Kunyima kwa Adame na Eeva kukatuka mu lupango lwa Edene, abatandjile bana bebungi. Mwana’bo mbedi nyi Kaayine, baadi kidime, a kabidi namu, nyi Abele, baadi mulami a mikooko.

Dingi efuku Kaayine na Abele abaadi abalambula milambu kwi Yehowa. Ouku shi mulambu nkinyi? Nkutuusha kya buntu ki pa bwakyo. Yehowa baadi musangeele mulambu wa Abele apela wa Kaayine. Bibaadi bifiitshishe Kaayine munda. Yehowa nkudimusha Kaayine shi nsungu yaaye ii kumukitshisha mwanda wibubi. Anka Kaayine tabaadi mupushe nya.

Kaayine nkulungula Abele shi: ‘Tubande kwenda ku mapya.’ Pababaadi penda bubidi bwabo mwifuba, Kaayine nkukupila Abele, amwipaa. Yehowa baadya kukita kinyi bwa uno mwanda? Yehowa baadi munyookye Kaayine p’aye kumutuma kula na kifuko kyaye. Tabaadi mutadiile Kaayine bwa kwalukiila dingi nya.

Uno mwanda awitulongyesha kinyi? Twi balombeene kubanga kufiita munda nsaa yatumono shi myanda tayendeka kalolo muyile byatukumiina. Su atupusha nsungu ayitama munda mwetu​—sunga bangi betudimusha kw’abetumono twi bafiite munda—​abitungu tushintuule musango umune ngyelelo eetu a binangu kupela yetukabila.

Bu byabidi shi Abele baadi mufule Yehowa na kukita bibuwa, Yehowa kwete’nka kumutentekyesha. Efile Mukulu akasangula Abele ku bafwe p’Akaluula nsenga mpaladiiso.

Kwi mafuku abafwimine bantu pa nsenga. Bebungi ba kwabadi abaadi bebubi. Mpa na bangi ba miikeyilu abatombokyele mwiyilu. Abo nkuleka kibombeelo kyabo mwiyilu nkufika pano pa nsenga. Weuku bwakinyi abakitshiine byabya? Bwabadya kufwala mbidi ya bu bantu na kwibakila bakashi.

Ba miikeyilu abatandjile bana na baaba bakashi. Bana baabo abaadi aboolomona bangi mwanda abaadi na bukome bukile. Abaadi abakyengyesha bantu. Yehowa ta baadya kutadiila bwa shi batungunukye na kukyengyesha bantu nya. Nyi bwakinyi baatshile kitshibilo kya kubutula bantu booso bebubi ku mpeshi.

Anka kubaadi muntu baadi mwileekeene nabo. Baadi mufule Yehowa. Eshina dyaaye nyi Nowa. Baadi na mukashi na bana basatu, Seme, Kame, na Yafete booso bwabo abaadi na bakashi. Yehowa nkulungula Nowa bwa kukita bwato bukata bwa shi Nowa apande na kifuko kyaye ku Mpeshi. Bwato nyi mmusheto ulombeene kulengama kunundu a meema. Akupu Yehowa nkulungula Nowa bwa kutwesha nyema ibungi mu bwato bwayidya kupanda namu.

Musango umune, Nowa babangile kukita bwato. Nowa na kifuko kyaaye abakitshine bipwa bifikye ku 50 bwa kwibupudisha booso. Abo nkwibusee nka muyile bibaadi Yehowa mwibalungule. Munda mwa aa mafuku, Nowa baadi adimusha bantu pabitale Mpeshi. Kadi takubaadi muntu su ngumune baadi mumuteemeshe.

Ku nfudiilo a byoso, nsaa ya kutwela mu bwato ibaadi ilombane. Tubande kutala bibaadi bikidikye kunyima.