Kulupila mui Yehowa bu bibakitshiine Samesone

1-2. Buakinyi bi buwa tulongie muanda wa Samesone?

P’OPUSHA dino eshina Samesone nkinyi akikufuila mu binangu? Pangi opuandikisha muntu baadi na bukome bui bungi ngofu. Biabia mbia binyi. Anka Samesone batshile bitshibilo bi bubi bibaadi bimukiengieshe ngofu. Sunga mbiabia, Yehowa baadi mutuule binangu nka ku bioso bibaadi Samesone mukite bua kumufubila, na mmufundishe kileshesho kia lulamato luaye mu Bible bua’shi kitukuashe.

² Yehowa baadi mufubishe Samesone bua kulombasha mianda ya kukaanya bua kukuasha muilo waye wa Isaleele ubaadi musangule. Siekele i bungi kunyima kua lufu lua Samesone, Yehowa baadi muyokiele Mpoolo mutumibua buadia kuela eshina dia Samesone mu mulongo wa bantu babaadi na lukumiino lui bungi. (Eb. 11:​32-34) Kileshesho kia Samesone ki kuitunyingisha. Baadi mukulupile mui Yehowa, sunga mu kipungo kibaadi na nkalakashi. Mu uno muisambo, atukesambila kiatudi balombene kulongiela kui Samesone, na mushindo ulombene kuitunyingisha kileshesho kiaye.

SAMESONE BAADI MUKULUPILE MUI YEHOWA

3. Samesone baadi mupete mudimo kinyi?

³ Pa baadi Samesone mutandikue, bena Filistine babaadi abamunu muilo wa Isaleele na kuiwukiengiesha. (Bans. 13:1) Bena Isaleele babaadi abakiengie ngofu muanda wa bena Filistine babaadi ba ntomboshi. Yehowa baadi musangule Samesone buadia ‘kubanga kupaasha bena Isaleele kw’eyasa dya beena-Filistine.’ (Bans. 13:5) Wawa ubaadi mudimo wi bukopo! Bua kukita uno mudimo bibaadi abitungu’shi Samesone akulupile nka mui Yehowa.

4. Yehowa baadi mukuashe Samesone buadia kuifungusha ku maasa a bena Filistine naminyi? (Bansushi 15:​14-16)

⁴ Tubandeyi kutala kileshesho kimune kia mushindo ubaadi Samesone mukulupile mui Yehowa, na bibaadi Efile Mukulu mumukuatshishene. Dingi efuku, basalayi ba bena Filistine babaadi bukume, babafikile bua kukuata Samesone mu kibundi kia Lehi, kibaadi pangi mu Yuda. Bana balume bena Yuda babaadi na moo ukile, ngi abo nkuata kitshibilo kia kumupana ku maasa a beshikuanyi baabo. Muilo wa Samesone ubaadi umuanye mioshi ibidi ipia ya bipaaba, na abo nkumutuala kui bena Filistine. (Bans. 15:​9-13) Biabia, ‘Kikudi kya Yehowa kibamupeele bukome’ ngi Samesone nkutshiba bipaaba. Kunyima, Samesone “bamwene lubangabanga lwa mpunda lubishi ê nkwilusangula nkwipâ” n’alo bena Filistine 1000!—Badika Bansushi 15:​14-16.

5. Samesone baadi muleshe’shi mmukulupile mui Yehowa naminyi p’aye kufubisha lubangabanga lua mpunda?

⁵ Buakinyi Samesone baadi mufubishe lubangabanga lua mpunda? Kibaadi kina ngoshi kishi kilombene muntu kulua naakio, tui kuamba winyi’shi mputu! Kushi mpaka, Samesone baadi muwukie’shi Yehowa amukuasha buadia kutshokola bena Filistine, sunga afubisha kina ngoshi ki naminyi. Eyendo, uno muana mulume sha lulamato, baadi mufubishe kioso kibaadi naakio bua kulombasha kikiebe ki’eshimba dia Yehowa. Samesone baadi muipee baaba bana balume booso ba bena Filistine, muanda baadi mukulupile mui Yehowa!

6. P’atulombasha mudimo mu ndumbuluilo a Yehowa tui kulongiela kinyi kui Samesone?

⁶ Yehowa akumiina kuitupa bukome buatudi naabo lukalo, bua kukita mudimo ooso wawa w’etutekie bua kukita, sunga wamueka bu wi bukopo. Efile Mukulu mmulombene kuitukuasha mu mushindo ulombene kuitukaanyisha. Kulupila’shi Yehowa bapeele Samesone bukome, mmulombene nkukuasha bua kukita kikiebe ki’eshimba Diaye, bu bi’okuete kutungunuka na kukulupila Muadi bua’shi akukuashe.—Nki. 16:3.

