1 රාජාවලිය

22 අවුරුදු තුනක් පුරා සිරියානු ජාතිකයන් සහ ඊශ්‍රායෙල්වරුන් අතර කිසිදු ගැටුමක් නොතිබිණ. 2 තුන්වන අවුරුද්දේදී යූදාහි රජු වූ යෙහෝෂපාට්+ ඊශ්‍රායෙල්හි රජුව හමු වීමට ගියේය. 3 එවිට ඊශ්‍රායෙල්හි රජ තම සේවකයන්ට මෙසේ පැවසීය. “රාමොත්-ගිලියද්+ ඇත්තටම අයිති අපට බව ඔබ දන්නවාද? නමුත් සිරියාවේ රජුගෙන් එය නැවත ලබාගන්න අප තවමත් පියවර ගෙන නැහැ.” 4 ඉන්පසු ඔහු යෙහෝෂපාට් රජු වෙතට හැරී, “රාමොත්-ගිලියද් වෙනුවෙන් සටන් කරන්න ඔබ මා සමඟ එනවාද”+ කියා ඇසුවේය. එවිට යෙහෝෂපාට් රජ ඊශ්‍රායෙල්හි රජුට මෙසේ කීවේය. “මම ඔබ සමඟ එන්නම්. මගේ හමුදාව ඔබේ හමුදාව කියා සිතන්න.+ මගේ අශ්වයන් ඔබේ අශ්වයන් කියා සිතන්න.”

5 නමුත් යෙහෝෂපාට් රජ, “යුද්ධයට යන්න කලින් යෙහෝවා දෙවිගෙන් ඒ ගැන විමසා බලමුද”+ කියා ඊශ්‍රායෙල්හි රජුගෙන් ඇසීය. 6 එබැවින් ඊශ්‍රායෙල්හි රජ, අනාගතවක්තෘවරුන් හාරසියදෙනෙකු පමණ රැස් කර,+ “රාමොත්-ගිලියද් නිදහස් කරගැනීමට මම යුද්ධයට යන්නද එපාද කියා මට කියන්න” යයි ඔවුන්ට කීවේය. ඔවුහුද, “යන්න.+ රජතුමාට ඒ නගරය අල්ලගන්න යෙහෝවා දෙවි උදව් කරන බවට සැකයක් නැහැ” කියා පිළිතුරු දුන්නෝය.

7 නමුත් යෙහෝෂපාට් රජ ඒ ගැන සෑහීමට පත් නොවී, “යෙහෝවා දෙවිගෙන් මේ කාරණය ගැන හරියට දැනගෙන කියන්න පුළුවන් වෙනත් අනාගතවක්තෘවරයෙක් මෙහි නැද්ද”+ කියා ඇසුවේය. 8 එවිට ඊශ්‍රායෙල්හි රජ යෙහෝෂපාට් රජුට මෙසේ කීවේය. “මේ ගැන යෙහෝවා දෙවිගෙන් අහන්න පුළුවන් තව එක මිනිසෙක් ඉන්නවා.+ නමුත් මම ඔහුට කොහොමටවත් කැමති නැහැ.+ ඔහු මා ගැන කියන්නෙම නරක අනාවැකි.+ ඔහු මා ගැන හොඳ අනාවැකියක් කියනවා මම අහලම නැහැ. ඔහු තමයි ඉම්ලාහ්ගේ පුත් මිකායා.” මෙය ඇසූ යෙහෝෂපාට් රජ, “එහෙම කියන්න එපා. අපි ඔහුගෙනුත් අසා බලමු”+ කියා පැවසුවේය.

