Ikala muilumbuule bu’Efuku dia Yehowa

1. Abitungu tukite kinyi bua kupanda kuifuku dia Yehowa?

NSAA ayakula Bible bua “efuku dia Yehowa,” alesha kipungo ki’abakatshibila beshikuanyi kiimu kui Yehowa, na kufuisha kipandilo kui muilo waye. Kala, Yehowa baadi mutshibile ingi miilo kiimu. (Yesh. 13:1, 6; Es. 13:5; Sef. 1:8) Mu kino kipungo kietu, “efuku dia Yehowa” adikabanga na kubutula kua Babilone Mukata na ku ngoshi ikata ya Armagedone. Bua kupanda ku diadia “efuku,” abitungu tuilumbuule kubanga binobino. Yesu balongieshe’shi t’abitungu tuilumbuule nka penda bua “mpombo ikata” nya, kadi “tushaale belumbuule” bua diadia efuku.​—Mat. 24:21; Luk. 12:40.

2. Buakinyi mukanda wa 1 Bena Tesalonike ngulombene kuitukuasha?

² Mu mukanda waye wa kumpala uyokielue kui Bena Tesalonike, Mpoolo mutumibua baadi mufubishe bileshesho bi bungi bua kukuasha bena Nkidishitu bua’shi bashaale belumbuule bu’efuku dikata dia kiimu kia Yehowa. Mpoolo baadi muukie’shi efuku dia Yehowa adikafiki nka pa nsaa ilombane. (2 Te. 2:1-3) Baadi mutungunukie na kulungula bakuabo bua’shi beluumbule bua diadia efuku nka bu’shi adifiki malooba, n’atue namu abitungu tutumikile elango diaye. Biabia, tutaluuleyi bibaadi mupatuule pabitale ino mianda ayilondo: (1) mushindo aufiki efuku dia Yehowa, (2) bantu bash’abakapanda ku diadia efuku, na (3) biatudi balombene kuilumbuula buatudia kupanda.

EFUKU DIA YEHOWA ADIKAFIKI MUSHINDO KINYI?

3. Efuku dia Yehowa adikafiki munkatshi a bufuku bu ngifi mushindo kinyi? (Tala dingi kifuatulo.)

³ “Nka bu abifikaa ngifi bufuku.” (1 Te. 5:2) Kino ngi kileshesho kia kumpala kia ku bileshesho bisatu biabadi bafubishe bua kulesha mushindo aukafiki efuku dia Yehowa. Ngifi akitaa mianda bukidi bukidi na afikaa munkatshi a bufuku nsaa yabash’abelela binangu. Efuku dia Yehowa adikafiki n’adio mu kimpulunkamba bua kupasusha bantu be bungi. Mpaa na bena Nkidishitu ba binyibinyi mbalombene kupasuka bua lubilo alukitshika yaya mianda. Anka mu kuilekeena na bantomboshi, t’atukenyongola pa muanda wa kuluishibua ku’abakaluishibua nya.

4. Efuku dia Yehowa di bu mitanyo ya kutanda mushindo kinyi?

⁴ “Nka bu mitanyo ayipushaa mukashi e n’eyimi pa kutanda.” (1 Te. 5:3) Mukashi e n’eyimi ta mmulombene kuuka nsaa ilombane y’akatanda nya, anka te na mpaka ya’shi t’akatanda nya. Su bi biabia, kutanda akufiki mu kimpulunkamba kui na mitanyo, na ta mmulombene kuikuimika nya. Mu mushindo umune, t’atuuku efuku sunga nsaa ayikabanga efuku dia Yehowa nya. Atue tui bashinkamishe’shi efuku dia Yehowa dikuete kufika, na’shi kiimu ki’Efile Mukulu bua bantu babi akikekala mu kabasamushi, na ta kui muntu a kuidimika.

