උත්පත්ති
28 එබැවින් ඊසාක් යාකොබ්ව කැඳවා ඔහුට ආශීර්වාද කර මෙසේ කීවේය. “ඔබ කානාන් දේශයේ දූවරුන්ගෙන් භාර්යාවක් තෝරාගන්න එපා.+ 2 පදන්-ආරම්හි සිටින ඔබේ මවගේ පියා වන බෙතුයෙල්ගේ නිවසට ගිහින් ඔබේ මවගේ සහෝදරයා වන ලාබන්ගේ දූවරුන්ගෙන්+ භාර්යාවක් තෝරාගන්න. 3 සියලු බලැති දෙවි ඔබට ආශීර්වාද කර ඔබ මාර්ගයෙන් බොහෝ දරුවන් බිහි වෙන්න සලස්වයි. ඔබෙන් ජාතීන් සමූහයක්+ බිහි වෙයි. 4 දෙවි ආබ්‍රහම්ට දුන් ආශීර්වාදය ඔබටත්+ ඔබෙන් පැවත එන්නන්ටත්+ ලබා දෙයි. එවිට දෙවි ආබ්‍රහම්ට දුන් දේශය+ එනම්, ඔබ විදේශිකයෙක් ලෙස ජීවත් වන මේ දේශය+ ඔබට උරුම වෙයි.”
5 පසුව ඊසාක් ලාබන් ජීවත් වූ පදන්-ආරම් නම් පළාතට යාකොබ්ව පිටත් කර යැව්වේය. සිරියානු ජාතික බෙතුයෙල්ගේ+ පුත්‍රයා වූ ලාබන්, යාකොබ්ගේ හා ඒසව්ගේ මව+ වන රෙබෙකාගේ සහෝදරයා+ විය.
6 ඊසාක්, යාකොබ්ට ආශීර්වාද කර භාර්යාවක සොයාගන්නා පිණිස පදන්-ආරම් වෙතට ඔහුව පිටත් කර යැවූ බව ඒසව්ට දැනගන්න ලැබිණ. යාකොබ්ට ආශීර්වාද කරන අවස්ථාවේදී, “කානාන් දේශයේ දූවරුන්ගෙන් භාර්යාවක් තෝරාගන්න එපා”+ කියා ඊසාක් ඔහුට අණ කළ බවත් 7 යාකොබ් ඔහුගේ පියාට හා මවට කීකරු වෙමින්+ පදන්-ආරම් බලා පිටත් වූ බවත් ඔහුට දැනගන්න ලැබිණ. 8 එවිට ඔහුගේ පියා වන ඊසාක් කානාන් දේශයේ දූවරුන්ට අකමැති+ බව ඒසව් තේරුම්ගත්තේය. 9 එබැවින් ඒසව් තමාට සිටි භාර්යාවන්ට+ අමතරව තවත් ස්ත්‍රියක විවාහ කරගත්තේය. ඔහු ආබ්‍රහම්ගේ පුත්‍රයා වන ඉෂ්මායෙල්ගේ දියණිය වූ නෙබායොත්ගේ සහෝදරිය වන මහලත්ව විවාහ කරගත්තේය.
10 මේ අතරතුරේදී යාකොබ් බෙයර්-ෂෙබා සිට හාරාන්+ බලා ගමන් කළේය. 11 ඔහු එක්තරා ස්ථානයකට+ පැමිණ එහි රාත්‍රිය ගත කරන්න තීරණය කළේය. මන්ද ඒ වන විට හිරු බැස තිබිණ. ඔහු එතැන තිබූ ගලක් තෝරාගෙන ඒ මත හිස තබා නිදාගත්තේය. 12 ඔහු නිදා සිටියදී සිහිනයක්+ දුටුවේය. පොළොවේ සිට ස්වර්ගය දක්වා උස් වූ ඉණිමඟක් තිබූ අතර දේවදූතයන් එම ඉණිමඟ දිගේ නඟිමින් බසිමින්+ සිටින ආකාරයත්, 13 ඊට ඉහළින් යෙහෝවා දෙවි සිටින බවත් ඔහු දුටුවේය.+ දෙවි කතා කරමින් මෙසේ කීවේය.
“මා යෙහෝවා දෙවිය. මා ඔබේ පියා වන ආබ්‍රහම්ගේද ඊසාක්ගේද දෙවිය.+ ඔබ දැන් නිදා සිටින ස්ථානය හා මේ දේශය මම ඔබටත් ඔබෙන් පැවතෙන අයටත් දෙන්නෙමි.+ 14 සැබවින්ම ඔබෙන් පැවතෙන අය පොළොවේ දූවිලි+ මෙන් බොහෝ සෙයින් වැඩි වන්නෝය. ඔබෙන් පැවත එන්නෝ දේශයේ සතර දිශාවට+ පැතිර යන්නෝය. ඔබ මාර්ගයෙන්ද ඔබෙන් පැවත එන තැනැත්තා* මාර්ගයෙන්ද පොළොවේ සියලු පවුල් සැබවින්ම ආශීර්වාද ලබාගනු ඇත.*+ 15 මම ඔබ සමඟ සිට ඔබේ මුළු ගමනේදී ඔබව ආරක්ෂා කර නැවත මේ දේශයට ගෙනෙන්නෙමි.+ මම ඔබව අත් නොහරින්නෙමි. ඔබට දුන් පොරොන්දුව මම අනිවාර්යයෙන්ම ඉටු කරන්නෙමි.”+
16 එවිට යාකොබ් අවදි වී මෙසේ කීවේය. “සැබවින්ම යෙහෝවා දෙවි මේ ස්ථානයේ සිටිනවා. එහෙත් මම එය දැන සිටියේ නැහැ.” 17 ඔහු භය වී+ මෙසේද කීවේය. “මෙය මොන තරම් ගරුබිය+ දනවන තැනක්ද! මෙය දෙවිගේ ගෘහයයි!+ ස්වර්ගයේ දොරටුව තිබෙන්නේ මෙතැනයි.” 18 යාකොබ් පාන්දරින්ම නැඟිට තමා හිස තැබූ ගල ගෙන එය කණුවක් ලෙස එතැන සිටෙව්වේය. ඉන්පසු ඔහු ඒ මත තෙල් වත් කළේය.+ 19 ඔහු එතැනට බෙතෙල්*+ යන නම තැබීය. ඊට කලින් ඒ නුවරේ නම ලූෂ්ය.+
20 ඉන්පසු යාකොබ් පොරොන්දුවක්+ දෙමින් මෙසේ කීවේය. “දෙවි දිගටම මා සමඟ සිට මා යන මේ ගමනේදී මාව ආරක්ෂා කරමින් මට කන්න රොටි සහ අඳින්න වස්ත්‍ර දී,+ 21 අනතුරක් නොමැතිව මගේ පියාගේ නිවසට මට නැවත යන්න සැලැස්සුවොත්, යෙහෝවා දෙවි මගේ දෙවි+ බව එයින් ඔප්පු වෙයි. 22 කණුවක් ලෙස මම සිටවූ මේ ගල දෙවිගේ ගෘහය+ වනු ඇත. ඔබ දෙන සියල්ලෙන් දසයෙන් කොටසක්+ මම අනිවාර්යයෙන්ම ඔබට දෙන්නෙමි.”