9 එබැවින් ඊශ්‍රායෙල්හි රජ තම මාලිගාවේ සේවය කළ නිලධාරියෙකුව+ කැඳවා, “වහාම ඉම්ලාහ්ගේ පුත් මිකායාව මෙතැනට කැඳවාගෙන එන්න”+ යයි කීවේය. 10 ඒ අවස්ථාවේදී ඊශ්‍රායෙල්හි රජද යූදාහි රජු වූ යෙහෝෂපාට්ද රාජකීය වස්ත්‍රවලින් සැරසී,+ සමාරියේ දොරටුව අසල තිබූ කමතේ තම තමන්ගේ සිංහාසන තබා එහි හිඳගෙන සිටියෝය. අනාගතවක්තෘවරු සියලුදෙනා ඔවුන් ඉදිරියේ අනාවැකි පළ කරමින් සිටියෝය.+ 11 එවිට කෙනානාගේ පුත් ශෙදකියා යකඩ අං දෙකක් සාදා මෙසේ කීවේය. “‘ඔබ සිරියානුවන්ට මේ අංවලින් ඇන ඔවුන්ව සම්පූර්ණයෙන්ම නැති කර දමනවා’+ කියා යෙහෝවා දෙවි පැවසුවා.”+ 12 අන් සියලු අනාගතවක්තෘවරුද ඒ හා සමාන අනාවැකි කියමින්, “ඔබ රාමොත්-ගිලියද් නගරයට යන්න. ජය ගන්නවා නියතයි. රජතුමාට ඒ නගරය අල්ලගන්න යෙහෝවා දෙවි උදව් කරන බව ස්ථිරයි”+ කියා කීවෝය.

13 මිකායාව කැඳවාගෙන එන්න ගිය පණිවිඩකරු මිකායාව හමු වී ඔහුට මෙසේ කීවේය. “අනාගතවක්තෘවරුන් සියලුදෙනාම කියන්නේ රජතුමා සාර්ථක වන බවයි. ඉතින් ඔබත් ඔවුන් කියන දේට සමාන දෙයක් කියන්න.”+ 14 නමුත් මිකායා, “යෙහෝවා දෙවි මට කියන දෙයක් මිස වෙන කිසිම දෙයක් කියන්න නම් මට බැහැ.+ මම ඒ ගැන ඔබට ජීවමාන දෙවි වන යෙහෝවාගේ නමින්ම දිවුරා කියන්නම්”+ යයි කීවේය. 15 පසුව මිකායා, රජු ඉදිරියට පැමිණි විට රජ මෙසේ ඇසුවේය. “මිකායා, රාමොත්-ගිලියද් නගරයට ගිහින් අපි යුද්ධ කරන්නද?” ඒ අවස්ථාවේදී මිකායා රජුට මෙසේ කීවේය. “යන්න, ඔබ ජය ගන්නවා නියතයි. රජතුමාට ඒ නගරය අල්ලගන්න යෙහෝවා දෙවි උදව් කරයි.”+ 16 එවිට රජ, “යෙහෝවා දෙවිගේ නාමයෙන් දිවුරා මට ඇත්ත කියන්න කියා මම ඔබට කී වතාවක් කියා තිබෙනවාද”+ කියා ඔහුගෙන් ඇසීය. 17 එවිට මිකායා මෙසේ පැවසුවේය. “එඬේරෙක් නැති බැටළුවන් මෙන්+ ඊශ්‍රායෙල්වරු කඳුකරයේ ඒ මේ අත විසිර සිටින ආකාරය මට පෙනෙනවා.+ ඒ ගැන යෙහෝවා දෙවි මෙසේ පවසනවා. ‘ඔවුන්ව බලාගැනීමට ස්වාමිවරු නැත. එබැවින් ඔවුන් එක් එක් කෙනාට තම තමන්ගේ නිවෙස්වලට සමාදානයෙන් යන්න ඉඩ දෙන්න.’”+

18 එවිට ඊශ්‍රායෙල්හි රජ, යෙහෝෂපාට් රජුට මෙසේ කීවේය. “‘ඔහු මා ගැන කිව්වොත් කියන්නේ නරක දෙයක්. ඔහු මා ගැන හොඳ අනාවැකියක් කියනවා මම කවදාවත් අහලම නැහැ’ කියා මම ඔබට කිව්වේ නැද්ද?”+

