1 රාජාවලිය

14 යෙරොබොවම් රජුගේ පුත් අබියා අසනීප විය.+ 2 ඒ නිසා යෙරොබොවම් රජ තම බිරිඳට මෙසේ කීවේය. “ඔබ මගේ බිරිඳ බව කාටවත් අඳුනගන්න නොහැකි වන සේ වෙස්වලා ගෙන+ අනාගතවක්තෘ අහියාව+ හමු වීමට ෂීලෝ නගරයට යන්න. මම මේ ජනතාවගේ රජ්ජුරුවන් වෙනවා කියා මට අනාවැකි කිව්වේ+ අනාගතවක්තෘ අහියා. 3 ඔහුට දෙන්න රොටි දහයකුත්+ රස කැවිලි ටිකකුත් මීපැණි බඳුනකුත්+ රැගෙන යන්න.+ දරුවාට කුමක් වෙයිද කියා හරියටම කියන්න පුළුවන් ඔහුට විතරයි.”+

4 යෙරොබොවම් රජුගේ බිරිඳ ඔහු කී ලෙස කළාය. ඈ ෂීලෝ නගරයට+ ගොස් අහියාගේ නිවස සොයාගත්තාය. අහියා බොහෝ මහලුව සිටි හෙයින් ඔහුගේ ඇස් පෙනීම හොඳටම දුර්වල වී තිබුණේය.+

5 යෙරොබොවම් රජුගේ බිරිඳ පැමිණීමට පෙර යෙහෝවා දෙවි අහියාට මෙසේ කියා තිබිණ. “යෙරොබොවම්ගේ පුත්‍රයාට අසනීපයි. එබැවින් ඔහුගේ බිරිඳ පුතාට කුමක් වෙයිද කියා දැනගැනීම සඳහා ඔබව හමු වීමට පැමිණෙයි. ඇය කිසිවෙකුට අඳුනගන්න නොහැකි වන සේ වෙස්වලා ගෙනයි සිටින්නේ.+ ඇයට කිව යුතු දේ මම ඔබට කියා දෙන්නම්.”

6 දොරකඩින් ඇතුල් වන ඇගේ අඩි ශබ්දය අහියාට ඇසුණු වහාම ඔහු මෙසේ කීවේය. “ඇතුළට එන්න. කාටවත් අඳුනගන්න නොහැකි වන සේ ඔබ වෙස්වලා ගෙන සිටියත් ඔබ යෙරොබොවම් රජුගේ බිරිඳ කියා මම දන්නවා.+ ඔබට කියන්න නරක ආරංචියක් තියෙනවා. 7 ඔබ ගිහින් යෙරොබොවම් රජුට මෙහෙම කියන්න. ‘ඊශ්‍රායෙල්වරුන්ගේ දෙවි වන යෙහෝවා ඔබට මෙහෙම කියනවා. “මම ඔබේ සෙනඟ අතරින් ඔබව තෝරාගෙන, මාගේ සෙනඟ වන ඊශ්‍රායෙල්වරුන්ව පාලනය කරන්න ඔබව පත් කළෙමි.+ 8 මම රාජ්‍යය දාවිත්ගේ පෙළපතින් රැගෙන+ ඔබට දුනිමි. නමුත් ඔබ, මා යහපත්යයි සලකන දේ පමණක් කරමින් මුළු හදවතින්ම මාගේ ආඥාවලට කීකරු වූ මාගේ සේවක දාවිත් මෙන් ක්‍රියා කළේ නැත.+ 9 ඔබට කලින් ජීවත් වූ අන් සියලුදෙනාටත් වඩා දුෂ්ට ලෙස ඔබ හැසිරුණෙහිය. ඔබ මට පිටුපාමින්+ මාව උදහස් කරවීමට වෙනත් දෙවියෙකුව සාදාගත්තෙහිය.+ දේවතා රූපද+ ඇඹුවෙහිය. එයින් ඔබ මට කළේ මහත් නින්දාවකි.+ 10 එබැවින් මම දැන් ඔබේ ගෙයි වැසියන් පිටට විපතක් ගෙනෙන්නෙමි. ඔබේ පවුලට අයත් ලොකු කුඩා සියලුම පුරුෂයන්ව මම විනාශ කර දමන්නෙමි.+ කිසි කමකට නැති පුරුෂයන්+ එක් කෙනෙකුවත් මම ඊශ්‍රායෙල් දේශයේ ඉතුරු නොකරන්නෙමි.+ ගොම ඉවත් කරන්නාක් මෙන් ඔවුන්වද දේශයෙන් ඉවත් කර දමන්නෙමි.+ 11 යෙරොබොවම්ගේ පවුලට අයත් යමෙක් නුවර තුළ මිය ගියොත් ඔහුගේ මළ සිරුර බල්ලෝ කා දමන්නෝය.+ යමෙක් නුවරෙන් පිටතදී මිය ගියොත් ඔහුගේ මළ සිරුර පක්ෂීහු කා දමන්නෝය.+ මේ දේවල් පැවසුවේ යෙහෝවා දෙවිය. එබැවින් ඒ සියල්ල ඉටු වන බව ස්ථිරය.”’

12 “දැන් ඔබ ගෙදර යන්න. ඔබ නුවරට ඇතුල් වූ වහාම දරුවා මිය යයි. 13 ඊශ්‍රායෙල්හි සියලුදෙනා ඔහු ගැන හඬා වැලපී+ ඔහුව තැන්පත් කරයි. මන්ද යෙරොබොවම් රජුගේ ගෙයි වැසියන් අතරින් යම් හොඳ ගුණාංගයක් තියෙන එකම තැනැත්තා ඔහුයි. ඊශ්‍රායෙල්වරුන්ගේ දෙවි වන යෙහෝවා එය දැක තිබෙන නිසා යෙරොබොවම් රජුගේ පවුලට අයිති අයගෙන් ගෞරවාන්විත ලෙස තැන්පත් කරනු ලබන්නේ ඔහුව පමණයි.+ 14 යෙරොබොවම් රජුගේ පවුල විනාශ කර දමන්න යෙහෝවා දෙවි ඊශ්‍රායෙල්හි රජෙකුව පත් කරයි.+ අවශ්‍ය නම් ඔහුට අදම වුණත් ඒ දේ කරන්න පුළුවන්.+ 15 ඊශ්‍රායෙල්වරු නමස්කාරය සඳහා කුලුනු+ සාදාගෙන යෙහෝවා දෙවිව උදහසට පත් කළ නිසා+ යෙහෝවා දෙවි ඊශ්‍රායෙල්වරුන්ට පහර දෙනවා. එවිට ඔවුන්ගේ ජීවිත ජලයේ ඒ මේ අත ගසාගෙන යන බට ලීයක් මෙන් අස්ථිර වෙයි.+ දෙවි ඔවුන්ගේ මුතුන්මිත්තන්ට දුන් මේ සරුසාර දේශයෙන්+ ඊශ්‍රායෙල්වරුන්ව පන්නා දමා,+ මහ ගඟෙන්*+ එගොඩට ඔවුන්ව විසුරුවාහරිනවා.+ 16 යෙරොබොවම් රජු කළ පාපය නිසාත් ඔහු ඊශ්‍රායෙල්වරුන්ව පාපයට පෙලඹවූ නිසාත්+ දෙවි ඔවුන් සියල්ලන්ව අත්හරිනවා.”+

17 ඉන්පසු යෙරොබොවම් රජුගේ බිරිඳ එතැනින් පිටත්ව තිර්ෂා නගරයට+ ගියාය. ඇය තම නිවසේ දොරකඩට ළං වෙත්ම දරුවා මිය ගියේය. 18 යෙහෝවා දෙවි තම සේවකයා වූ අනාගතවක්තෘ අහියා මාර්ගයෙන් කී ලෙසම ඔහුව තැන්පත් කරනු ලැබීය. ඊශ්‍රායෙල්හි සැමදෙනාම ඔහු නිසා හඬා වැලපුණෝය.

19 යෙරොබොවම් රජුගේ ජීවිතයේ අනිකුත් සිදුවීම් ගැන එනම්, ඔහු යුද්ධ කළ ආකාරය+ ගැන හා ඔහු රජකම් කළ ආකාරය ගැන ඊශ්‍රායෙල්හි රජවරුන්ගේ ඉතිහාසය ගැන වාර්තා කර ඇති ලියවිල්ලෙහි සඳහන් කර තිබේ.+ 20 යෙරොබොවම් අවුරුදු විසිදෙකක් රජකම් කළේය. කල් යත්ම යෙරොබොවම් රජ මිය ගියේය. ඔහුගේ මුතුන්මිත්තන් මෙන් ඔහුවද තැන්පත් කරන ලදි.+ ඔහුගෙන් පසු ඔහුගේ පුත් නාදාබ්+ රජකමට පත් විය.

