Nkinyi kiatudi balombene kulongiela ku mikanda ibidi ya Mpiele?

1. Mafuku apeela kumpala kua’shi Mpiele mutumibua afue, Yehowa baadi mumufubishe buadia kukita kinyi?

MPIELE mutumibua baadi muukie’shi taadi peepi na kufua. Munda a bipua bioso biadi mufube na lulamato, baadi mutambukie pamune na Yesu, na baadi mufube afungula ma terituare apia a kulungula mukandu wibuwa na kufuba bu muina kasaka ka bakunkushi-bakulu. Kadi mudimo wa Mpiele ta ubaadi ulombane ooso nya. Mu bipua 62-64, bino bipungo bietu (B.B.), Yehowa baadi muyokiele Mpiele mutumibua buadia kufunda mikanda ibidi ya mu Bible—1 Mpiele na 2 Mpiele. Mpiele baadi mukulupile’shi ino mikanda ayikuasha bena Nkidishitu kunyima kuaye kufua.—2Mp. 1:​12-15.

2. Buakinyi mikanda ya Mpiele baadi muiyifunde pa nsaa ilombane?

² Mpiele bafundile mikanda yaye iyokielue mu kipungo kibaadi bena Nkidishitu naye “benyongole muanda wa makienga elekeenelekeene.” (1Mp. 1:6) Bantu be bubi, babaadi abatompo kutuesha malongiesha a madimi na muikeelo wi butete mu kakongie. (2Mp. 2:​1, 2, 14) Bena Nkidishitu babaadi bashaale mu Yelusalema, babaadi peepi na kumona “Nfudiilo a bintu bioso,” Kuamba’shi kubutula kiakia kibundi na ndumbuluilo a mianda a bena Yuda kui basalayi ba bena Loma. (1Mp. 4:7) Kushi mpaka, mikanda ya Mpiele ibaadi ikuashe bena Nkidishitu bua kumona kiabadia kukita bua kunyingila bitompuanga bi kuanka na bua kuilumbuula bua bitompuanga bia mu mafuku aafiki.b

3. Buakinyi abitungu tulongie mikanda ya Mpiele iyokielue?

³ Mpiele baadi mufunde mikanda yaye bua bena Nkidishitu ba mu siekele a kumpala. Yehowa baadi mufundishe ino mikanda Muiyi diaye. N’atue namu ino mikanda i kuitukuasha lelo uno. (Lom. 15:4) Anka bu bano bena Nkidishitu, n’atue namu tui bashaale mu nsenga yuule na ino mikeelo i butete. Tui kufumankana na bitompuanga bilombene kuitukutshishua mpa na kufubila Yehowa. Mu mafuku e kumpala’ku, atukamono mpombo ikata ikile nfudiilo a ndumbuluilo a mianda a bena Yuda. Atupete ingi mianda i na muulo mu mikanda ibidi ya Mpiele. Bino abitukuasha bua kutungunuka na kutengiela efuku dia Yehowa, kukambila moo wa bantu, na kuikala na kifulo ki bukopo ku muntu na muntu. Ino mianda i na muulo ngilombene kukuasha bakulu buabadia kumona bia kukuasha bakuabo balume na bakashi ba mu kakongie buabadia kushala banyingie.

TUNGUNUKA NA KUTENGIELA

4. Nka bu bi’abebilesha mu 2 Mpiele 3:​3, 4, Nkinyi kilombene kubofusha lukumiino luetu?

⁴ Tui befunyishue na bantu bashii na lukumiino mu matemuki a mu Bible. Beshikuanyi netu abetusepaa atue muanda tuibakule munda a bipua bi bungi’shi nfudiilo ayifiki. Bangi bantu abakula’shi nfudiilo ta yanafikie. (Badika 2 Mpiele 3:​3, 4.) Su tuapusha muntu atulungula mukandu wibuwa, muina mudimo netu, sunga muina kifuko netu akula bino, lukumiino luetu lui kubofula. Mpiele baadi mupatuule kilombene kuitukuasha.

