Abapuula Ntete Mwifuku Dya Sabato

Yesu na balongi baye bakwete kwenda binobino dya kunundu kwa Ngalileeya. Mu kipungo kya printemps, na dingi ntete ya blé ibaapu kukoma. Bu bibaadi balongi na nsala, abayile bakapuula ndambo ya ntete bwa kudya. Kadi dibaadi efuku dya Sabato na dingi Bafadisee abaadi abamono byoso bibabadi abakitshi.

Tentekyesha shi, mu mafuku apeela abakatuka mu kukila, bangi beena Yuuda mu Yelusaleme abakyebele kwipaa Yesu, abambile shi t’anemeka Sabato. Binobino, Bafadisee abafiki mu kufunda abikitshi balongi baaye. Abamba shi: “Talanga, balongi bwobe abakitshi [kintu] kishikipwandjikile kukitshiibwa mwifuku dia Sabato.”—Mateo 12:2, Kilombeeno kipya.

Bafadisee abamba shi kupuula ntete na kwiyikunya mu maasa bwa kudya kwi nka bu kumbula ntete na kwiyitwa. (Efilu 34:21) Bu bibabadi abapatula bibubi uno mudimo ubaadi ulombeene kukitshika efuku dya Sabato, bino bibaadi bikashe Sabato bu ibukopo bukile, aku namu Sabato ibaadi efuku dya muloo, na kunyingishibwa mu kikudi. Bwa kulumbuula mweneno aabo e bubi, Yesu baadi mufube na bileshesho abileesha shi Yehowa Efile Mukulu tabaadi mukumiine sunga nkapeela shi mwiya utale Sabato tabeulondanga mu wawa mushindo.

Kileshesho kya kumpala, nkya Daavide na bantu baye. Nsaa ibabadi na nsala, abatwelele mu tabernakele abo nkudya mikate ya milambu. Yaaya mikate ibabadi bapwe kukaasha kumpala kwa Yehowa na b’eyipyanyikiisha na ipya, bibaadi abitungu shi batshiite-mwakwidi beyidye. Byabya, tababaadi balombeene kutshibila Daavide na bantu baaye kiimu mwanda shi abeyidi nya.—Beena-Levi 24:5-9; 1 Samwele 21:1-6.

Mu kileshesho kya kabidi, Yesu bambile shi: “Tanwibabadikye mu Mwiiya’shi, mwifuku dia Sabato, batshiite mwakwidi mu ntempelo abapeelesha kineemo kia Sabato, n’abo kushii kwikala bapishiibwe?” Mu kino kileshesho, Yesu aleesha shi sunga mwifuku dya Sabato, batshiite mwakwidi abaadi abayipaa nyema bwa kulambula na kukita ingi midimo mu ntempelo. Yesu nkwakula shi: “Anka nenulungula’shi, kuno kwi kintu kikile ntempelo bukata.”—Mateo 12:5, 6; Mbadiko 28:9.

Yesu bakaka dingi binangu byabo ku Bifundwe bwa kutuusha dino elango: “Su nubadia kwikala bashinguule kiakia akikyebe kwamba’shi: ‘Nankyebe lusa nka ntankyebe mulambu nya,’ tanubadia kutshibila bantu bashii na kilema kiimu nya.” Aye nkufudiisha shi: “Mwanda Mwana a muntu nyi Nfumu a Sabato.” Yesu anangusheena ku butaale bwa kumunana kwa Bufumu bwi kumpala mu bipwa kinunu bi kumpala.—Mateo 12:7, 8, Kilombeeno kipya 2014; Osee 6:6.

Bantu mbakyengye bikile mu bupika bwa ndumbulwilo a Satana sha etombo na ngoshi. Kumunana kwa Yesu akukela Sabato mukata akuketupa kwikisha kwatukwete kutengyela kubanga kala na kwatudi nako lukalo!