Psalmi

37 Mos u acaro* për shkak të të ligjve,

as mos i ki zili ata që bëjnë veç keq,+

 2 se shpejt do të thahen si bari,+

si bari i njomë do të vyshken.

 3 Ki besim te Jehovai dhe bëj të mirën;+

bano në vendin tënd* dhe ji besnik në çdo gjë.+

 4 Gjej kënaqësi të thellë te Jehovai,*

dhe ai do të t’i plotësojë dëshirat e zemrës.

 5 Lëre udhën tënde në dorë të Jehovait;+

mbështetu tek ai, dhe ai do të veprojë për të mirën tënde.+

 6 Falë tij, drejtësia jote do të shndritë si drita e agimit

dhe ndershmëria jote, si dielli i mesditës.

 7 Rri në heshtje para Jehovait+

dhe prite plot shpresë.*

Mos u acaro për shkak të njeriut

që ia del mbanë në gjithë intrigat e tij.+

 8 Lëre zemërimin dhe largohu nga tërbimi;+

mos u acaro e mos bëj keq,*

 9 sepse të ligjtë do të shfarosen,+

kurse ata që shpresojnë te Jehovai do të trashëgojnë tokën.+

10 Edhe pak dhe të ligjtë nuk do të jenë më;+

do të shohësh vendin ku ishin dikur,

por ata nuk do të jenë më.+

11 Kurse zemërbutët do të trashëgojnë tokën+

dhe do t’u kënaqet shpirti me paqen e pafund.+

12 Të ligjtë kurdisin të këqija kundër të drejtëve+

dhe kërcëllijnë dhëmbët kundër tyre.

13 Por Jehovait do t’i duken qesharakë,

sepse ai e di se po u vjen dita.+

14 Të ligjtë zhveshin shpatën dhe tendosin harkun,

që të munduarin dhe të varfrin ta shembin përdhe,

që jetën t’ua sosin atyre që ecin në udhën e drejtë.

15 Por shpata në zemrën e tyre do të ngulet+

dhe harku copë e çikë do t’u bëhet.

16 Më mirë ajo pak që ka i drejti

se begatia që gëzojnë shumë të ligj,+

17 sepse të ligjve do t’u thyhen krahët,

por Jehovai do t’i mbështetë të drejtët.

18 Jehovai e di mirë ç’heqin të paqortueshmit,*

ndaj trashëgimia e tyre do të mbetet përgjithmonë.+

19 Ata nuk do të turpërohen në ditë të keqe;

do të kenë me bollëk kur të ketë zi buke.

20 Por të ligjtë i pret fundi;+

armiqtë e Jehovait do të vyshken si stolia e livadheve

e do të davariten porsi tymi.

21 I ligu merr hua, por nuk e kthen,

kurse i drejti është bujar, gati për të dhënë.+

22 Ata që Perëndia i bekon, do të trashëgojnë tokën,

kurse ata që Perëndia i mallkon, do të shfarosen.+

23 Jehovai ia drejton* hapat njeriut+

kur i sjell kënaqësi udha e tij.+

24 Edhe nëse bie, ai nuk do të shembet përtokë,+

sepse Jehovai e mban për dore.*+

25 Dikur isha i ri e tani jam plakur,

por kurrë s’kam parë ndonjë të drejtë të braktisur+

e as fëmijët e tij të zgjatin dorën për bukë.*+

26 I drejti jep gjithnjë hua me bujari,+

ndaj fëmijët e tij i presin plot bekime.

27 Largohu nga e keqja dhe bëj të mirën,+

e do të banosh përgjithmonë në tokë,

28 sepse Jehovai e do drejtësinë

dhe besnikët e vet nuk do t’i braktisë.+

Ata do të jenë gjithmonë të mbrojtur,+

kurse pasardhësit e të ligjve do të shfarosen.+

29 Të drejtët do të trashëgojnë tokën+

dhe do të banojnë përgjithmonë në të.+

30 Goja e të drejtit nxjerr fjalë mençurie,*

dhe gjuha e tij thotë të drejtën.+

31 Në zemër ka ligjin e Perëndisë së tij,+

ndaj hapat nuk do t’i lëkunden kurrë.+

32 I ligu s’ia ndan sytë të drejtit

dhe e përgjon me kujdes që ta zhdukë krejt.

33 Por Jehovai nuk do ta lërë në dorë të tij+

e nuk do ta shpallë fajtor kur të gjykohet.+

34 Shpreso te Jehovai dhe ndiq udhën e tij,

e ai do të të lartësojë që të trashëgosh tokën.

35 E pashë njeriun e lig dhe shpirtmizor

tek harlisej si pema në tokën e vet.+

36 Por krejt papritur u zhduk e më nuk ishte;+

e kërkova pareshtur, por s’e gjeta gjëkundi.+

37 Vëre re të paqortueshmin*

e mos i hiq sytë nga i drejti,+

sepse e ardhmja e këtij njeriu do të jetë plot paqe.+

38 Kurse shkelësit do të shfarosen krejt;

të ligjtë s’do të kenë asnjë të ardhme.+

39 Shpëtimi i të drejtëve vjen nga Jehovai;+

ai është fortesa e tyre në kohë vuajtjesh.+

40 Jehovai do t’i ndihmojë e do t’i çlirojë;+

ai do t’i çlirojë nga të ligjtë dhe do t’i shpëtojë,

sepse tek ai kanë gjetur strehë.+