Yobo
17 “Kikudi kiande nkitshokokie, mafuku ande ngapeela;
Mashama akuete kuntengiela.
2 Bantu abasepanaa bangifunyishe,
Na eyiso diande abitungu dishale nka ditale ku muikelo wabo wa buntomboshi.
3 Kumiina namu kuiyikeela kuande, na wekulame kodi.
Nanyi mungi mulombene kuinyukishena nami maasa na kungakuila?
4 Muanda we mufuamishe eshimba diabo kushinguula kua mianda;
Nyi buakinyi tu’ebatumbisha.
5 Kui bantu abakumiina kuiabishena na bakuuku babo bintu,
Aku namu bana babo tabakuete kumona kalolo pa muanda wa nsala.
6 Bangikasha kintu kia kusenga mukantshi* mua miilo,
Biabia nafiki muntu akuasa mata mu mpala.
7 Meso ande taakia amono kalolo pa muanda wa dikienga,
Na maboko ande na mikoolo yande binka bu muesheshi.
8 Bantu balulame abebitala na kukaanya,
Na muntu shi musoole muanda akalakashua pa muanda wa muntu sh’atshinaa Efile Mukulu.*
9 Muntu mululame ashalaa mulamate muishinda diaye,
Na muntu e na maasa atooshibue afikaa na bukome buibungi.
10 Anka anue boso nui kufika na nuabanguula kuakula,
Muanda ntshi mupete muntu su ngumune e na binangu mukantshi muenu.
11 Mafuku ande abapu;
Mpango yande, nkalo ya muishimba diande ibaluila.
12 Abatungunuka na kuikasha bufuku bu kanya,
Bakulanga’shi: ‘Etaata tadidi pepi muanda mufito ubeele.’
13 Su natengiela, Mashama* aakekala nshibo yande;
Nakaadisha lusala luande mu mufito.
14 Naketanyina buina’shi: ‘We nshami!’
Na bifinyo’shi: ‘We nyinami na we mukuetu mukashi!’
15 Paapa, lukulupilo luande lui kunyi?
Nanyi mulombene nkumuena lukulupilo?