5. Nkinyi akiketukuasha bua kutungunuka na kutengiela nfudiilo a uno ndumbuluilo na luishinko? (2 Mpiele 3:​8, 9)

⁵ Bangi be kumona’shi Yehowa e na lotoolo lua kufuisha nfudiilo a uno ndumbuluilo e bubi. Mayi a Mpiele e kuitukuasha, muanda aetutenkiesha’shi mmueneno a Yehowa pabitale bipungo mmuilekeene ngofu na eetu. (Badika 2 Mpiele 3:​8, 9.) Muanda bua Yehowa, bipua kinunu bi nka bu efuku dimune. Yehowa e na luishinko lukata, na t’akumiina’shi muntu su ngumune abutudibue. Apakafiki efuku diaye, uno ndumbuluilo a mianda akabutudibua. Tui na kineemo kikata kia kufubishua kino kipungo kietu bua kulungula bantu ba miilo yoso mukandu wibuwa.

6. Tui balombene “kutula mu binangu” kuikala kua kuanka kua Efuku dia Yehowa naminyi? (2 Mpiele 3:​11, 12)

⁶ Mpiele etunyingisha bua kutungunuka na “Kutula mu binangu” efuku dia Yehowa. (Badika 2 Mpiele 3:​11, 12.) Tui kuibikita naminyi? Atukitshi bino pa kutompa kunangushena, efuku dioso, pabitale nshalelo e buwa atukekala naye mu nsenga ipia. Banda kunangushena obe nabene kapapi ke buwa ka tukekala nako, kudia bidibua bi buwa, kukuukila bena kifuko na ba kuuku betu babafuile abakasanguka, na kulongiesha bantu babafuile takudi siekele i bungi kulombana kua matemuki a mu Bible. P’onangushena ku ino mianda yooso, ayikukuasha bodia kutengiela na ki sukusuku kioso kiakia kipungo. Na kuikala mushinkamishe’shi nfudiilo ayifiki binobino. “Bu biatudi bapue kuuka ino mianda kumpala” pabitale mafuku aafiki, ‘abitungu tuilame’ ku malongiesha a madimi.—2Mp. 3:17.

KAMBILA MOO WA BANTU

7. Moo wa bantu wi kuikala na bukitshishi kinyi kuatudi?

⁷ Su tua tungunuka na kutuula efuku dia Yehowa mu binangu, abitutakula bua kulungula bangi mukandu wibuwa. Mu ingi mianda tui kuikala na kuikoka bua kulungula mukandu wibuwa. Buakinyi? Muanda tui kupeta moo wa bantu munda a kapindi kapeela. Bino bibakitshikiile Mpiele. Bufuku pabaadi Yesu akiengie, Mpiele baadi mupele kuilesha bu umune a ku balongi ba Yesu na aye nkupela misuusa isatu’shi t’amuuku. (Mat. 26:​69-75) Anka kunyima Mpiele baadi mukambile moo waye na aye kufunda’shi: “Biabia, tanutshinanga kiakia kiabatshinyi, sunga kuikalakasha.” (1Mp. 3:14) Mayi a Mpiele aetushinkamisha’shi n’atue namu tui kukambila moo wa bantu.

