Yobo
19 Yobo baluluile’shi:
2 “Anutungunuka na kufiitshisha anyima ande nsungu* mpa na ku mafuku kinyi,
Na kunsosa na mayi?
3 Nubansashila* ino misusa ekumi;
Tanupusha sunga mbufu bua kunkitshiina mianda ibubi.
4 Su mbinyibinyi’shi nemukite kilubilo,
Kilubilo kiande nkintale nk’ami nabene.
5 Su nukuete nka kuitumbisha kunundu kuande,
Nuakulanga’shi mianda yabanfundu nayo ngia binyibinyi,
6 Paapa ukayi’shi Efile Mukulu nyi mundimbe,
Na mmunkuate mu bukondia buaye bua kuta nabo.
7 Talayi natungunuka na kuela musaase’shi: ‘Etombo!’ Anka tabangalula;
Natungunuka na kuela musaase bua kuteka bukuashi, anka kululama takui kuanka.
8 Mushite eshinda diande na mudimba wa mabue, na ntshi bia kukila;
Mmupuute mashinda ande na mufito.
9 Munkaashe ntumbo yande
Na munfuule kifulu kia bufumu ku mutue wande.
10 Bantshokola mu mpese yoso mpa na panashimina;
Bashulu lukulupilo luande nka bu mutshi.
11 Nsungu yaye ikuete kuntembela nka bu kaalo,
Na kuete kummona bu muishikuanyi aaye.
12 Bisaka biaye bia basalayi bibafiki pamune na mbingifunyishe,
Na bibatuulu kishalelo kiabio bifunyishe kashibo kande k’epema.
13 Babingi bakuetu kula nami,
Na baba abanguuku babantampa mongo.
14 Benami ba p’eshimba* babende,
Na baba bangukanga kalolo babangiluankana.
15 Benyi be mu nshibo yande, na ba mpika bande bakashi abammono bu muntu muenyi;
Ne muenyi ku meso kuabo.
16 Nayitanyina mufubi ande, anka ntangalula;
Namusendeela buashi ampushe lusa.
17 Muwa wa mukanua muande ubafiki bu kintu ki butete kui mukashi ande,
Na ne kintu akinuunku kui bakuetu balume.*
18 Mpa na bana bakinga abambepuula;
Nsaa yangimana ababanga kunkaa.
19 Bakuuku bande boso ba p’eshimba babanshikua,
Na baba banadi mufule, babantapa mongo.
20 Mifufua yande ibalamata ku kikoba na ku mbidi yande,
Na napanda na kikoba kia meno ande.
21 Mpusheyi lusa benami, mpusheyi lusa,
Muanda eyasa di’Efile Mukulu dibankupila.
22 Buakinyi anutungunuka na kunkiengiesha bu abikitshi Efile Mukulu,
Kunduisha kuenu t’akupu?*
23 Su mayi ande abadia kufundibua,
Su abadia kufundibua mu mukanda!
24 Ayi baboo, su babadia kuiafunda ku lubuebue bua loso,
Na mutonkolo wa kiamo na polombe!
25 Muanda nauku’shi mukuudi ande ena muwa;
Akafiki kunyima na ayimane kunundu kua nsenga.
26 Kunyima kua kikoba kiande kuluila,
Panki nka na muwa, nakamono Efile Mukulu.
27 Ankamono ami nabene,
Abakamono kui meso ande ami nabene, kushi a ungi muntu.
Anka munda muande nepusha mufudiile ngofu!*
28 Muanda anuamba’shi: ‘Tukuete kukukiengiesha mu mushindo kinyi?’
Muanda ami nyi sha muanda.
29 Tshinayi lupete lua ngoshi,
Muanda lupete lua ngoshi alutuadilaa bilubilo dinyoka;
Abitungu nuukie’shi kui nsushi.”