උත්පත්ති
36 ඒදොම්+ ලෙසත් හඳුන්වනු ලැබූ ඒසව්ගේ ජීවිත කතාව මෙයයි.
2 ඒසව් කානාන් දේශයේ ස්ත්‍රීන්ව විවාහ කරගත්තේය.+ ඔහු විවාහ කරගත් ඒ ස්ත්‍රීන් නම්, හිත්තී ජාතික ඒලොන්ගේ+ දියණිය වූ ආදා+ සහ හිවීය ජාතික ෂිබියොන්ගේ මිනිපිරියද අනාගේ දියණියද වූ ඔහොලිබාමාය.+ 3 ඉෂ්මායෙල්ගේ දියණිය සහ නෙබායොත්ගේ+ සහෝදරිය වූ බසෙමත්වද+ ඔහු විවාහ කරගත්තේය.
4 ආදා ඒසව්ට දාව එලිෆස් බිහි කළාය. බසෙමත් රුවෙල් බිහි කළාය.
5 ඔහොලිබාමා යෙවුෂ්, යාලාම් සහ කෝරා බිහි කළාය.+
ඒ සියලුදෙනා කානාන් දේශයේදී ඒසව්ට දාව උපන් පුත්‍රයෝය. 6 ඉන්පසු ඒසව් තම සහෝදරයා වන යාකොබ්ගෙන් ඈත්ව වෙනත් ප්‍රදේශයකට ගොස් ජීවත් විය.+ ඔහු තම භාර්යාවන්වද තම දූපුතුන්වද තම නිවසේ ජීවත් වූ අන් සියලුදෙනාවද තම රැළද තමන් ළඟ සිටි අන් සියලු සතුන්වද කානාන් දේශයේ තමා රැස් කරගත් සියලු වස්තුවද රැගෙන ගියේය.+ 7 මන්ද එකට ජීවත් වීමට නොහැකි වන තරමටම ඔවුන්ගේ සම්පත් බොහෝ සෙයින් වැඩි වී තිබිණ. ඔවුන්ගේ සත්ව රැළවල් නිසා ඔවුන් විදේශිකයන් ලෙස ජීවත් වූ ඒ ප්‍රදේශයේ ඔවුන්ට ප්‍රමාණවත් ඉඩකඩ තිබුණේ නැත.+ 8 එබැවින් ඒසව් සේයිර්+ නමැති කඳුකර ප්‍රදේශයට ගොස් ජීවත් විය. ඒසව්ව ඒදොම්+ ලෙසද හඳුන්වනු ලැබීය.
9 සේයිර් නමැති කඳුකර ප්‍රදේශයේ ජීවත් වූ ඒදොම්වරුන්ගේ පියා වූ ඒසව්ගේ පෙළපත් වාර්තාව මෙයයි.+
10 ඒසව්ගේ පුත්‍රයන්ගේ නම් මතු දැක්වේ. ඒසව්ගේ භාර්යාව වූ ආදාගේ පුත්‍රයාගේ නම එලිෆස්ය. ඒසව්ගේ භාර්යාව වූ බසෙමත්ගේ පුත්‍රයාගේ නම රුවෙල්ය.+
11 එලිෆස්ගේ පුත්‍රයන්ගේ නම් තේමාන්,+ ඕමාර්, ෂෙපෝ, ගාතම් සහ කෙනෂ්+ යන අයයි. 12 ඒසව්ගේ පුත්‍රයා වන එලිෆස්ගේ උපභාර්යාව තිම්නාය.+ ඇය එලිෆස්ට දාව අමලෙක්+ බිහි කළාය. ඒ සියලුදෙනා ඒසව්ගේ භාර්යාව වූ ආදාගේ පුත්‍රයෝය.*
13 රුවෙල්ගේ පුත්‍රයන්ගේ නම් නාහත්, සේරා, ෂම්මාහ් සහ මිෂ්ෂා+ යන අයයි. ඒ සියලුදෙනා ඒසව්ගේ භාර්යාව වූ බසෙමත්ගේ+ පුත්‍රයෝය.*
14 ෂිබියොන්ගේ මිනිපිරිය සහ අනාගේ දියණිය වූ ඔහොලිබාමා ඒසව්ට දාව බිහි කළ පුත්‍රයන්ගේ නම් යෙවුෂ්, යාලාම් සහ කෝරාය.+
15 ඒසව්ගේ පුත්‍රයන් අතරින් බිහි වූ අධිපතීන්ගේ+ නම් මෙසේය. ඒසව්ගේ කුලුඳුලා වූ එලිෆස්ගේ පුත්‍රයන්ගෙන් පැවත ආ අධිපතීන් නම් තේමාන්,+ ඕමාර්, ෂෙපෝ, කෙනෂ්, 16 කෝරා, ගාතම් සහ අමලෙක් යන අයයි. එලිෆස්ගෙන් පැවත ආ ඒ සියලුදෙනා+ ඒදොම් දේශයේ අධිපතියෝ ලෙස කටයුතු කළෝය. ඒ සියලුදෙනා ආදාගෙන් පැවත ආ අයයි.