5. Mpombo ikata i bu pa kutooka kua bufuku mushindo kinyi?

⁵ Nka bu pa kutooka kua bufuku. Mu kileshesho kia kasatu kia Mpoolo mutumibua, ateemuna dingi kileshesho kia ngifi ayibi bufuku. Biabia, Mpoolo ashintuula mmueneno aaye abimueneka’shi apuandikisha efuku dia Yehowa na pa kutooka kua bufuku. (1 Te. 5:4) Bangifi p’abafiki mu kuiba bufuku, abepaanaa ngofu bua’shi bantu ta bauukanga nsaa y’abafiki. Etaata dia pa kutooka kua bufuku ndilombene kuibamunyika na kuibatusha patooka. Mu mushindo umune, mpombo ikata ayikatuusha baaba booso be bu bangifi patooka, na abashaala mu mufito abayididiila na kukita mianda ish’ayisankisha Efile Mukulu. Mu kuilekeena na bantu babi, abitungu tuilumbuule na kuleka kukita mianda ish’ayisankisha Yehowa, na kutungunuka na kulonda “buwa bua mishindo yoso na kululama na binyibinyi.” (Ef. 5:8-12) Mpoolo afubisha dingi bileshesho bibidi, bua kulesha baaba booso bash’abakapanda.

MBANTU KINYI BASH’ABAKAPANDA KUIFUKU DIA YEHOWA?

6. Bantu be bungi mbalaale mu tulo tua mushindo kinyi? (1 Bena Tesalonike 5:6, 7)

⁶ “Baaba abalalaa.” (Badika 1 Bena Tesalonike 5:6, 7.) Mpoolo apuandikisha baaba booso bash’abakapanda kuifuku dia Yehowa na bantu balaale. Muanda pabadi balaale t’abauku mianda ikuete kukitshika paapa pabadi sunga abikidi nsaa nya. T’abauku kunangushena ku muanda wi na muulo aukitshika buabua bufuku, na kiabadia kukita nya. Bantu be bungi lelo uno, mbalaale mu tulo tua mu kikudi. (Lom. 11:8) T’abakumiina mianda yooso ikuete kukitshika ayilesha’shi tui “mafuku a ku nfudiilo” na’shi mpombo ikata tayidi peepi. Mianda ikata ikuete kukitshika mu nsenga lelo uno, ngilombene kubuusha bangi mu tulo tua mu kikudi na kuibatakula buabadia kuteemesha mukandu wetu wa Bufumu. Anka be bungi, bakuete kupela kushaala bapasukie, abaaluka nka mu kulaala mu tulo tua mu kikudi. Bi malua muanda mpaa na baaba bakumiine’shi efuku dia Yehowa dikuete kufika, abanangushena’shi diki kula. (2 Mp. 3:3, 4) Biabia, bi na muulo buatudia kushaala bapasukie efuku dioso.

7. Bantu abakabutudibua n’Efile Mukulu be bu bantu bakolue mushindo kinyi?

⁷ “Baaba abakoluaa.” Mutumibua apuandikisha bano bantu abakabutudibua n’Efile Mukulu na bantu bakolue. Bantu bakolue abekalaa na lotoolo lua kualuula ku mianda ayikitshika paapa pabadi, na t’abaataa bitshibilo bi buwa nya. Mu mushindo umune, t’abakumiinaa p’abebadimusha kui Efile Mukulu nya. Abaataa bitshibilo nka abibakunkusha ku kabutu. Anka abitungu bena Nkidishitu bekale na binangu na abanangushena kalolo. (1 Te. 5:6) Ungi muntu mulongie mianda ya mu Bible, alesha kunangushena kalolo bu kuikala na “butaale bua mu binangu na bashimate, na kutaluula mianda i buwa ilombene kuitukuasha bua kuata bitshibilo bi buwa.” Buakinyi abitungu tulame butaale na kuikala bashimate? Biabia, t’atutuelakanaa mu mianda ya politike i kano kabidi ya ino nsenga nya. Bu abinyiisha kuifubuila efuku dia Yehowa peepi, bantu namu bakuete kunyiisha kuitutakula bua’shi tutuelakane mu yaya mianda yabo. Kadi t’abitungu’shi tuikalakashe bua kiatudi balombene kukita nya. Kikudi ki’Efile Mukulu nkilombene kuitukuasha buatudia kulama butaale na kushaala bashimate mu binangu na kuata bitshibilo bi buwa.​—Luk. 12:11, 12.

TUI KUKITA KINYI BUA KUILUMBUULA BU’EFUKU DIA YEHOWA?

8. Mukanda wa 1 Bena Tesalonike 5:8, aulesha ngikashi kinyi i bia kuitukuasha bua kushaala bapasukie na kulama binangu bietu (Tala dingi kifuatulo.)

⁸ “Tufuale ngabo ya pa kiadi . . . na . . . kifulu.” Mpoolo etupuandikisha na basalayi babadi badimushe na batudibue ku mulongo wa ngoshi. (Badika 1 Bena Tesalonike 5:8.) Bantu abakumiinaa’shi musalayi ekale muilumbuule bua kulua ngoshi nsaa yooso y’ayimueneka. Bi mumune n’atue. Atushaala belumbuule bu’efuku dia Yehowa pa kufuala ngabo ya pa kiadi ya lukumiino na kifulo, na kufuala lukulupilo lua kipandilo bu kifulu. Ino ngikashi i kuitukuasha ngofu.

9. Lukumiino luetu lui kuitukaluila naminyi?

⁹ Ngabo ayikaluilaa eshimba dia musalayi. Lukumiino na kifulo namu abikaluilaa eshimba dietu dia mu kinfuanyi. Abitukuasha buatudia kutungunuka na kufubila Efile Mukulu na kulonda Yesu. Lukumiino aluitushinkamiisha’shi Yehowa aketupa efuto bua bi’atumukimbi n’eshimba dietu dioso. (Eb. 11:6) Abitutakula buatudia kushaala na lulamato kui Mukunkushi eetu Yesu, sunga mbiatukuete kunyingiila nkalakashi i bukopo. Tui kunyingisha lukumiino luetu nsaa y’atunyingiila nkalakashi, pa kulongiela ku bileshesho bia bantu ba ano eetu mafuku balame lulamato luabo sunga mbiabakuete kubinguabingua na kupeta nkalakashi ya kukutua makuta. Dingi abitungu tudimukile muteo wa kukumiina bintu bia ku mbidi pa kuambula baaba bapeelepeshe nshalelo aabo bua kukumiina kutuula Bufumu pa mbalo ya kumpala.b

10. Kifulo bu’Efile Mukulu na kifulo bua bankungishanyi netu akitukuasha bua kunyingiila naminyi?

¹⁰ Kifulo ki na muulo bua kushaala bapasukie na kutungunuka na kulama binangu bietu. (Mat. 22:37-39) Kifulo bu’Efile Mukulu ki kuitukuasha bua kunyingiila nkalakashi yooso yatudi balombene kufumankana nayo mu mudimo wa bulungudi. (2 Ti. 1:7, 8) Bu bi kifulo kietu akiende na kutama mpaa na kui bashi balanguidi netu, atutungunuka na kulungula mukandu wibuwa na kufuba ngofu mu terituare eetu, sunga bi’ateka kukita bulungudi ku telefone sunga bua kufunda mikanda. Ta tushimishanga lukulupilo’shi dingi efuku bankungishanyi netu abakashintuluka na kukita mianda i buwa.​—Es. 18:27, 28.