7. Nkileshesho kinyi akilesha’shi bi na muulo bua kukimba buludiki bua Yehowa?

⁷ Bakuetu be bungi balume na bakashi mbatuele mu mudimo wa luibako wa teokrasi bua kulesha’shi mbakulupile mui Yehowa. Mu mafuku a kala bakuetu babaadi basole bia kuibaka Mashibo a Bufumu apia na angi mashibo. Biabia muanda wa’shi bantu bakuete kunyiisha kubatshishibua mu ndumbuluilo a Yehowa, abitungu kushintuula ingi mianda. Bakuetu bena mashito bakuete kuteka buludiki bua Yehowa na kutompa mayele apia, bu kuula mashibo na kuialumbuula. Mukuetu Robert, baadi mufube mu bipua bishaale’mu, na bakuetu abafubaa mu mudimo wa kuibaka mu nsenga ishima aamba’shi: “Ku mbangilo ta bibaadi bibofule bua kufubisha ano mayele apia.” Amba dingi’shi: “Kubaadi kuilekeena kukata na bibaatudi atukitshi mu bipua bishaale.” Anka bakuetu babaadi na bukidi bua kuiwubidishena na kuno kushintuluka, babaadi bashinkamishe’shi Yehowa mmuelele kuno kushintuluka muabi. Kino, mpenda kileshesho kimune kia mushindo ukuete Yehowa kukunkusha muilo waye bua kulombasha kikiebe ki’eshimba diaye. ‘Abitungu ku nsaa na nsaa tuikale atuiyipusha atue banabene’shi: Nakimbaa buludiki bua Yehowa, na kuiubidishena na kushintuluka bua kumufubila mu mushindo wi buwa su?’

SAMESONE BAADI MUPETE MIABI KU BIBAADI YEHOWA AMUPA

8. Ungi musuusa pabaadi Samesone mupushe nyota i bukopo bakitshiine kinyi?

⁸ Pangi otentekiesha ingi mianda ya kukaanya ibaadi Samesone mukite. Penda nka na maasa aaye baadi muawule ntambue lubangabanga. Na kunyima nka aye bupenka buaye bayipayile bana balume 30 ba bena Filistine mu kibundi kia Ashikelone. (Bans. 14:​5, 6, 19) Samesone baadi muukie’shi, ta mulombene kukita ino mianda yooso kushi kubukuashi bua Yehowa. Bino bibaadi bimuekie ungi musuusa pabaadi mupushe nyota kunyima kuaye kuipaa bana balume 1000 ba bena Filistine. Bakitshiine kinyi? Pamutue p’aye kuikulupila’shi mmulombene kupeta meema a kutoma, baadi mutekie bukuashi bua Yehowa.—Bans. 15:18.

9. Yehowa baluluile ku luteko lua Samesone naminyi bua kumukuasha? (Bansushi 15:19)

⁹ Yehowa baadi mualuule ku kuidila kua Samesone n’aye nkumukuasha mu kilengeleeshi p’aye kumutuushila ka musulo ka meema. Samesone pa batomene meeme bapushiishe bukome, “mbidi nkumunyinga na aye nkwishinka.” (Badika Bansushi 15:19.) Abimueneka pangi’shi, kano ka musulo ka meema kapia, kabaadi kashaale bipua bi bungi kunyima kua mutemuki Samuele kuyokielua bua kufunda mukanda wa Bansushi. Bena Isaleele babaadi abamono ano meema aalaala, babaadi balombene kutentekiesha’shi be kukulupila mui Yehowa’shi, akuashaa bafubi baaye baasha lulamato nsaa yabadi mu lukalo.

10. Nkinyi akitungu’shi tukite bua kupeta bukuashi bua Yehowa? (Tala dingi kifuatulo.)

¹⁰ N’atue namu tui balombene kukulupila mui Yehowa’shi etukuasha, sunga tuekala na ngobesha i naminyi, binangu bi naminyi, sunga tuekala bapue kulombasha mianda kinyi mu mudimo waye. Abitungu tukumiine na kuiyisha kooso’shi koobesha kua binyibinyi akutuukaa nka nsaa y’atukulupila mui Yehowa. Anka bu bibaadi Samesone munyingishibue pa batomene meema ababamupeele kui Yehowa, n’atue namu atukanyingishibua mu kikudi, p’atudi bidibua bioso biabetupa kui Yehowa biatudi naabio binobino.—Mat. 11:28.

