Bwakinyi balongi ba Yesu tabakwete kwishidika?

Yowano Mubatshishi batwelele mu lukano mafuku apeela kunyima kwa Yesu kyapetekyelwa mu Kidibwa kya lukilo kya mu kipwa kya 30 B.B. Yowano badi akumina shi balongi baye bafikye balondji ba Yesu, anka ta mbooso ba kwabadi abadi bakite byabya mweshi ubalondele kunyima kwa Yowano kwedibwa mu lukano nya.

Binobino, bu bibadi mafuku a Kidibwa kya lukilo kya kipwa kya 31 B.B. aefubwila, bangi ba ku balongi ba Yowano abafiki kwi Yesu na kumwipusha shi: “Mbwa-kinyi atwe na Bafadisee atwishidikaa, balondji boobe t’abeshidikaa?” (Mateo 9:14) Bafadisee abadi abeshidika bu bibadi kipikwa kya lulangwilo. Kunyima, Yesu batushishe kileshesho kya ungi Mufadisee badi emono bu mululame badi na kipikwa kya kuteka shi: “Ob’Efile Mukulu ande, nakutumbula bu byanshii bu bangi bantu . . . n’eshidikaa misuusa ibidi ku lubingo.” (Luka 18:11, 12) Mbilombeene kwikala shi, balongi ba Yesu abadi n’abo namu na kyubishi kya kwishidika. Pangi abadi abeshidika mwanda be na kinyongwa kya Yowano e mulukano. Bangi bantu abayipusha bwakinyi balongi ba Yesu t’abeshidikaa, pangi abapwandjikisha shi su bakita byabya, abaleesha kinyongwa kyabo pabitale mwanda ubafwila Yowano.

Yesu nkwibalula ku bukwashi bwa kingi kileshesho shi: “Bayitaminwe ku madyo eebambo mbalombeene kwikala mu maalo, pakii mulunda munkatshi mwabo’nyi? Anka mafuku aafiki aabebata mulund’aabo; paapa ngi p’abashidi [bya kudya].”—Mateo 9:15.

Yowano nabeene bakwile pabitale Yesu bu mulund’ebambo. (Yowano 3:28, 29) Bi mumune, bu bi Yesu kii panka, balongi ba Yesu ta mbalombeene kwishidika nya. Kunyima, apafu Yesu, abekala na kinyongwa na kukutwa nsala. Kadi myanda ayaluluka nsaa y’asanguka! Mu yaaya nsaa, kwishidika t’akwikala dingi na muloo pa mwanda wa kinyongwa nya.

Akupu Yesu nkutuusha bingi bileshesho bibidi akula shi: “Na takwi muntu akulamika kipese kia kilamba kipya ku kilamba kikulu nya, mwanda kiakia kipese akisaana kilaka, na kusanuka akukakila bubi. Tabeela malofu a finyo apya mu misokia ikulu nya; tala misokia yatanyika, na malofu apalakana, na misokia namu yashimina; anka abeela malofu a finyo apya mu misokia yipya, na bioso bibidi abiilameena.” (Mateo 9:16, 17, Kilombeeno kipya 2014) Yesu akyebe kutuusha elango kinyi?

Yesu akwasha balongi ba Yowano Mubatshishi bwabadya kushinguula shi ta kwi muntu sunga ngumune mulombeene kutakula balongi baye bwa shi balonde bipikwa bya beena Yuuda bu kwishidika. Yesu tabadi mufikye bwa kusangisha lulangwilo lupya na lukulu nya sunga kunyingisha lulangwilo lwa kala lubadi lushaale kapeela shi lushimine. Lulangwilo lubadi Yesu munyingishe bantu bwa kulangwila ta nduno lwipusheene na lulangwilo lwa beena Yuuda lwa mafuku na bipikwa bya bantu. Tabadi mukimbe kutela kinyefwa na kilamba kipya pamune sunga kwela nfinyo ipya mu misokya ikulu.