19 නමුත් මිකායා මෙසේ කීවේය. “යෙහෝවා දෙවිගේ පණිවිඩයට සවන් දෙන්න.+ යෙහෝවා දෙවි තම සිංහාසනයේ ඉඳගෙන සිටිනවා මම දුටුවා.+ ස්වර්ගයේ සේනාවන් ඔහුගේ දකුණු පැත්තෙන් හා වම් පැත්තෙන් සිටිනවාත් මම දුටුවා.+ 20 එවිට යෙහෝවා දෙවි මෙසේ ඇසුවා. ‘ආහබ්, රාමොත්-ගිලියද් නගරයට ගොස් යුද්ධ කර, එහිදී මිය යන පිණිස එහි යෑමට ඔහුව පොලඹවන්න ඉදිරිපත් වෙන්නේ කවුද?’ එවිට ඔහු ඉදිරියේ සිටි අය නොයෙක් අදහස් ප්‍රකාශ කළා.+ 21 අන්තිමේදී එක දේවදූතයෙක්*+ යෙහෝවා දෙවි ඉදිරියට ඇවිත්, ‘මම ඔහුව රවට්ටන්නම්’ කියා පැවසුවා. එවිට යෙහෝවා දෙවි, ‘ඔබ කොහොමද ඒ දේ කරන්නේ’+ කියා ඔහුගෙන් ඇසුවා. 22 ඔහු මෙසේ පැවසුවා. ‘මම ගිහින් ඔහුගේ අනාගතවක්තෘවරුන් සියලුදෙනා+ මාර්ගයෙන් ඔහුව රවට්ටන්නම්.’ එවිට දෙවි, ‘හොඳයි, ඔබ ගිහින් ඔහුව රවට්ටන්න.+ ඔබේ වෑයම සාර්ථක වෙයි’+ කියා පැවසුවා. 23 ඒ නිසයි යෙහෝවා දෙවි දේවදූතයාට ඉඩ දුන්නේ අනාගතවක්තෘවරුන් මාර්ගයෙන් ඔබට ඒ විදිහට දේවල් පවසන්න.+ නමුත් ඇත්තටම යෙහෝවා දෙවි තීරණය කර තිබෙන්නේ ඔබට විපතක් ගෙනෙන්නයි.”+

24 එවිට කෙනානාගේ පුත් ශෙදකියා, මිකායාට කම්මුල් පහරක් දී+ මෙසේ කීවේය. “යෙහෝවා දෙවිගේ දූතයා මා සමඟ කතා නොකර ඔබට ඒ පණිවිඩය දුන්නා කියාද ඔබ කියන්නේ?”+ 25 මිකායාද, “ළඟදීම මම කියූ දේ ඇත්තක් කියා ඔබ තේරුම්ගනියි. නමුත් එදාට ඔබට සිදු වෙන්නේ ඇතුල් කාමරයට+ ගොස් සැඟවී සිටින්නයි”+ කියා කීවේය. 26 එවිට ඊශ්‍රායෙල්හි රජ මෙසේ කීවේය. “මිකායාව රැගෙන ගිහින් නගරයේ ප්‍රධානියා වන ආමොන්ට හා රජුගේ පුත් යෝවාෂ්ට භාර දෙන්න.+ 27 මම කියන මේ දේ ඔබ ඔවුන්ට දැන්විය යුතුයි. ‘“මම ජය ගෙන එන තෙක්+ මොහුව සිරගෙහි තබාගන්න.+ වැඩිය කන්න බොන්න දෙන්න එපා”+ කියා රජතුමා පැවසුවා.’”+ 28 ඊට මිකායා මෙසේ කීවේය. “ඔබ මේ යුද්ධයෙන් ජය ගෙන ආවොත් යෙහෝවා දෙවි මා සමඟ කතා කළේ නැහැ කියා මම පිළිගන්නම්.”+ තවදුරටත් මිකායා මෙසේ කීවේය. “ජනයෙනි, මා මේ දේවල් කියන්නේ ඔබ සියලුදෙනා ඉදිරිපිටයි.”+

