Adama na Eva abatombokiele Efile Mukulu

Dingi efuku pabaadi Eva pa bupenka, nyoka besambile naaye. Amuipusha’shi: Eyendo ‘Efile muinulungule’shi tanudianga bikuba bia mitshi yooso i mu lupango?’ Eva bambile’shi: ‘Tui balombene kudia bikuba bia ku mitshi yooso i mu lupango, kukatusha penda kikuba kia mutshi umune. Su tuekidia, atufu.’ Nyoka nkumulungula’shi: ‘T’anukafu’nue muanda efuku dianuikidi anuikala bu Efile Mukulu.’ Bibaadi bia binyibinyi su? Nya badimbile. Anka Eva baadi muibikumiine. Dingi pabaadi Eva atala kikuba, baadi ekilakila. Aye nkudia kipese, kingi kipese kibasheele ekipa Adama. Adama baadi auku’shi su bakutua kukookiela Efile Mukulu abafu. Sunga mbiabia, baadi nka mudie.

Kunyima mu diadia efuku, Yehowa besambile na Adama na Eva. Baadi muibepushe buakinyi abaakutua kumukookiela. Eva baadi atopeka nyoka, Adama namu baadi atopeka Eva. Bu bibaadi Adama na Eva bakutue kumukookiela, Yehowa baadi muibabingie mu lupango. Buadia kuikala mushinkamishe’shi, tala bemualukiila dingi, batudile ba mikeyilu na lupete lua ngoshi a lutembe ndimi ya kaalo ku kituelelo.

Yehowa nkuakula’shi akanyooko mpa na yawa badimbile Eva. Muanda ta nyoka baadi muakule mu binyibinyi na Eva nya. Yehowa tabapangile nyoka buadia kuakula. Baadi muikeyilu ebubi baadi muakuile mui nyoka. Bakitshine bino bua kudimba Eva. Yawa muikeyilu nyi Satana Diabulu. Mu mafuku e kumpala, Yehowa akabutula Satana bua’shi tadimbanga dingi bantu bua kuibatakula mu kukita bi bubi.