Mukata a basalayi balesha lukumiino lukata

Kunyima kw’aye kukita mwisambo wa ku Mwengye, Yesu bayile ku kibalo kya Kapernaume. Kwakwa, bangi bakulu ba beena Yuuda abadi bende kwadi. Abadi bebatume kwi ungi muntu badi na kyaye kiukilo kilekene—badi mukata a basalayi a ku Looma.

Mufubi umune a yawa mukata a basalayi aadi mufule bakumbile peepi na lufu. Sunga byekala shi mukata a basalayi tabadi mwina Yuuda, badi akumina shi Yesu amukwashe. Beena Yuuda abalungula Yesu shi mufubi a mukata “mmulaale mu nshibo, mufwe lupoolo, busungu mbumunemeene,” abimweneka shi e na mitanyo ibungi. (Mateo 8:6) Bakulu beena Yuuda abalungula Yesu shi, uno mukata a basalayi badi mulombanyine kukwashibwa ku mwanda waye, abamuleesha dingi shi: “mwanda mufule mwilo wetu, dingi nnaye mwitwibakile nshibo ya kitumbwilo.”—Luka 7:4, 5.

Nka paapa, bakatuka na bakulu abende ku nshibo ya mukata a basalayi. Pababadi befubwile peepi nayo, mukata a basalayi nkutuma beenaaye bwa kululungula Yesu shi: “Mwanana, twekalakashanga, mwanda ntshimulombeene otwela mu nshibo mwande. Ngi mwanda kinyi mmwene ami nabeene shi ntshi na matalwa a kufika koodi.” (Luka 7:6, 7) Bibadi bishima bya kwiyisha bibakwile uno muntu atumiinaa bantu eyi! Abilesha kwilekeena kwaye na bangi beena Looma abakitshina bafubi baabo bibubi.—Mateo 8:9.

Kushi mpaka, mukata abasalayi badi auku shi beena Yuuda tabadiya bukuuku na bashi beena Yuuda n’abo nya. (Bikitshino 10:28) Pangi kyakya kinangu nyi kibadi kitakule mukata a basalayi bwa kuteka beenaaye bwa nkalungula Yesu shi: “Akula penda kishima kimune bwa shi mufubi ande apande.”—Luka 7:7.

Pakupusha bino bishima Yesu bamukanyishe bikata aye nkwakula dingi shi: “Sunga mu Isaleele, ntshii musangane lukumiino lwi bino.” (Luka 7:9) Pabadi bena mudimo naaye balukile ku nshibo kwa mukata a basalayi abadi basangane mufubi badi na maladi mupashibwe.

Musango umune aye ky’apu kukita kino kilengyeleshi kya kupaasha, bamwene bya kulesha shi, sunga bantu bashii beena Yuuda kadi su be na lukumiino, abapete myabi, p’aye kwakula shi: “Bee bungi abakakatukila dya kutunduka-nguba na kupona-nguba bwa kushala ku madyo pamune na Abrahame na Isaake na Yaakobo mu Bufumu bwa mwiyilu.” Kadi bwa beena Yuuda bakutwe lukumiino? Yesu aamba shi “abeebasumbula paasha mu mufito kwakwa akwikala nkalo na kwibongyeshena kwa meeno.”—Mateo 8:11, 12.

Byabya, bano beena Yuuda abapele mwabi wibapebwe wa kwikala ba kumpala mu Bufumu na Kidishito abakebasumbushena. Kadi beena bingi bisamba, abakebakukila bwa kushala ku meesa aaye, mu “Bufumu bwa mwiyilu.”