11. Kifulo bua bakuetu balume na bakashi akitukuasha naminyi? (1 Bena Tesalonike 5:11)

¹¹ Kifulo bua bankungishanyi netu akilesha dingi kifulo bua bakuetu balume na bakashi. Atulesha kino kifulo pa “kuikankamishena na kuinyingishena.” (Badika 1 Bena Tesalonike 5:11.) Nka abitumikaa basalayi epampa ku’epampa mu ngoshi, n’atue namu tuinyingisheneyi. Musalayi mmulombene kusakula mukuabo nsaa yabadi mu ngoshi, anka ta kuibikita mu kukumiina kuaye nya. Mu mushindo umune, ta tui balombene kukumiina kutapa bakuetu balume na bakashi ku mashimba, sunga kuibaluisha bubi ku bubi. (1 Te. 5:13, 15) Atulesha dingi kifulo kietu pa kuneemeka bakuetu balume bakuete kukunkusha bisangilo mu tukongie. (1 Te. 5:12) Pa bafundile Mpoolo uno mukanda, kakongie ka bena Tesalonike ta kabaadi kabande kulombasha kipua kishima nya. Bakulu babaadi muanka ta babaadi na kiuukilo ki bungi nya, na babaadi abakitshi bilema. Sunga mbiabia, bibaadi abitungu kuibaneemeka. Bu bikuete kuifubuila mbombo ikata, abitungu tuikale atuneemeka buludiki bu’abetupa kui bakulu kukila bi’atuibikitanga kumpala. Tui balombene kukutua nimero ya biro bietu bikata bia mu nsenga ishima, na ya filiale eetu; anka ki na muulo nkulonga bia kufula na kuneemeka bakulu ba mu tukongie tuetu kubanga binobino. Sunga kuakitshika muanda kinyi, tuikaleyi na binangu kushi kutuula binangu bietu nka mu kukutua kuabo kua kupuidika, anka tutuule binangu bietu’shi Yehowa na Nkidishitu bakuete kuitukunkusha kukiila kui bano bana balume baasha lulamato.

12. Lukulupilo luetu lukuete kukaluila binangu bietu naminyi?

¹² Nka abikalaa kifulu akikaluila mutue wa musalayi, lukulupilo luetu lua kipandilo alukaluilaa binangu bietu. Patudi na lukulupilo lui bukopo, atutundula’shi bintu bioso biabadi balombene kuitupa kui uno ndumbuluilo ta bi kintu. (Fid. 3:8) Lukulupilo luetu aluitukuasha bua kushaala na butaale na bashimate. Wallace na Laurinda bafube mu Afrique, mbasangane’shi bino mbia binyibinyi. Munda mua mbingo isatu, booso babidi babaadi bafuishe baledi baabo, au afuisha nshaye au namu afuisha nyinaye. Pa muanda wa kipupa kia Corona-Virus, ta babaadi na mushindo wa kualuka kuabo bua nkemoneena na bifuko biabo nya. Wallace bafundile’shi: “Lukulupilo lua lusangukilo alunkuashaa buandia kuibatentekieshanga kushi mu mushindo w’abekalanga mu mafuku aabo aku nfudiilo, kadi mu mushindo w’abakekala mu mafuku aabo a mbangilo mu nsenga ipia. Luno lukulupilo alumpeya butaale nsaa yandi mukalakashue na mianda i bubi, sunga yandi na kenyongoshi ka kufuisha.”   

13. Tui kukita kinyi bua kupeta kikudi kiselele?

¹³ “Tanushimanga kaalo ka kikudi.” (1 Te. 5:19) Mpoolo apuandikisha kikudi kiselele na kaalo ke muatudi. Patudi na kikudi ki’Efile Mukulu, akitupa bukome bua kunyiisha kuikala na muloo na kisumi bua kukita mianda i buwa, na akitupa bukome bua kufubila Yehowa. (Lom. 12:11) Tui kukita kinyi bua kupeta kikudi kiselele? Tui balombene kuteka Efile Mukulu etupe kikudi kiaye, tuilongiele eyi diaye diyokielue na kutuela mu ndumbuluilo a Efile Mukulu akukushibua na kikudi kiaye. Su tubakitshi bino, abiketukuasha bua tudia kudima eyikashi dia “kikuba kia kikudi kiselele.”​—Nga. 5:22, 23.