17 ඒසව්ගේ පුත් රුවෙල්ගේ පුත්‍රයන්ගේ නම් නාහත්, සේරා, ෂම්මාහ් සහ මිෂ්ෂාය. රුවෙල්ගෙන් පැවත ආ ඒ සියලුදෙනා ඒදොම් දේශයේ+ අධිපතියෝ ලෙස කටයුතු කළෝය. ඒ සියලුදෙනා ඒසව්ගේ භාර්යාව වූ බසෙමත්ගෙන් පැවත ආ අයයි.
18 ඒසව්ගේ භාර්යාව වූ ඔහොලිබාමාගේ පුත්‍රයන් නම් යෙවුෂ්, යාලාම් සහ කෝරා යන අයයි. ඒ සියලුදෙනා අනාගේ දියණියද ඒසව්ගේ භාර්යාවද වූ ඔහොලිබාමාගෙන් පැවත ආ අධිපතීහුය.
19 ඒදොම්+ ලෙසත් හැඳින්වෙන ඒසව්ගේ පුත්‍රයන්ගේද ඔවුන්ගෙන් පැවත ආ අධිපතීන්ගේද නම් ඒවාය.
20 ඒ දේශයේ ජීවත් වූ හෝරිවරුන්ගෙන් කෙනෙකු වන සේයිර්ගේ පුත්‍රයන්+ නම් ලොතන්, ෂෝබාල්, ෂිබියොන්, අනා,+ 21 දීෂොන්, එෂෙර් සහ දීෂන් යන අයයි.+ ඒදොම් දේශයේ සිටි සේයිර්ගේ පුත්‍රයන්ගෙන් පැවත ආ ඒ සියලුදෙනා හෝරිවරුන් අතරේ අධිපතියෝ ලෙස කටයුතු කළෝය.
22 ලොතන්ගේ පුත්‍රයන්ගේ නම් හෝරී සහ හෙමම්ය. ලොතන්ගේ සහෝදරියගේ නම තිම්නාය.+
23 ෂෝබාල්ගේ පුත්‍රයන් නම් අල්වාන්, මනහාත්, ඒබාල්, ෂෙපො සහ ඕනාම් යන අයයි.
24 ෂිබියොන්ගේ පුත්‍රයන්ගේ නම් ආයා සහ අනාය. තම පියා වන ෂිබියොන්ට අයිති බූරුවන්ව කාන්තාරයේදී රැකබලා ගනිමින් සිටියදී අනාට උණුදිය උල්පත් සම්බ විය.+
25 අනාගේ පුත්‍රයාගේ නම දීෂොන්ය. ඔහුගේ දියණියගේ නම ඔහොලිබාමාය.
26 දීෂොන්ගේ පුත්‍රයන්ගේ නම් හෙම්දන්, එෂ්බන්, ඉත්රාන් සහ කෙරන්ය.+
27 එෂෙර්ගේ පුත්‍රයන්ගේ නම් බිල්හාන්, සයවාන් සහ අකාන්ය.
