Mmukile ma demo ebungi ku bukome

Nsaa ibadi balongi balukiile dingi kwifwa kunyima kwa lukalakashi lwa mu kalunga, abadi na ndambo a moo. Balume babidi ba bipambe, booso abadi bakwatshikwe na bikudi bibi, nkutuukila peepi na ku mashaama, akupu abafikile lubilo kwi Yesu! Bantu ababanga kutala umune a kwabadi, mwanda abimweka shi aye ndjo badi akalakasha bikata na kuyisha mafuku ebungi kasha ma demo amukwata.

Uno muntu badi aumbakana nka muswa. Bufuku na kaanya, badi “ngub’oso ku mashaama na mu myengye eele misaase na kwitapa mabwe.” (Maako 5:5) Bantu abadi abatshiinyi kukidila mbalo ibadi mwanda badi bukyelo bukile. Bangi abatompele kumukwata, kadi badi atshibi ma ndombo ooso ababadi abamwanya na kutshiba myooshi ibabadi abamwanya ku mikoolo. Ta kwi muntu badi na bya kumoobesha.

Nsaa ibefubwila yawa muntu peepi na Yesu aye nkupona ku ngwa yaaye, ma demo abadi amukwate nkumudidisha mikunda shi: “Wandji noobe ngunyi Yesu Mwan’Efile Mukulu sha kwiyilu? Nakusendeela mwishina dy’Efile shi: Tonfwambushanga.” Yesu nkuleesha shi mmukile mademo ku bukome, p’aye kutuma eyi shi: “Tuuka mu uno muntu, kikudi kibi’be!”—Maako 5:7, 8.

Mu binyibinyi, ma demo e bungi abadi akwate yawa muntu. Nsaa ibadi Yesu mumwipushe shi: “Eshina dyoobe mbuu’nyi?” Balulwile shi: “Nami Kibumbu, mwanda twi bungi.” (Maako 5:9) Kibumbu kya Beena-Looma, kibadi na binunu bya basalaayi; byabya bikudi bibi bibungi bibadi abikyengyesha yawa muntu na kupusha muloo bibadi akyengye. Abyo nkwisendeela Yesu “bwa’shi tebituminanga eyi dia kwenda mu bwina bula.” Abimweka shi abishinkamisha kino akikyebe kwibifwila na mukata aabyo, Satana.—Luka 8:31, Kilombeeno kipya 2014.

Pabatadile mu bwipi, kubadi kisaka kya ngulube ifikye ku 2 000 ibadi ayidi, muyile Mwiya wa beena Yuuda, ngulube ibadi butete kwikala nayo. Ma demo abakwile shi: “Etutume mu ngulube tukemutwele.” (Maako 5:12) Yesu nkwiyilungula bwa kwenda, ayo nkukatwela mu ngulube. Nka paapa, yooso ngulube 2 000, ibakundukile lubilo ayo nkwitumba mwengye na nkwiyina mu kalunga.

Pabadi baba abalamaa ngulube bamone byabya, abayile lubilo na mukandu mu kibundji na mu tungi tumisoko. Bantu abafikile mu kumona bibadi bikidikye. Pababadi bafikye, abamwene shi muntu badi na bikudi bibi taadi biya takii na mombe dingi nya. Badi mpa na mufwale bilamba aye nkushala pa ngwaa ya Yesu!

Bantu abadi bapushe sunga kumona yawa muntu abadi bakwatshikye na moo, kushi’bo kwiuka akipatuula bino. Abalungula Yesu shi akatukye mu nsenga yabo bukidi. Pabadi Yesu akaka bwato bwa shi ende, yawa muntu badi mukwatshibwe na ma demo nkumuteka bwa shi ende naye. Anka Yesu bamulungwile shi: “Nda mu kifuko kyoobe kwi bakwenu, webalondele byooso bikukitshine Yehowa ku lusa lwaye.”​—Maako 5:19.

Kebungi Yesu batoshanga baba babadi apasha bwabadya kupela kulungula bantu, kupela bamukumina kwabapusha nkumo ya bilengyeleshi. Kadi bwa binobino, uno muntu ababadi banyokye kwi bikudi bibi aleesha bukome bwa Yesu pa kulungula bangi bashi bapete mwabi wa shi Yesu enda ku mashibo kwabo. Bu kamonyi bwaye mbulombeene kushikila miisambo ya madimi ya bantu pabitale kushimina kwa ngulube. Byabya yawa muntu bayile aye nkubanga kulungula mu Dekapole mooso bibadi Yesu mumukitshine.