Nkonko Ya Bantu Ababadikaa
Kunyima kuabo kutanda Yesu buakinyi Yosefe na Mariya babashadile ku Beteleme pamutue wa kualukiila ku Nazarete?
Bible te bi’akula nya. Anka etulungula ingi mianda kantu pa kantu ilombene kupatuula buakinyi babaadi balombene kushaala ku Nazarete mu aa mafuku.
Ungi muikeyilu balunguile Mariya’shi okeemita na otande muana. Nsaa ibebalunguile muikeyilu uno mukandu, Mariya na Yosefe babaadi bashaleele mu Nazarete, mu Ngalileya kibundi kia butandua kia ba Yosefe. (Luk. 1:26-31; 2:4) Kunyima nsaa ibabalukiile mu Ejipitu, babayiile dingi mu Nazarete. Yesu baadi mukudile kuakua na aye nkufika muina Nazarete. (Mat. 2:19-23) Ngi buakinyi atunangushenaa pabitale Nazarete nsaa y’atuteemuna eshina dia Yesu, dia Yosefe na dia Mariya.
Mariya baadi na mukuabo mukashi abaabadi abetanyina bu Elizabete, baadi mushaale mu Yuda. Elizabete babaadi bamuibakile kui tshite-muakuidi Sekadiya na aye nkufika nyinaye na Yowano Mubatshishi. (Luk. 1:5, 9, 13, 36) Mariya baadi muende mu kutembela Elizabete na aye nkushaala naaye munda a mieshi isatu mu Yuda. Akupu, Mariya balukiile mu Nazarete. (Luk. 1:39, 40, 56) Mariya baadi dingi na bangi bena kifuko naaye mu Yuda.
Dingi efuku, Yosefe baadi mukookiele muiya wa kuenda mu “kuifundisha.” Yosefe bayiile luendo lui bula lua kukatuka mu Nazarete, nkuenda mu Beteleme, mu baadi “kibundi kia Davide” na mubaabadi batemukie’shi ngi amukatandikilua Mesiya. (Luk. 2:3, 4; 1 Sam. 17:15; 20:6; Mik. 5:2) Kunyima kua Mariya kutanda Yesu, Yosefe tabaadi apuandikisha’shi Mariya e kuata muana tooka akita luendo lui bula bua kualuka naaye ku Nazarete nya. Babashadile ku Beteleme mu bilometre 9 na kibundi kia Yelusaleme. Bibaadi buwa bua’shi baate muana bende naaye ku ntempelo bu bibaadi abitekie muiya.—Lv. 12:2, 6-8; Luk. 2:22-24.
Muikeyilu balunguile Mariya kumpala’shi muana abakatanda, abakamupa “lupuna nsulu lua nshaye Davide” na “akamunana bu Nfumu.” Biabia Yosefe na Mariya babaadi bapushe kalolo buakinyi bibaadi abitungu’shi Yesu atandikilue mu kibundi kia Davide. (Luk. 1:32, 33; 2:11, 17) Pangi babaadi banangushene’shi, bibuwa batungunukie na kushaala kuakua na batengiele buludiki bu’Efile Mukulu na bi’akumiina’shi bakite.
T’atuuku bungi bua mafuku abaabadi bashaale mu Beteleme, nsaa ibafikile bantu abatalulaa nyenyenyi bua kuuka mianda. Anka, yawa mulume na mukashi babaadi bashaale mu nshibo na “muana aabo ki mukinga” kushi muana tooka. (Mat. 2:11) Abimueneka’shi pamutue pa kualukiila kunundu kua Nazarete, babaadi bashaale mafuku e bungi ku Beteleme bua kubanda kuikisha.
Erode batumine eyi buabadia kuipaa “bana balume booso be na bipua bibidi na muushi be mu Beteleme.” (Mat. 2:16) Muikeyilu badimuishe Yosefe na Mariya pabitale uno muanda bua’shi basuukile mu Ejipitu na Yesu na bashaale kuakua mpaa na apafu Erode. Kunyima, Yosefe baadi mutuale kifuko kiaye ku Nazarete. Buakinyi ta mbalukiile mu Beteleme? Bua kusuuka yawa muana a Erode Arkelause baadi ntomboshi, baadi nfumu mu Yuda. Na bua kuneemeka kuno kudimushua ku’Efile Mukulu. Ku Nazarete, Yosefe badia kukusha Yesu mu bulami bu mulanguidi a binyibinyi a Efile Mukulu.—Mat. 2:19-22; 13:55; Luk. 2:39, 52.
Abimueneka pangi’shi Yosefe bafuile kumpala kua Yesu kupa bangi bantu mushindo wa kupeta muuwa muiyilu. Yosefe akasanguka pano pa nsenga. Be bungi abakekala na mushindo wa kufumankana naaye, na abakalongo bi bungi pa bimutale. Na buakinyi aye na Mariya babaadi bashaale ku Beteleme kunyima kua kutanda Yesu.