Ba Temue ba Yehowa ba mu Nouvelle-Zélande​—mbena Kidishitu baasha butaale na belambule su?

Muifuku dia 21/10/1940, bakata ba mu Nouvelle-Zélande babaadi bambe’shi ba Temue ba Yehowa nyi ndumbuluilo kuete kutuesha kafutakanyi mui bantu. Sunga wawa muanda ubaadi utushile ba Temue nkalakashi ibungi, tababaadi bakookie nya. Bu kileshesho, babaadi batungunukie na kulungula mukandu wibuwa na kutuela mu bisangilo sunga bakata babaadi abafiki mu kuibakuata.

Andy Clarke, tabaadi Temue a Yehowa nya, anka mukashi aaye Mary baadi Temue a Yehowa. Andy baadi mumone mushindo ubaadi mukashi aaye atungunuka na kutuela mu bisangilo sunga mbiabibaadi masaku. Baadi atshinyi’shi abakuata mukashi aaye muanda kuete kuenda mu bisangilo. Andy tabaadi mutoshe mukashi aaye buashi ende mu bisangilo nya, aye nabene babangile kutuela mu bisangilo na mukashi aaye Mary aye nkumulungula’shi: “Su abitungu’shi bakukuate biabia abankuata nami namu!” Kubanga paapa, Andy baadi nka atuele mu bisangilo bioso na mukashi aaye. Kunyima, aye nkubatshishibua afika Temue a Yehowa. Sunga ba Temue ba Yehowa babaadi bakiengieshibue, mu Nouvelle-Zélande, mu Ngoshi ya kabidi ya nsenga ishima, bebungi ba kuabadi bu Mary babaadi bashaale na lulamato kui Efile Mukulu.

Kufuima mu lukano

Dingi efuku, ba mpulushi abaadi bakuate John Murray baadi na bipua 78 nsaa ibaadi ende mu kulongiesha bantu mianda ya mu Bible ku nshibo na nshibo. Tumilaadi tubambile’shi kuete kukuatshishena ndumbuluilo atueshaa kafutakanyi. Ba Temue ba Yehowa bebungi babaadi basambe ku tumilaadi; bangi bebafutshisha bibawe, bangi babaadi bebeele mu nkano munda mua bieshi isatu.

Ba Temue ba Yehowa abaadi bapele kutuela busalayi muanda wa kunemeka kondo kabo k’eshimba kalongieshibue na Bible. (Yeeshaya 2:4) Pa muanda wa biabia, nsaa ya ngoshi, babaadi bakiengieshibue bebungi ba kuabadi nsaa ibaabadi abatuesha busalayi pa bukopo. Ba Temue ba Yehowa pepi na 80 babaadi bapele kutuela busalayi, babaadi bebatume mu ma camp a bena lukano munda mua nsaa ya ngoshi. Mu lukano, sunga mbibaabadi abebakiengesha, na biamubaadi mu kipungo kia mashika e bukopo, bano bakuetu babaadi batungunukie na kulanguila Yehowa na muloo.

Ba Temue ba Yehowa pababafikile mu lukano, ababangile musango umune kukita bisangilo. Ku lubingo loso abaadi abatuele mu bisangilo abo nkuata mpango ya kulambukisha bangi bena lukano, abapele ba Temue matalua a kukita bikongeno, anka bibaadi abitungu’shi kuikale musalayi ebalama. Bangi bena lukano babaadi balongie ‘Bible mu ma camp abo nkubatshishibua muamua.

Bruce, muana mulume a nfudiilo a Mary na Andy, atuikalanga besambile ku mbangilo, bamuene’shi kuikala mu lukano kubamupeele mushindo wa kuuka mianda ya mu Bible ngofu. Amba’shi: “Buande’mi, bibaadi nka bu’shi nkuete kuenda mu kalasa, muanda naadi na mushindo wa kuisamba na bakuetu banyingie, babaadi mu camp mpa na kulonga mianda ibungi kuabadi.”

Mu 1944 mbulamatadi batshile kitshibilo kia kutuusha bangi bantu mu lukano. Anka bakata ba basalayi babaadi bapele kiakia kitshibilo muanda babaadi abauku’shi su ba Temue ba Yehowa babatuuku, abatungunuka na kulongiesha bantu mianda ya mu Bible. Ingi rapore ya basalayi ayilesha’shi: “Sunga ma Camp aakuasha misango ibungi buatudia kutala bantu be mu lukano pabitale lukumino luabo, bi bukopo bua kupudisha lukumino luabadi nalo.”

Tababaadi baluishe butaale bua bantu nya

Pa muanda mukandu wa kukandika ba Temue ba Yehowa ubaadi upalakane. Bangi bantu babaadi abakimbi kuuka mianda ibungi pabitale ba Temue ba Yehowa. Kunyima kua kapindi, bantu bebungi babaukile’shi ba Temue ba Yehowa tabaluishaa butaaale bua bangi nya. Abatunduile’shi ba Temue t’abakitaa bantu bibubi na’shi mbena Kidishitu baasha butaale. Nyi buakinyi, bungi bua ba Temue ba Yehowa mu Nouvelle-Zélande bubakamine; mu kipua kia 1939 babaadi bantu 320 na mu 1945 bafika bantu 536!

Ingi misango, bakata ba mulamatadi, babaadi bantu bena eshimba dibuwa, babambile’shi miiya yabadi belele ba Temue ba Yehowa ta ngia kululama nya. Kunyima kua kupusha bibaabadi bafunde mungi mukuetu baadi ende mu bulungudi; mungi nsushi bapelele kuponeesha mukuetu kilumbu. Bambile’shi: “Kuamba’shi muntu bayipaa muiya muanda ya kupa bantu Bible, nyi muanda wanshii mulombene kukumina muanda ta mbipushene na binangu biande na mueneno andi naye pabitale miiya.”

Pabaabadi balekie kukandika mudimo wetu kunyima kua ngoshi, ba Temu babaadi balungule na kisumi kioso mukandu wa Bufumu bu’Efile Mukulu. Mu 1945, biro bia filiale bibaadi bitumine tukongie tua mu Nouvelle-Zélande mukanda. Wawa mukanda ubaadi awamba bino: “Atue boso abitungu tuikale na binangu, mpa na muloo na kalolo kui bantu boso. Tatuikalanga atuikakena nabo. Tatulubanga’shi bantu batufumankanaa nabo abakuminaa malongiesha a mu bipuilo biabo na abakuminaa kuiatumikila. . . . Bebungi ba kuabadi nyi ‘mikooko’ ya Muanana ayitungu’shi tuiyikunkushe kui Yehowa na ku bufumu buaye.”

Lelo uno, ba Temue ba Yehowa ba mu Nouvelle-Zélande bakuete kutungunuka na kulungula mukandu wa mu Bible kui bantu ba muiumbo diabo mpa na kui benyi abafiki mu kutala eumbo diabo. Dingi efuku muiumbo dia Turangi munda mua nsaa ipeela ba Temue 4 babaadi balungule bantu 67 mukandu wibuwa babaadi abafiki mu maumbo 17!

Abimueneka patooka’shi bantu ba mu Nouvelle-Zelande mbakumine’shi ba Temue ba Yehowa nyi mbena Kidishitu baasha butaale abakuminaa mianda ya mu Bible na abetatshishaa bua kuiyitumikila mu muwa wabo. Kukipua kioso, bantu bebungi bakuete kubatshishibua na kufika bu ba Temue ba Yehowa. Mu 2019, ba Temue bakile pa 14 000 mbafubile Yehowa na muloo oso mu Nouvelle-Zélande.