11. Tui kukulupila bukuashi bua Yehowa naminyi, na nkinyi kibaadi kikite ungi mukuetu mulume na ungi mukuetu mukashi?

¹¹ Tutaluuleyi kileshesho kia mukuetu umune, a ku bakuetu ba mu Russie Aleksey munyingiile kubinguabingua kui bukopo. Nkinyi kibaadi kimukuashe buadia kushaala munyingie munkatshi mua kuno kubinguabingua kui bukopo? Aye na mukashi aaye babaadi na kiubishi kia kuibadikilanga Bible efuku dioso, na kukita lulanguilo lua mu kikufo. Amba’shi: “Nekitshishaa bua kuikala na kino kiubishi kia mu kikudi, kia kuilongiela na kuibadikila Bible efuku dioso. Ku nakashika ooso ami na mukashi ande atuisambilaa kifundue kia kuifuku, na kuela luteko kui Yehowa pamune.” Bino abitulongiesha kinyi? Pamutue pa kuikulupila atue banabene, abitungu tukulupile mui Yehowa. Mushindo kinyi? Pa kukita mianda ayinyingisha lukumiino luetu efuku dioso bu: Kuibadikila Bible, kuela nteko, kutuela mu bisangilo, na kuenda mu mudimo wa bulungudi. Dingi, Yehowa aketupa bukuashi buatudi naabo lukalo bua kutungunuka na kumufubila. Yehowa baadi mupe Samesone bukome, kushi mpaka Aketupa namu n’atue bukome.

SAMESONE TA MULEKIE KUKITA KIKIEBE KI’ESHIMBA DIA YEHOWA

12. Nkitshibilo kinyi ki bubi kibaadi Samesone muate, na bino mbilekeene naminyi na mianda ibaadi mukite kumpala?

¹² Samesone baadi mukutue kupuidika nka bu atue, na ingi nsaa baadi aata bitshibilo bi bubi. Kitshibilo kimune ki bubi kibaadi muate kibaadi kituushe masaku e bubi. Kunyima kua Samesone kufuba bu nsushi munda a mafuku e bungi, “bafudile mwana mukashi a mwibanda dya Soleka kifulo, eshina dyê mbu Ndelila.” (Bans. 16:​4, EEM) Kumpala, Samesone baadi akimbi bia kuibakila muana mukashi a bena Filistine, anka dino eyibakishi dibaadi “adifiki kwi Yehowa,” baadi “akimbi pa kumweshêsha bena Filistine malwa.” Kunyima, Samesone bakashaleele mu nshibo ya muana mukashi ndumba a bena Filistine a mu kibundi kia Gaza. Uno musuusa, Efile Mukulu bapeele Samesone bukome bua kutukula kiibi kia kibundi na kuikisemuna, kibundi kibashadile kushi muntu a kuikikaluila. (Bans. 14:​1-4; 16:​1-3) Biabia Dalila baadi nka bu muina Isaleele, eyibakishi diaye na Samesone ta dibadia kupa Samesone mushindo wa kulua na bena Filistine nya.

13. Dalila bakitshiine kinyi kibaadi kifuishiishe Samesone muanda wi bubi?

¹³ Dalila baadi mukumiine makuta e bungi a bena Filistine buadia kualulukila Samesone na kumuluishiisha. Pangi, pa muanda wa’shi baadi mufule Dalila ngofu, ta baadi mutundule kiakiebe kukita nya. Dalila batungunukile nka na kuipusha Samesone bua’shi amulungule akutuukila bukome buaye, ku nfudiilo a bioso Samesone bamulunguile. Bi malua, muanda kitshibilo kia Samesone kibaadi kimushimishishe bukome bubaadi naabo, na kukuminyibua kubaadi mukuminyibue na Yehowa mu yaya nsaa.—Bans. 16:​16-20.

14. Nkinyi kibaadi kikitshikile Samesone muanda baadi mukulupile Dalila?

¹⁴ Samesone bapetele makienga e bungi pa muanda wa kukulupila Dalila, pamutue a kululupila Yehowa. Bena Filistine babakuatshile Samesone bamutula mpaa na meeso, babamuelele mu lukano mu kibundi kia Gaza, mubaadi mutukule biibi bia ku kibelo kia kibundi kumpala. Na bantu nkumutuula bu kintu kia kuasha nakio. Na dingi bena Filistine babatuadile Samesone ku musangeelo wabo bua’shi bamusengie. Babaadi batuushe milambu ibungi bua efile aabo a madimi Dagona, muanda babaadi abakulupila’shi nnaaye bebakuasha buabadia kukuata Samesone. Babatushiishe Samesone mu lukano bamutuala ku mbalo yabo ya mu musangeelo, bua’shi “ebasangashe,” babangie kumusepa.—Bans. 16:​21-25.

15. Samesone baadi muleshe dingi naminyi’shi mmulukulupile mui Yehowa? (Bansushi 16:​28-30) (Tala kifuatulo ki ku kipusu.)