28 දීෂන්ගේ පුත්‍රයන්ගේ නම් ඌෂ් සහ අරාන්ය.+
29 හෝරිවරුන්ගේ අධිපතීන් නම්, ලොතන්, ෂෝබාල්, ෂිබියොන්, අනා, 30 දීෂොන්, එෂෙර් සහ දීෂන් යන අයයි.+ ඒ සියලුදෙනා සේයිර් දේශයේ සිටි හෝරිවරුන් අතරේ අධිපතියෝ ලෙස කටයුතු කළෝය.
31 ඒදොම් දේශයේ පාලනය කළ රජවරුන්ගේ නම් මතු දැක්වේ.+ ඔවුන් දේශය පාලනය කළේ ඊශ්‍රායෙල්වරුන් රජ කෙනෙකුව පත් කරගැනීමට කලින්ය.+ 32 ප්‍රථමයා බෙයොර්ගේ පුත්‍රයා වූ බෙලාය.+ ඔහු පාලනය කළේ දින්හබා යන නුවරේ සිටය. 33 බෙලා මිය ගිය පසු ඔහු වෙනුවට බොෂ්රා නුවරෙන්+ පැමිණි සේරාගේ පුත්‍ර යෝබාබ් පාලනය කරන්න පටන්ගත්තේය.+ 34 යෝබාබ් මිය ගිය පසු ඔහු වෙනුවට තේමාන්වරුන්ගේ+ දේශයේ හූෂාම් රජකම් කරන්න පටන්ගත්තේය.+ 35 හූෂාම් මිය ගිය පසු ඔහු වෙනුවට මෝවබ් තණබිමෙහි+ මිදියන්ව+ පරාජය කළ බෙදද්ගේ පුත්‍ර හදද් රජකම් කරන්න පටන්ගත්තේය. ඔහුගේ නුවරේ නම අවිත්ය.+ 36 හදද් මිය ගිය පසු ඔහු වෙනුවට මස්රේකා නම් ස්ථානයෙන් පැමිණි සම්ලා රජකම් කරන්න පටන්ගත්තේය.+ 37 සම්ලා මිය ගිය පසු ඔහු වෙනුවට මහ ගඟ* අසබඩ පිහිටි රෙහොබොත් නම් ස්ථානයෙන් පැමිණි ෂාවුල් රජකම් කරන්න පටන්ගත්තේය.+ 38 ෂාවුල් මිය ගිය පසු ඔහු වෙනුවට අක්බොර්ගේ පුත්‍ර බාල්-හානාන් රජකම් කරන්න පටන්ගත්තේය.+ 39 අක්බොර්ගේ පුත්‍රයා වන බාල්-හානාන් මිය ගිය පසු ඔහු වෙනුවට හදර් රජකම් කරන්න පටන්ගත්තේය. ඔහු ජීවත් වූ නුවරේ නම පාව්ය. ඔහුගේ භාර්යාවගේ නම මෙහේටබෙල්ය. ඇය මේෂාහාබ්ගේ දියණිය වූ මාත්රෙද්ගේ දියණියයි.+
40 ඒසව්ගෙන් පැවත ආ අධිපතීන්ගේ නම් මතු දැක්වේ. ඔවුන් එක් එක් කෙනාගේ පවුල්වලට අනුවද ඔවුන් පාලනය කළ ප්‍රදේශවලට අනුවද ඔවුන්ගේ නම් මේවාය. තිම්නා, අල්වා, යේතෙත්,+ 41 ඔහොලිබාමා, ඒලාහ්, පීනොන්,+ 42 කෙනෂ්, තේමාන්, මිබ්ෂාර්,+ 43 මග්දියෙල් සහ ඊරාම්ය. ඔවුන්ට හිමි වූ දේශයේ+ ඔවුන් පාලනය කළ ස්ථානවලට අනුව ඒදොම්ගෙන් පැවත ආ අධිපතීහු ඔවුන්ය.+ ඒසව් ඒදොම්වරුන්ගේ පියාය.+