29 පසුව ඊශ්‍රායෙල්හි රජද යූදාහි රජු වූ යෙහෝෂපාට්ද රාමොත්-ගිලියද් බලා පිටත් වුණෝය.+ 30 ඊශ්‍රායෙල්හි රජ යෙහෝෂපාට් රජුට මෙසේ කීවේය. “මම වෙස්වලා ගෙන යුද්ධ කරන්නම්.+ නමුත් ඔබ රාජකීය වස්ත්‍ර පැළඳගෙන+ යුද්ධයට යන්න.” ඊශ්‍රායෙල්හි රජ එලෙස වෙස්වලා ගෙන+ යුද්ධයට ගියේය.+ 31 ඒ අතරතුර සිරියාවේ රජ, තමන්ගේ අශ්ව රථ සේනා පාලනය කළ අධිපතීන් තිස්දෙදෙනාට+ මෙසේ අණ කර තිබිණ. “ඔවුන්ගේ සේනාවල සිටින ලොකු පොඩි කාගෙන්වත් මට වැඩක් නැහැ. ඔබ ඊශ්‍රායෙල්හි රජුව සොයාගෙන ඔහුට පහර දිය යුතුයි.”+ 32 අශ්ව රථ සේනා පාලනය කළ අධිපතීහු යෙහෝෂපාට් රජුව දුටු විට, “අර ඉන්නේ ඊශ්‍රායෙල්හි රජ්ජුරුවෝ”+ කියා තම තමන් අතරේ කියාගත්තෝය. එබැවින් ඔවුහු සියලුදෙනාම ඔහු සිටි දිශාවට හැරී ඔහුට පහර දීමට සූදානම් වූහ. මෙය වටහාගත් යෙහෝෂපාට් රජ උපකාරය පතා කෑගැසුවේය.+ 33 ඔහු ඊශ්‍රායෙල්හි රජු නොවන බව අශ්ව රථ සේනා පාලනය කළ අධිපතීන් දැනගත් විට ඔවුහු තවදුරටත් ඔහු පසුපස ගියේ නැත.+

34 යුද්ධය පවතින අතරතුර ඊශ්‍රායෙල්හි රජු පැළඳ සිටි ආයුධ කට්ටලයේ තිබූ හිදැසක් තුළින් ඊතලයක් පැමිණ ඔහුට වැදුණේය. ඔහු ඊශ්‍රායෙල්හි රජු බව ඒ ඊතලය විද්ද තැනැත්තා දැන සිටියේ නැත. එවිට රජ තම අශ්ව රථය පදවමින් සිටි තැනැත්තාට මෙසේ කීවේය.+ “මට හොඳටම තුවාලයි. මාව යුධ බිමෙන් පිටතට ගෙන යන්න.” 35 එදින යුද්ධය තව තවත් උග්‍ර වූ නිසා රජුව යුධ බිමෙන් ඉවතට ගෙන යෑමට නොහැකි විය. තම සේවකයන්ගේ උපකාරය ඇතුව ඔහු සිරියානු හමුදාව දෙසට මුහුණ ලා අශ්ව රථයේ සිටගෙන සිටියේය. ඔහුගේ තුවාලෙන් වැගිරුණු ලේ අශ්ව රථය පුරා ගලා ගියේය.+ සවස් වන විට ඔහු මිය ගියේය.+ 36 හිරු බැස යන වේලාවේදී පමණ, “දැන් සියල්ල අවසන්. එක් එක් කෙනා තම තමාගේ නගරයටත් තම තමාගේ ගමටත් හැරී යන්න”+ කියා යුධ බිම පුරා නිවේදනය කළේය. 37 රජු මිය ගිය පසු ඔවුහු ඔහුගේ මළ සිරුර සමාරියට ගෙනැවිත් එහි තැන්පත් කළෝය.+ 38 පසුව ඔවුහු සමාරියේ පිහිටි පොකුණකින් වතුර රැගෙන ඒ අශ්ව රථයේ තිබූ ලේ සෝදාහැරියෝය. (ඒ පොකුණ ගණිකාවන් ස්නානය කරන තැනකි.) යෙහෝවා දෙවි කී ලෙසම+ එහි සිටි බල්ලෝ ඔහුගේ ලේ ලෙව කෑවෝය.+

39 ආහබ් රජුගේ ජීවිතයේ අනිකුත් සිදුවීම්ද ඔහු කළ දේවල්ද ඔහු ඇත්දළවලින්+ සෑදූ මාලිගාව ගැනද ඔහු ගොඩනැඟූ නුවරවල් ගැනද ඊශ්‍රායෙල්හි රජවරුන්ගේ ඉතිහාසය වාර්තා කර ඇති ලියවිල්ලෙහි සඳහන් කර තිබේ.+ 40 ආහබ් රජද මිය ගිය අතර ඔහුගේ මුතුන්මිත්තන් මෙන් ඔහුවද තැන්පත් කරන ලදි.+ ඉන්පසු ඔහුගේ පුත් අහසියා+ රජකමට පත් විය.

