2 සාමුවෙල්
3 සාවුල්ගේ සෙනඟ හා දාවිත්ගේ සෙනඟ අතරේ තිබූ ගැටුම බොහෝ කාලයක් පුරා පැවතුණේය.+ දාවිත් වඩ වඩා බලවත් වූ අතර+ සාවුල්ගේ පෙළපතේ අයට තිබූ බලය ක්‍රමක්‍රමයෙන් අඩු වී ගියේය.+
2 හෙබ්‍රොන් නුවරෙහි+ ජීවත් වූ කාලයේදී දාවිත්ට පුත්‍රයෝ+ උපන්නෝය. ඔහුගේ වැඩිමල් පුත්‍රයාගේ නම අම්නොන්ය.+ ඔහුගේ මව යෙෂ්‍රෙයෙල්හි අහිනොවම්ය.+ 3 ඔහුගේ දෙවන පුත්‍රයාගේ නම කිලෙයාබ්ය.+ ඔහුගේ මව කර්මෙල්හි නාබල්ගේ භාර්යාවව සිටි අබිගායිල්ය.+ ඔහුගේ තුන්වන පුත්‍රයාගේ නම අබ්සලොම්ය.+ ඔහුගේ මව ගෙෂූර්හි රජු වූ තල්මයිගේ+ දියණිය වන මයකාය. 4 හග්ගිත්ගේ+ පුත්‍රයා වන අදොනියා+ ඔහුගේ හතරවන පුත්‍රයාය. අබිටල්ගේ පුත්‍රයා වන ෂෙපටියා+ ඔහුගේ පස්වන පුත්‍රයාය. 5 දාවිත්ගේ භාර්යාව වන එග්ලා බිහි කළ ඉත්රෙයාම්+ ඔහුගේ හයවන පුත්‍රයාය. ඒ සියලුදෙනා හෙබ්‍රොන්හිදී දාවිත්ට දාව උපන් පුත්‍රයෝය.
6 සාවුල්ගේ සෙනඟ හා දාවිත්ගේ සෙනඟ අතරේ දිගටම ගැටුම් පැවතුණේය. ඒ කාලයේදී අබ්නේර්+ සාවුල් රජුගේ නිවසේ තම බලය තහවුරු කරගනිමින් සිටියේය. 7 සාවුල් රජුට රිෂ්පා+ නම් වූ උපභාර්යාවක් සිටියාය. ඇය ආයාගේ+ දියණිය වූවාය. දවසක් ඉෂ්බෝෂෙත්,+ අබ්නේර්ගෙන් මෙසේ ඇසුවේය. “ඔබ මගේ පියාගේ උපභාර්යාව සමඟ සයනය කළේ ඇයි?”+ 8 එය ඇසූ විට අබ්නේර් ඉතා කෝප වී+ මෙසේ කීවේය. “මම යූදා දේශයෙන් ආපු බල්ලෙක් කියලා ඔබ හිතුවාද?+ මම අද වෙනකම්ම ඔබේ පියා වන සාවුල්ගේ ගෙයි වැසියන්ටත් ඔහුගේ සහෝදරයන්ටත් ඔහුගේ කිට්ටු මිතුරන්ටත් ප්‍රේමණීයව* සැලකුවා. මම ඔබව දාවිත්ගේ අතින් බේරගත්තා. මම එතරම් දේවල් ඔබේ පවුල වෙනුවෙන් කර තිබියදීත් ස්ත්‍රියක් නිසා ඔබ මට දොස් කියනවාද? 9 ඔබ මට කළ මේ අපහාසය නිසා යෙහෝවා දෙවි දාවිත්ට දුන් පොරොන්දුව+ ඒ විදිහටම ඉෂ්ට වන බවට මම වගබලා ගන්නවා. එහෙම කළේ නැත්නම් දෙවි මට දඬුවම් කළ යුතුයි.+ 10 මම සාවුල්ගේ පෙළපතින් රාජ්‍යය ගෙන එය දාවිත්ට දෙනවා. දාන් ඉඳන් බෙයර්-ෂෙබා දක්වා+ තිබෙන සියලුම පළාත් දාවිත්ට යටත් කර දී ඊශ්‍රායෙල් දේශය හා යූදා දේශය පුරාම ඔහුගේ රජකම මම ස්ථිර කරනවා.” 11 ඒ අවස්ථාවේදී ඉෂ්බෝෂෙත් අබ්නේර්ට භය වූ නිසා+ ඔහු ඒ සම්බන්ධයෙන් අබ්නේර්ට කිසිවක් කීවේ නැත.
12 එවෙලේම අබ්නේර් දාවිත් වෙත පණිවිඩකරුවන් යවා මෙසේ දැන්වූවේය. “මේ දේශය තියෙන්නේ කාගේ යටතේද? මා සමඟ ගිවිසුමක් ඇති කරගන්න. එවිට මම මුළු ඊශ්‍රායෙල් සෙනඟවම ඔබේ පැත්තට හරවගන්න උදව් කරන්නම්.”+ 13 දාවිත්ද ඔහුට මෙසේ කියා යැව්වේය. “මම ඒ යෝජනාවට එකඟයි. නමුත් අපි දෙන්නා ගිවිසුමක් ඇති කරගන්න කලින් ඔබ මගේ එක ඉල්ලීමක් ඉටු කරන්න ඕනේ. සාවුල් රජුගේ දුව වන මීකල්ව+ මගේ ළඟට එක්කගෙන එන්න. ඇය නැතුව මා ළඟට ඔබ එන්න එපා.”+ 14 දාවිත් සාවුල් රජුගේ පුත්‍රයා වන ඉෂ්බෝෂෙත්+ වෙත පණිවිඩකරුවන් යවා මෙසේ දැන්වූවේය. “මගේ භාර්යාව වන මීකල්ව මට ආපසු භාර දෙන්න. මම පිලිස්තියන් සියදෙනෙකුගේ චර්මාග්‍ර+ දීලයි ඇයව ලබාගත්තේ.” 15 එබැවින් ඉෂ්බෝෂෙත්, ලායිෂ්ගේ පුත්‍රයා වූද මීකල්ගේ පුරුෂයාද වන පල්තියෙල්+ වෙත මිනිසුන් යවා ඇයව ගෙන්වාගත්තේය. 16 නමුත් මීකල්ගේ පුරුෂයා හඬහඬා බහුරීම්+ දක්වාම ඇය පසුපස ඇවිදගෙන ආවේය. එවිට අබ්නේර්, “දැන් ගෙදර යන්න” කියා ඔහුට කීවේය. ඔහුද ආපසු හැරී ගෙදර ගියේය.
17 අබ්නේර් ඊශ්‍රායෙල්හි වැඩිමහල්ලන්ට පණිවිඩයක් යවා මෙසේ දැන්වූවේය. “ඔබ මුල ඉඳන්ම+ දාවිත්ව ඔබේ රජු ලෙස පත් කරගන්න උත්සාහ කළා. 18 ‘මගේ සෙනඟ වන ඊශ්‍රායෙල්වරුන්ව පිලිස්තිවරුන්ගේ අතින් හා අන් සියලු සතුරන්ගේ අතින් මම ගලවාගන්නේ මගේ සේවකයා වන දාවිත් මාර්ගයෙන්’+ කියා යෙහෝවා දෙවිම දාවිත්ට දන්වා තිබෙනවා. ඒ නිසා දැන් දාවිත්ට ඔබේ උපකාරය ලබා දෙන්න.” 19 ඉන්පසු අබ්නේර් බෙන්ජමින්වරුන්ටත්*+ ඒ සම්බන්ධයෙන් කතා කළේය. පසුව මේ කාරණයට ඊශ්‍රායෙල් සෙනඟ හා බෙන්ජමින්වරුන් එකඟ වූ බව දාවිත්ට දැන්වීම සඳහා ඔහු හෙබ්‍රොන් නුවරට ගියේය.
20 අබ්නේර් දාවිත්ව හමු වීමට හෙබ්‍රොන් වෙත ගියේ තවත් පුරුෂයන් විසිදෙනෙකු සමඟය. ඒ අවස්ථාවේදී දාවිත් ඔවුන් සියලුදෙනාටම භෝජන සංග්‍රහයක් පිළියෙල කළේය.+ 21 ඉන්පසු අබ්නේර් දාවිත්ට මෙසේ කීවේය. “මගේ ස්වාමීනි, රජතුමනි, මට දැන් යන්න අවසර දෙන්න. මම ගිහින් මුළු ඊශ්‍රායෙල් සෙනඟවම ඔබ වෙත රැස් කර ඔබ සමඟ ගිවිසුමක් ඇති කරගන්න කියලා ඔවුන්ට කියන්නම්. මුළු දේශයම ඔබට යටත් වෙයි. ඒ ගැන මට කිසිම සැකයක් නැහැ. ඔබේ හිතේ ආශාව+ ඉෂ්ට කරගන්න මම ඔබට උදව් කරන්නම්.” එබැවින් දාවිත්, අබ්නේර්ව සමාදානයෙන්+ පිටත් කර යැව්වේය.
22 ඉන්පසු දාවිත්ගේ සේවකයෝද යෝවාබ්ද සතුරන්ට පහර දී මහත් වස්තුවක් කොල්ල කා+ නැවත හෙබ්‍රොන් වෙත ආවෝය. ඒ වන විට දාවිත්, අබ්නේර්ව සමාදානයෙන් පිටත් කර යවා තිබිණ. 23 යෝවාබ්ද+ ඔහු සමඟ සිටි මුළු හමුදාවද හෙබ්‍රොන් වෙත පැමිණි විට යෝවාබ්ට මෙසේ දන්වනු ලැබීය. “නේර්ගේ+ පුත් අබ්නේර්,+ රජුව හමු වෙන්න ආවා. දැන් ටිකකට කලින් රජු ඔහුව සමාදානයෙන් පිටත් කර යැව්වා.” 24 එවිට යෝවාබ්, රජු වෙත ගොස් මෙසේ ඇසුවේය. “ඔබ මොනවද මේ කළේ?+ අබ්නේර් ඔබ ළඟට ආවාම ඔහුට කිසි දෙයක් නොකර යන්න දුන්නේ ඇයි? 25 නේර්ගේ පුත් අබ්නේර් මෙහෙට ආවේ ඔබව රවට්ටන්න කියලා ඔබ දන්නේ නැද්ද? ඔබ යන එන ගමන් ගැන+ සහ ඔබ කරන හැම දෙයක් ගැනම දැනගන්නයි ඔහු මෙහෙට ආවේ.”+
26 ඉන්පසු යෝවාබ්, දාවිත් වෙතින් පිටත්ව ඇවිත් පණිවිඩකරුවන් යවා අබ්නේර්ව නැවත ගෙන්වාගත්තේය.+ නමුත් දාවිත් ඒ ගැන කිසිවක් දැන සිටියේ නැත. යෝවාබ්ගෙන් පණිවිඩය ලැබෙන විට අබ්නේර් සිටියේ සිරාහි පොකුණ ළඟය. 27 ඔහු ආපසු හෙබ්‍රොන් නුවරට+ ආවේය. එවිට යෝවාබ්, අබ්නේර් සමඟ රහසින් යමක් කතා කරන+ මුවාවෙන් ඔහුව නුවර දොරටුව වෙත ගෙන ගියේය. නමුත් දොරටුව ළඟදී ඔහු අබ්නේර්ගේ බඩට ඇන+ ඔහුව මරා දැමුවේය. මෙසේ යෝවාබ් තම සහෝදරයා වන අසහෙල් වෙනුවෙන් පළිගත්තේය.+ 28 දාවිත්ට ඒ ගැන ආරංචි වූ විට ඔහු මෙසේ කීවේය. “නේර්ගේ පුත්‍රයා වන අබ්නේර්ගේ මරණයට මමවත් මගේ රාජ්‍යයවත් සම්බන්ධ නැහැ.+ ඒ කාරණයේදී යෙහෝවා දෙවි ඉදිරියේ අපි හැමදාටම නිර්දෝෂයි. 29 අබ්නේර්ගේ ලේවලට වන්දි ගෙවිය යුත්තේ+ යෝවාබ් සහ ඔහුගේ පවුලේ අයයි. යෝවාබ් කළ ඒ දේ නිසා ලිංගේන්ද්‍රියේ රෝගයකින්+ හෝ ලාදුරු රෝගයෙන්+ හෝ කුසගින්නෙන් පෙළෙන කෙනෙක් ඔහුගේ පවුලේ+ හැමදාමත් සිටීවා! එහෙමත් නැත්නම් කඩුවෙන් මැරුම් කන හෝ නූල් කටින තත්වයට පත් වන පුරුෂයෙක්+ හැමදාමත් ඔහුගේ පවුලේ සිටීවා!”+ 30 යෝවාබ් සහ ඔහුගේ සහෝදර අබිෂයි,+ අබ්නේර්ව+ මරා දැමුවේ ඔහු ඔවුන්ගේ සහෝදරයා වූ අසහෙල්ව ගිබියොන්හි කළ සටනේදී මරා දැමූ නිසාය.+
31 පසුව දාවිත් යෝවාබ්ට සහ ඔහු සමඟ සිටි සියලුදෙනාට මෙසේ කීවේය. “ඔබ වස්ත්‍ර ඉරාගෙන+ ගෝණි රෙදි ඇඳගන්න.+ අබ්නේර් වෙනුවෙන් වැලපෙන්න.” අබ්නේර්ගේ මළ සිරුර රැගෙන යන විට දාවිත් රජද ඒ පිටුපස ගමන් කළේය. 32 ඔවුහු හෙබ්‍රොන්හිදී අබ්නේර්ව තැන්පත් කළෝය. ඒ අවස්ථාවේදී රජද මුළු සෙනඟද හඬා වැලපුණෝය.+ 33 රජ, අබ්නේර් ගැන විලාප ගීයක්ද ගයමින් මෙසේ කීවේය.
“අබ්නේර්, ඔබ කාලකණ්ණියෙකු+ මෙන් මිය ගියේ ඇයි?
34 කිසිදා ඔබේ අත්වලට මාංචු දමා නොතිබුණේය.+
ඔබේ පාදවලට තඹ විලංගු දමා නොතිබුණේය.+
නමුත් ඔබ වැටී ගියේ දුෂ්ටයන් ඉදිරියේ යමෙකු වැටී යන්නාක් මෙනි.”+
එම ගීය ඇසූ පසු මුළු සෙනඟ නැවත හඬන්න පටන්ගත්තෝය.+
35 දහවල් වේලාවේදී සෙනඟ දාවිත් වෙත පැමිණ ඔහුව සනසන පිණිස ඔහුට කෑම දුන්නෝය.+ නමුත් දාවිත් ඔවුන්ට මෙසේ කීවේය. “ඉර බහින්න පෙර+ මම මොනවා හරි කටේ තිබ්බොත් දෙවි මට දඬුවම් කරන්න ඕනේ.”+ 36 සෙනඟ ඔහු දුකෙන් සිටින බව දැක ඔහුගේ කීමට එකඟ වූහ. රජු කළ සෑම දෙයකටම ඔවුන් එකඟ වූවාක් මෙන් මේ කාරණයේදීත් ඔවුහු එකඟ වූහ.+ 37 නේර්ගේ පුත්‍රයා වන අබ්නේර්ව මරා දැමීමට සැලසුම් කළේ දාවිත් නොවන බව දාවිත්ට සහයෝගය දුන් සෙනඟ හා ඊශ්‍රායෙල්හි සියලු වැසියෝ තේරුම්ගත්තෝය.+ 38 රජ ඔහුගේ සේවකයන්ට මෙසේ කීවේය. “අද ඊශ්‍රායෙල්හි මිය ගියේ අධිපතියෙක්. ශ්‍රේෂ්ඨ මනුෂ්‍යයෙක්.+ 39 මාව රජු හැටියට පත් කර තිබුණත්+ මට ෂෙරුයියාගේ පුත්‍රයන්ට+ විරුද්ධ වෙන්න තරම් ශක්තියක් නැහැ.+ ඔවුන් හරිම දරුණුයි. ඔවුන් කළ දුෂ්ටකම්වලට යෙහෝවා දෙවිගෙන් සුදුසු දඬුවමක් ඔවුන්ට ලැබේවා!”+