8. Nkinyi ki bia kuitukuasha bua kukambila moo wa bantu? (1 Mpiele 3:15)

⁸ Nkinyi kilombene kuitukuasha bua kukambila moo wa bantu? Mpiele etulungula’shi: “Ikashayi Nkidishitu bu Muanana mu mashimba enu.” (Badika 1 Mpiele 3:15.) Kukita bino nkutale kunangushena pabitale muasu na matalua adi nawo a bu Muanana na Nfumuetu Yesu Nkidishitu. Su opusha’shi we mukalakashue sunga’shi we na moo nsaa y’opete mushindo wa kulungula bangi mukandu wibuwa, tentekiesha Nfumuetu. Nangushena bia kuete kumunana muiyilu mmuifunyishue na bisaka bia ba mikeyilu. Tentekiesha’shi Yesu e na: “Matalua . . . muiyilu na pa nsenga” na’shi akekala ‘netu mafuku oso mpa na ku nfudiilo kua uno ndumbuluilo a mianda.’ (Mat. 28:​18-20) Mpiele etulungula buatudia kuikala “belumbuule nsaa yoso” bua kukaluila lukumiino luetu. Okumiinaa namu kulungula mukandu wibuwa ku mudimo, ku kalaasa, sunga mu ingi mbalo su? Nangushena kumpala pabitale nsaa yodi mulombene kukita bino, na w’elumbuule kumpala bua kiodi mulombene nkaakula. Teka bua kupeta eshimba dinyingie, na okulupile’shi Yehowa akakukuasha bodia kukambila moo wa bantu.—Bik. 4:29.

“NUIFULENE NGOFU”

9. Ungi musuusa Mpiele baadi mukutue kulesha kifulo naminyi? (Tala dingi kifuatulo.)

⁹ Mpiele baadi mulongie mushindo wa kulesha kifulo. Baadi panka nsaa ibakuile Yesu’shi: “Nenupa muiya upia wa’shi nuifulene; nka bu biandi muinufule, n’anue namu nuifulene.” (Yo. 13:34) Kunyima, Mpiele baadi mupele kudia na bakuabo balume na bakashi bashii bena Yuda muanda baadi atshiinyi bakuetu bena Yuda. Mpoolo mutumibua bayitanyine bino bibakitshine Mpiele’shi: “Bunsesa,” sunga bu bulamalama. (Nga. 2:​11-14) Mpiele baadi mukumiine bino bibaabadi bamutopekie, na aye nkulongiela ku kilubilo kiaye. Mu ino mikanda yaye yoso ibidi, Mpiele baadi mushimikie kasele’shi, t’abitungu penda’shi tupushe kifulo bua bakuetu balume na bakashi nya, anka abitungu dingi kuibalesha kianka.

10. “Kifulo kia bakuetu kishi na bunsesa” nkipeta kia kinyi? Patuula. (1 Mpiele 1:22)

¹⁰ Mpiele akula’shi abitungu tuikale “na kifulo kia bakuetu kishi na bunsesa.” (Badika 1 Mpiele 1:22.) Kino kifulo ki bino, nyi mbipeta bia “kukookiela kua binyibinyi” biatudi balongie. Mu bino bia binyibinyi, mui dilongiesha dia’shi: “Efile Mukulu te na ntondo.” (Bik. 10:​34, 35) Ta tui balombene kukookiela uno muiya wa Yesu pabitale kifulo su t’atuikilesha bangi bantu mu kakongie. Tui kuikala mu kipuano na bangi kukila bangi, nka bu bibakitshine Yesu. (Yo. 13:23; 20:2) Anka Mpiele etutentekiesha’shi abitungu tuikitshishe bua “bakuetu balume na bakashi boso” muanda be mu kifuko kietu kia mu kikudi.—1​Mp. 2:17.

11. Kufula bangi “kifulo kikata akitukila kuishimba” akupushisha kinyi?

¹¹ Mpiele etunyingisha’shi “efuleneyi bu bana na bana na kifulo kikata akituukila muishimba.” Mu uno muanda, kufula “bikata” akulesha kufula muntu kampanda sunga biekala bukopo bua kumulesha kifulo. Bu kileshesho, bi kuikala naminyi su mukuetu etuluishisha sunga kuitutapa kuishimba mu mushindo kampanda? Kia kumpala, abitungu tumukitshine mianda mu mushindo watukumiina’shi betukitshine namu kushii penda kulesha kifulo. Ngi buakinyi, Mpiele baadi mulongiele kui Yesu’shi mushikua ta ngulombene kusankisha Efile Mukulu. (Yo. 18:​10, 11) Mpiele bafundile’shi: “Tanualuishanga muntu bubi ku bubi sunga mulomo ku mulomo. Anka, nuibatekiele miabi.” (1Mp. 3:9) Tadiila kifulo kikutakule bodia kuikala na kalolo, na kuata baaba boso abakutapa kuishimba na muulo.

12. (a) Kifulo kikata akiketutakula dingi bua kukita kinyi? (b) Abitungu w’ekitshishe bua kukita kinyi bu abibilesha video aamba’shi: Préservons l’unité, un cadeau précieux.

¹² Mu mukanda waye wa kumpala, Mpiele mmufubishe kino kishima akiamba’shi: “Kifulo kikata.” Kino kifulo t’akibuikilaa penda tu miluisho tupeela nya, kadi “akibuikilaa miluisho i bungi.” (1​Mp. 4:8) Pangi Mpiele atentekiesha dilongiesha pabitale kufuilana lusa dibabadi bamulongieshe kui Yesu bipua bi bungi kumpala. Mu aa mafuku mpiele baadi emono’shi mmuntu e buwa, nsaa ibaadi ayitungu’shi afuile mukuabo lusa “mpa na ku misusa musambo?” Kadi Yesu bamulongieshe, etulongieshanyi n’atue’shi abitungu kufuila muntu lusa “mpa na ku misusa 77,” kuamba’shi kushii kubadika. (Mat. 18:​21, 22) Su omana’shi bi bukopo bua kutumikila dino elango, totshobolokanga! Bafubi boso ba Yehowa bashi bapuidikie ingi nsaa abomonaa’shi bi bukopo kufuilana lusa. Nkintu ki na muulo binobino koodi, nkukita kioso akitungu bua kufuila mukuenu lusa na kuikala naye mu butaale.c

BAKULU LAMAYI MIKOOKO YA YEHOWA KALOLO

13. Ndukalakashi kinyi lulombene kukutshishua bakulu nsaa ya kunyingisha bakuabo balume na bakashi?

¹³ Kushii mpaka, Mpiele tabaadi muiluankane bi baabadi bamulungule kui Yesu kunyima kuaye kusanguka’shi: “Lama mikooko yande yaana.” (Yo. 21:16) Su we mukulu, uuka’shi ano malango oso ngakutale. Mbilombene kuikala lukalakashi bua’shi mukulu apete nsaa ya kupasukila mudimo wi na muulo wabadi bamupe. Kia kumpala, abitungu apasukile nkalo ya kifuko kiaye ya ku mbidi, ya mu binangu, na ya mu kikudi. Bakulu mbalombene dingi kukunkusha mudimo wa bulungudi kalolo, kulumbuula na kukita miisambo mu bisangilo, ku bikongeno bia kifunda, na bia mafuku asatu. Bangi bakulu be na mashito a kuikala mu komite a kuisamba na bamunganga, sunga kukumiina midimo ya mu departema atalaa midimo wa luibako muiwumbo. Mu binyibinyi, bakulu be na bi bungi bia kukita!

14. Nkinyi kilombene kutakula bakulu bua kulama mikooko? (1 Mpiele 5:​1-4)

¹⁴ Mpiele alungula bakulu naye’shi: “Kunkushayi mikooko y’Efile Mukulu.” (Badika 1 Mpiele 5:​1-4.) Su we mukulu, atuuku’shi we mufule bakuenu balume na bakashi na okumiina kui balama. Biabia ingi nsaa we kupusha’shi, we na bi bungi bia kukita, sunga’shi we mukookie tue bia kulombasha uno mudimo. We kukita naminyi? Lungula Yehowa mianda ayikukalasha. Mpiele bafundile’shi: “Su muntu kuete kukuasha bangi, ebikite bu’ye akulupila bukome abutuusha Efile Mukulu.” (1 Mp. 4:11) Bakuetu balume na bakashi be kufumankana na nkalakashi ya bashii balombene kupua yoso mu uno ndumbuluilo a mianda. Uuka’shi: “Mulami mukata,” Yesu Nkidishitu mmulombene kuibakuasha kukila biodi mulombene kukita. E kukita biabia mu ano mafuku etu mpaa na mu nsenga ipia. Akitungu’shi bakulu bakite, nyi nkufula bakuabo, kui balama na kuikala “bileshesho kui mikooko.”