41 ආසාගේ පුත් යෙහෝෂපාට්+ යූදාහි රජකමට පත් වූයේ ආහබ් ඊශ්‍රායෙල්හි රජකම් කළ හතරවන අවුරුද්දේදීය. 42 යෙහෝෂපාට් රජකමට පත් වන විට ඔහුගේ වයස අවුරුදු තිස්පහකි. අවුරුදු විසිපහක් ඔහු යෙරුසලමේ රජකම් කළේය. ඔහුගේ මව ෂිල්හීගේ දියණිය වූ අෂූබාය. 43 ඔහු තම පියා වූ ආසාගේ අඩිපාරේ ගමන් කරමින් දිගටම යෙහෝවා දෙවි යහපත්යයි සලකන දේ කළේය.+ නමුත් බොරු නමස්කාරය සඳහා වෙන් කර තිබූ පූජනීය ස්ථාන සමහරක් දේශයේ තිබුණේය. ඒ නිසා ජනයාද දිගටම ඒ පූජනීය ස්ථාන මත සුවඳ දුම්ද පූජාද ඔප්පු කළෝය.+ 44 යෙහෝෂපාට් රජු හා ඊශ්‍රායෙල්හි රජු අතර සුහදශීලී වාතාවරණයක් පැවතිණ.+ 45 යෙහෝෂපාට් රජුගේ ජීවිතයේ අනිකුත් සිදුවීම් ගැනද ඔහුගේ බලවත් ක්‍රියා ගැනද ඔහු යුද්ධ කළ ආකාරය ගැනද යූදාහි රජවරුන්ගේ ඉතිහාසය වාර්තා කර ඇති ලියවිල්ලෙහි සඳහන් කර තිබේ.+ 46 තම පියා වූ ආසාගේ කාලයේ දේවාලවල මුදලට සමලිංගික සේවනයේ යෙදුණු පිරිමින්ගෙන්+ ඉතුරු වූ අයවද ඔහු දේශයෙන් පන්නා දැමුවේය.+

47 ඒ කාලයේ ඒදොම්හි+ රජෙක් නොසිටියේය. ඒ දේශය පාලනය කළේ අධිපතියෙකි.+

48 යෙහෝෂපාට් රජ තර්ෂිෂ්+ කියා හැඳින්වූ නැව් සාදා ඕෆීර් සිට රත්තරන් ගෙන ඒමට ඒවා යැව්වේය. නමුත් ඒ නැව් එෂියොන්-ගෙබෙර්හිදී මුහුදුබත් වූ නිසා+ ඕෆීර්වලට යෑමට ඒවාට නොහැකි විය. 49 එකල ආහබ්ගේ පුත් අහසියා, “මගේ සේවකයන්ට ඔබේ සේවකයන් සමඟ නැව්වල යන්න පුළුවන්ද” කියා යෙහෝෂපාට් රජුගෙන් ඇසුවේය. නමුත් යෙහෝෂපාට් රජ ඊට එකඟ වූයේ නැත.+

50 කල් යත්ම යෙහෝෂපාට් රජුද මිය ගිය අතර ඔහුගේ මුතුන්මිත්තන් මෙන් ඔහුවද තැන්පත් කරනු ලැබීය.+ ඔහුව තැන්පත් කරන ලද්දේ ඔහුගේ මුතුන්මිත්තා වන දාවිත්ගේ නුවරෙහිය.+ ඔහුගෙන් පසුව ඔහුගේ පුත් යෙහෝරම්+ රජකමට පත් විය.

51 ආහබ්ගේ පුත් අහසියා+ ඊශ්‍රායෙල්හි රජකමට පත් වූයේ යෙහෝෂපාට් යූදාහි රජකම් කළ දහහත්වන අවුරුද්දේදීය. අහසියා අවුරුදු දෙකක් ඊශ්‍රායෙල්හි රජකම් කළේය. 52 ඔහු තම පියාගේද+ මවගේද+ ඊශ්‍රායෙල්වරුන්ව පාපයට පෙලