DILONGIESHA 6
Bantu muanda abaadi bapande
Nowa, kifuko kiaye, na nyema abatuelele mu buato. Yehowa nkufunga kiibi, mpeshi nkubanga kunoka. Aye nkunoka ebungi, buato nkubanga kulengama panundu a meema. Akupu nsenga yooso nkuwula meema. Paasha pa buato bantu booso bebubi nkufua. Anka Nowa na kifuko kiaye nkupanda mu buato. We kunangusheena bibaabadi na muloo ukata muanda abaadi bakokiele Yehowa su?
Mpeshi nkunoka munda mua mafuku 40 bufuku na kaanya, akupu aye nkutshibika. Kapeela kapeela meema nkubanga kukama. Ku nfudilo, buato bubaadi bushaale pa miengie. Kadi kubaadi kukii meema mbalo yooso, Nowa tabaadi na mushindo wa kutuuka mu buato kalolo na kifuko kiaye nya.
Ku kapeela kapeela, meema ooso abakamine. Nowa na kifuko kiaye abaadi mu buato munda mua kipua na mafuku. Akupu Yehowa nkuibalungula mbalombene kutuuka mu buato, na kutuela mu mbalo ibaadi ayimueka bu nsenga ipia. Abaadi na lutumbu lukata bibaadi Yehowa muibapaashe, abalesheeshe luanka pa kulambula Yehowa mulambu.
Yehowa baadi musangeele wawa mulambu. Aye nkulaa’shi t’akabutula dingi kintu su nkimune ku mpeshi pa nsenga. Nyi buakinyi baadi mutuushe nkongolo muiyilu bu kitunduilo kia wawa mulayilo waaye. Tobomuene nkongolo su?
Akupu, Yehowa nkulungula Nowa na kifuko kiaye bua kutanda bana na kuusha nsenga.
“Mpa n’efuku dibatuelele Nowa mu buato, [bantu] tababaadi batuule binangu ku bibaadi abikitshika mpa na pabafikile mpeshi a kabutu, ebabutula boso.”—Mateo 24:38, 39