Yobo
8 Akupu Bildade muina Shuwa nkualula Yobo’shi:
2 “Otungunuka na kuakula bino mpa na ku nsaa kinyi?
Mayi a mukanua mobe mpenda lupapi lui bukopo!
3 Efile Mukulu akatshibi kiimu mu mushindo wibubi,
Sunga’shi Sha Bukome Boso akaluisha kululama su?
4 Su bana bobe bekeele bamukitshine muluisho,
Mmuibalekieele bua badia kunyokiibua bua kutomboka kuabo;*
5 Anka su bodia kukulupila penda mui Efile Mukulu
Na kusendeela Sha Bukome Boso bua’shi akupushishe lusa,
6 Na su bodia kuikala binyibinyi e selele na mululame,
Badia kukupasukila*
Na kukualusha mu mbalo yobe ikukumbene.
7 Sunga mbangilo oobe baadi peela,
Mafuku oobe e kumpala aakekala a muloo.
8 Ipusha namu bantu ba mu kipungo kia kala,
Na otume binangu ku mianda ibaadi bamashabo bapete.
9 Muanda tuibatandikue nka penda maloba, na tatuuku kintu,
Muanda mafuku eetu pa nsenga e nka bu muesheshi.
10 T’abakakulongiesha
Na kukulungula biabauuku su?
11 Papirise* akulaa mbalo ishi mema su?
Elengie adikulaa kushi mema?
12 Nka biki’abituuku, tababandile kuibitshiba,
Abiumu kumpala kua ingi mitshi yoso.
13 Bino nyi abikafikila* baba boso abalubu Efile Mukulu,
Muanda lukulupilo lua bantu basha batshinaa Efile Mukulu* alukashimina,
14 Lukulupilo luabo ndua bisumanga
Na lukulupilo luabo ndubofule nka bu bulambo bua natanda.*
15 Akeeyemena ku nshibo yaye, anka tayikemana;
Akatompo kukuata kuanka, anka tayikayisha.
16 Enka bu mutshi uule na maka,
Na ntonga yaye ngipalakane mu mafuba.
17 Mishi yaye ngituelene mu mutuuto wa mabue;
Akimbi nshibo mu mabue.*
18 Anka pabakamushulu* mu mbalo yaye,
Yaaya mbalo ayikamutunu na kuakula’shi: ‘Kasha tankumuene.’
19 Oolo, biabia nyi biakashimina;*
Akupu bangi abakatuuku mu lufufi.
20 Binyibinyi Efile Mukulu t’akasumbushena baba abashala na lulamato;*
Na t’akakuatshishena* bantu bebubi,
21 Muanda akausha mukanua mobe na tusepo
Na milomo yobe na misaase ya muloo.
22 Baba bakushikue abakakuatshishibua buufu,
Na kashibo k’epema ka bantu bebubi t’akakekala dingi kuanka.”