21 සලමොන්ගේ පුත් රෙහබෝවම්+ යූදාහි රජකමට පත් විය. රෙහබෝවම් රජකමට පත් වන විට ඔහුගේ වයස අවුරුදු හතළිස්එකකි. ඊශ්‍රායෙල්හි සියලු ගෝත්‍රවලට අයත් නුවරවල් අතරින් යෙහෝවා දෙවි තම නාමය+ වෙනුවෙන් තෝරාගත්+ නුවර වන යෙරුසලමේ සිට ඔහු අවුරුදු දහහතක් පාලනය කළේය.+ ඔහුගේ මව අම්මොන් ජාතික ස්ත්‍රියකි. ඇගේ නම නයමාය.+ 22 යූදා දේශයේ වැසියෝ යෙහෝවා දෙවි පිළිකුල් කළ දේ කළෝය.+ ඔවුහු කලින් පරම්පරාවලදී පව් කළ තමන්ගේ සියලු මුතුන්මිත්තන්ටත් වඩා වැඩියෙන් දෙවිට ද්‍රෝහිකම් කරමින්+ ඔහුව උදහස් කළෝය.+ 23 ඔවුහුද සෑම කඳු මුදුනකම+ සහ සරුසාරව වැඩුණු සෑම ගසක් යටම+ පූජනීය ස්ථානත්+ නමස්කාරය සඳහා කණු+ සහ කුලුනුත්+ සෑදුවෝය. 24 ඒ දේශයේ පිහිටි දේවාලවල මුදලට සමලිංගික සේවනයේ යෙදුණු පිරිමි පවා සිටියෝය.+ යෙහෝවා දෙවි ඊශ්‍රායෙල්වරුන් වෙතින් පන්නා දැමූ ජාතීන් කළ සෑම පිළිකුල් ක්‍රියාවක්ම ඊශ්‍රායෙල්වරුද කළෝය.+

25 රෙහබෝවම් රජකම් කළ පස්වන අවුරුද්දේදී ඊජිප්තුවේ රජු වූ ෂීෂක්+ යෙරුසලම ආක්‍රමණය කර, 26 යෙහෝවා දෙවිගේ ගෘහයේ තිබුණු වස්තු හා රජමාලිගාවේ තිබුණු වස්තු+ ඇතුළු සියලු දේ පැහැරගත්තේය.+ සලමොන් රජු සෑදූ රන් පලිස් සියල්ලද ඔහු ගෙන ගියේය.+ 27 පසුව රෙහබෝවම් රජ ඒ වෙනුවට තඹ පලිස් සාදා ඒවා ආරක්ෂා කිරීම සඳහා+ රජමාලිගාවේ දොරටු පාලකයන්ගේ ප්‍රධානීන්ව පත් කළේය.+ 28 රජු, යෙහෝවා දෙවිගේ ගෘහයට ගිය සෑම අවස්ථාවකදීම ඒ මුරකරුවෝ එම පලිස් ගෙනාවෝය. ඔහු පිටත්ව ගිය පසු ඔවුහු ඒවා නැවත මුරකුටිවල තැබුවෝය.+

29 රෙහබෝවම් රජුගේ ජීවිතයේ අනිකුත් සිදුවීම්ද ඔහු කළ සියල්ලද යූදාහි රජවරුන්ගේ ඉතිහාසය ගැන වාර්තා කර ඇති ලියවිල්ලෙහි සඳහන් කර තිබේ.+ 30 රෙහබෝවම් රජු සහ යෙරොබොවම් රජු අතර නිතරම යුද්ධ පැවතිණ.+ 31 අවසානයේදී රෙහබෝවම් රජු මිය ගිය අතර ඔහුගේ මුතුන්මිත්තන් මෙන් ඔහුවද දාවිත්ගේ නුවරෙහි තැන්පත් කරනු ලැබීය.+ ඔහුගේ මව අම්මොන් ජාතික නයමාය.+ ඔහුගෙන් පසු ඔහුගේ පුත් අබියාම්+ රජකමට පත් විය.