanaa mu tu miengie bua kukimba bia kudia,
Akimbi pe mutshi oso ubishi.
9 Ngombe mulume a mu kisuku mmulombene kukumiina nkufubila su?
Ekulala bufuku mu kikutu* kiobe su?
10 We mulombene kuanya ngombe mulume a mu kisuku moshi bua’shi akuelele mbunda,
Sunga’shi mmulombene nkulonda bua kudima muibanda su?
11 Okulupila mu bukome buaye bui bungi
Na omulekieela bua kukita mufubo obe wi bukopo?
12 Omukulupila buadia nkutuadila biumbuluanga biobe,
Na nkubungila bianka pa mbalo yobe ya kukupiila ntete?
13 Mbaba ya kionyi kia otrishe ayipapamaa na muloo,
Anka nsongo ya mbaba yakio na mapushi aakio bikupuandikishua na bia kionyi kia kiabula su?
14 Akilekaa mayi aakio mu nsenga,
Na a ki eelesha kibobo mu lufuinkinyi.
15 Akilubu’shi ngua ngilombene kuiasosa
Sunga’shi nyema a kisuku mmulombene kuiashina.
16 Akikitshina bana bakio mianda na kifita, nka bu’shi nta mbakio;
Takitshinyi’shi mufubo wakio wi kuikala wa bisumanga.
17 Muanda Efile Mukulu mmuikisumine* binangu
Na ntammuikipe lushinguluilo.
18 Anka nsaa yakibo na akipapama na mbaba yakio,
Akisepe nfualasa na muntu amutambushaa.
19 Nnobe apeyaa nfualasa bukome buaye su?
Nnobe afuadikaa nshingo yaaye buaa bui bula abuipuku su?
20 Wemulombene kukita bia’shi etumbe bu mpasu su?
Kudila kuaye kua kukaanya akutshinyishaa.
21 Akupilaa mikona yaye mu nsenga muibanda na etumbu na bukome bui bungi;
Na enda mu kulua ngoshi.*
22 Asepe moo na tatshinyi kintu su nkimune.
T’alukiila kunyima muanda wa lupete lua ngoshi.
23 Kabuta ka mikietue akekupila pa mbidi paye,
Mulumbu ukata na upeela ayipenyapenya.
25 Apadidi mpungi, akula’shi: ‘Aha!’
Apusha eshiko dia ngoshi ku bula
Na apusha misaase ya bakata ba basalayi na tuleo tua ngoshi.
26 Nku binangu biobe akupapamaa kabemba,
Kabaale mbaba yako itadiile dia kuushi su?
27 Sunga’shi mumba aupapamaa muiyilu ngofu ku eyi diobe
Na kuibaka esua diao muiyilu,
28 Walalanga bufuku kunundu kua lubuebue,
Na kushala mu mbalo yao ya kufuamina kunundu kua lubuebue su?*
29 Aukimbi bia kudia kukatukila kuakua;
Meso ao aamono kula ngofu.
30 Bana bao abatomo mase;
Na mbalo yoso i bitanda, nyi mbalo yaudi.”