¹⁵ Samesone baadi mukite bilubilo bi bungi, anka baadi mutungunukie na kufubila Yehowa. Baadi mukimbe mushindo wa kulombasha mudimo ubaabadi bamupe kui Efile Mukulu wa kulua na bena Filistine. (Badika Bansushi 16:​28-30.) Samesone batekiele Yehowa’shi: “Mpe namu’nka uno musûsa bukome bwandja kobola ngo musûsa umune kwi bena Filistine.” Efile Mukulu a binyibinyi baadi mualuule ku luteko lua Samesone, na aye nkumualuisha bukome buaye bua kilengieleshi. Bu bibaapetele buno bukome Samesone baadi muipee bena Filistine be bungi uno musuusa kukila bibaadi muibepee kumpala.

16. Nkinyi kiatudi balombene kulongiela ku bilubilo bia Samesone?

¹⁶ Sunga mbibaadi Samesone mukiengie ngofu bua bilubilo biaye bi bubi, ta baadi mulekie kuikitshisha bua kukita kikiebe ki’eshimba dia Yehowa. Sunga tuakita bilubilo, betutopeka, kushimisha mashito eetu, t’abitungu tulekie kufubila Yehowa nya. Tentekiesha’shi Yehowa e kudi bua kuitufuila lusa. (Mis. 103:​8-10) Sunga tuekala na bilubilo, Yehowa mmulombene kuitupa bukome bua kukita kikiebe ki’eshimba diaye, nka bu bibaadi mupe namu Samesone.

17-18. Kileshesho kia Michael ki nkukankamika naminyi? (Tala dingi kifuatulo.)

¹⁷ Tutaluuleyi kileshesho kia Michael mukuetu mulume ki nsongua. Baadi na bi bungi bia kukita mu mudimo wa teokrasi. Baadi afubu bu mufubi a midimo na bu mbala-mashinda a mieshi yooso. Bi malua, muanda baadi mukite kilubilo na aye nkushimisha mashito aaye ooso a mu kakongie. P’atentekiesha uno muanda amba’shi: “Naadi n’ende kumpala na naadi na bi bungi bia kukita mu mudimo wa Yehowa. Musuusa nka umune naadi mupushe’shi, nsthi bia kukita kintu su nkimune mu mudimo wa Yehowa. Kashaa nta mpetele binangu bia’shi Yehowa mmulombene kunsumbushena nya. Anka n’eyipushaa su kipuano kiande’mi naaye nkilombene kuikala bu bibaakidi kumpala, na su ne mulombene kupeta mushindo wa kumufubila mu kakongie kalolo, muyile ngobesha yande bu binaadi nebikitshi kumpala.”

¹⁸ Muanda wi na muulo, Michael ta mulekie kufubila Yehowa. Amba dingi’shi: “Naadi mutuule kinangu kiande nka mu kulumbuula kipuano kiande na Yehowa nsaa yooso, pa kumufunguila eshimba diande mu luteko, kuilongiela, na kunangushena.” Kunyima kua mafuku, Michael baadi mupetuule mashito e buwa mu kakongie. Binobino kuete kufuba bu mukulu na bu mbala-mashinda a mieshi yooso. Amba dingi’shi: “Bukuashi na kunyingishibua kunaadi mupete, bikishekishe abukatukila kui bakulu, kubaadi kunkuashe bua kumona’shi Yehowa ki’atungunuka nka na ku nfula. Nkuete kufuba dingi mu kakongie na kondo k’eshimba katookie. Uno muanda ngundongieshe’shi, Yehowa akafuila muntu ooso elanga kuishimba mu binyibinyi lusa.” Tui balombene kushinkamisha’shi Yehowa aketufubisha na kuituelela miabi sunga tuekala bapue kukita bilubilo, nka su tubatungunuka na kukita kioso akitungu bua kuilanga kuishimba ku bilubilo bietu, na kutungunuka na kumukulupila.—Mis. 86:5; Nki. 28:13.

19. Kileshesho kia Samesone kibakunyingisha naminyi?

¹⁹ Mu uno muisambo, tubakatuka mu kumona mianda ipeela ya ku mianda ikata ya mu nshalelo a Samesone. Ta baadi mupuidikie nya, na ta mulekie kuikitshisha bua kufubila Yehowa nya, sunga kunyima kua kukita kilubilo na Dalila. Yehowa baadi mutungunukie nka na kufubisha Samesone. Efile Mukulu baadi mufubishe dingi Samesone mu mushindo wa kukaanya. Yehowa baadi mutungunukie na kumumona bu muntu sha lukumiino luibukopo, na aye nkufundisha eshina diaye mu mulongo wa bantu baasha lukumiino batusangana mu Bena Ebelu 11. Abitunyingisha pa kuuka’shi tukuete kufubila uno Nshetu e bino sha kifulo e muiyilu akumiina kuitunyingisha bikishekishe nsaa yatudi babofule! Anka bu Samesone, tuisendeele Yehowa’shi: “Mwanana Yehowa, ntentekyeshe, ompe bukome.”—Bans. 16:28.