14. Nkinyi akitungu’shi tulekie su atukumiina kutungunuka na kupeta kikudi ki’Efile Mukulu? (Tala dingi kifuatulo.)

¹⁴ Kunyima ku’Efile Mukulu kuitupa kikudi kiaye kiselele, abitungu tuikale bapasukie bua kupela “kushima kaalo ka kikudi.” Efile Mukulu apeyaa baaba be na binangu bi buwa na muikeelo wibuwa kikudi kiaye kiselele. Mmulombene kutungunuka na kuitupa kikudi kiaye kiselele, su tuatungunuka na kupela kuikala na binangu bi bubi na bikitshiino biabio. (1 Te. 4:7, 8) Bua’shi tutungunukie na kupeta kikudi kiaye kiselele, abitungu dingi tulekie “kubepuula mayi a butemuki.” (1 Te. 5:20) Pano “matemuki” aalesha mikandu ayituuku ku bukuashi bua kikudi ki’Efile Mukulu, mu ino mianda mui mpaa na Efuku dia Yehowa na mianda ayitungu’shi tukite mu kino kipungo kietu bukidibukidi. Ta tui balombene kumona mu binangu bietu’shi diadia efuku diki kula, na kunangushena’shi Armagedone t’afiki ansangane pa nki na muwa nya. Ngi buakinyi atulesha’shi tukuete kutengiela bua’shi diadia efuku difikie binobino, na kuidilama mu binangu bietu p’atuikala na bibungi bia kukita na “bikitshino bia kulamata Efile Mukulu” efuku dioso.​—2 Mp. 3:11, 12.

“TALUULAYI MIANDA YOSO”

15. Tui kukutua kudimbibua na mianda ya madimi y’abapalakasha kui ba demo naminyi? (1 Bena Tesalonike 5:21)

¹⁵ Mu mafuku apeela e kumpal’aku, beshikuanyi b’Efile Mukulu abakeele musaase’shi: “Butaale na kuiyikela!” (1 Te. 5:3) Mianda ya madimi iyokielue na ba demo, ayikapalakana pa nsenga ishima bua kudimba bantu be bungi. (Kbf. 16:13, 14) Abikekala naminyi buetu? T’atukadimbibua nya su “tuataluula mianda yoso” kalolo. (Badika 1 Bena Tesalonike 5:21.) Kishima kia mu kiina Greke kiabadi baluule bu “kutaluula,” babaadi bekifubishe bua kulesha bi’abataluulaa Òlo na Arja bua kushinkamisha’shi bi buwa. Biabia, abitungu tutaluule ki’atuteemesha na ki’atubadika bua kushinkamisha’shi ki buwa. Bino bibaadi na muulo ukata kui bena Tesalonike, na bi na muulo ukata kuatudi bu bia tukuete kuifubuila ku mpombo ikata. Pa mutue pa kukumiina mianda ayakula bangi bu bantu balotakane, abitungu tufubishe ngobesha yetu ya kunangushena bua kupuandikisha mianda y’atubadika sunga y’atuteemesha y’abaakula kui Bible na ndumbuluilo a Yehowa. Su tubakitshi biabia, t’atukadimbibua na madimi su ngamune abakuete kupalakasha kui ba demo.​—Nki. 14:15; 1 Ti. 4:1.

16. Tui na kishinkamiisho kinyi pabitale lukulupilo luetu, na abitutakula bua kukita kinyi?

¹⁶ Atuuku’shi muilo w’Efile Mukulu aukapanda ku mpombo ikata. Atue booso t’atuuku kilombene kuitufikila malooba. (Yak. 4:14) Sunga mpombo ikata yafika pa tuki na muwa, sunga’tue bapue kufua atukapete efuto dia muwa wa ikalaika nka su tubashaala na lulamato. Bedibue muimu abakekadika na Nkidishitu muiyilu. Ingi mikooko namu ayikekadika mu mpaladiiso pa nsenga. Biabia, atue booso tutuuleyi binangu bietu ku lukulupilo luetu lui buwa na tushaale belumbuule bu’efuku dia Yehowa!