15. Ungi mukulu baadi mulame mikooko naminyi? (Tala dingi kifuatulo.)

¹⁵ William mupue kufuba bu mukulu munda a bipua bi bungi, bapushishe bi muulo wa kulama mikooko. Pa babangile kipupa kia COVID-19, aye na bakulu naaye, babaadi baate uno mudimo na muulo pa kuitanyina muntu ooso e mu kasaka ka mudimo wa bulungudi lubingo looso. Apatuula buakinyi: “Bakuabo be bungi be bupenka ku mashibo, be kunangushena bi bubi musuusa umune.” Nsaa ibaadi bakuabo bena Nkidishitu abekitshisha bua kumupatuluila mianda yabo, William baadi ebateemesha na kalolo kooso bua kuuka nkalo yabo na mianda ayibakalakasha. Baadi ekitshisha bua kupeta mikanda kampanda sunga ma video e mu site eetu aadi mulombene kufubisha bua kunyingisha bakuetu balume na bakashi. Amba’shi: “Mudimo wa kulama mikooko, wi na muulo binobino kukila kumpala. Bua kukuasha bantu buabadia kulonga pabitale Yehowa, abitungu tuikitshishe ngofu bua kulama mikooko, na kuiyikuasha buayidia kushala mu bia binyibinyi.”

TADILAYI YEHOWA AFUDISHE KULONGIESHIBUA KUENU

16. Mu mishindo kinyi muatudi balombene kutumikila malongiesha abatulongo mu mikanda ya Mpiele?

¹⁶ Tubesambila penda ndambo ipeela ya malongiesha aatukila mu mikanda ibidi iyokielue ya Mpiele. Pangi bomono muanda kampanda aatungu’shi olumbuule mu nshalelo oobe. Bu kileshesho, we kuikala onangushena ngofu efuku dioso pabitale miabi y’okapete mu nsenga ipia su? We muiatshile namu kepatshila ka kulungula mukandu wibuwa ku kalaasa, ku mudimo sunga apamueka mushindo su? Bomono mishindo yodi mulombene kulesha bakuenu balume na bakashi kifulo kikata su? Bakulu, nui na kitshibilo kia kulama mikooko ya Yehowa mu kukumiina kuenu na muloo su? Biabia, etaluule obe nabene na kalolo kooso, otale su we na mbalo ayitungu kulumbuula, anka totshobolokanga. “Muanana ebuwa,” na akakukuasha bodia kulumbuula mbalo ayitungu. (1​Mp. 2:3) Mpiele etushinkamisha’shi: “Efile Mukulu . . . akapudisha aye nabene kulongieshibua kuenu. Akenukankamika, enunyingishe, na kuinuikasha bashi bia kusanyishua.”—1​Mp. 5:10.

17. Su tubatungunuka na kufubila Yehowa na lulamato, na kukumiina’shi etulongieshe atukapete kinyi?

¹⁷ Bua musuusa wa kumpala, Mpiele b’epushishe’shi ta mulombene kufuba na Nkidishitu. (Luk. 5:8) Anka ku bukuashi bua kifulo kia Yehowa na Yesu, Mpiele baadi mulonde Yesu na lulamato looso. Yehowa baadi mukumiine’shi: “Mpiele atuele mu Bufumu bua loso bua Nfumuetu na Mupaashi Yesu Nkidishitu.” (2​Mp. 1:11) Dibaadi efuto di buwa bukile! Su botungunuka na kufubila Yehowa na lulamato looso bu bibakitshine Mpiele, na kukumiina’shi Yehowa akulongieshe, noobe namu okapete efuto dia muwa wa ikalaika. Su nubakitshi biabia, anukalombasha “kepatshila ka lukumiino luenu, kupashibua kuenu.”—1​Mp. 1:9.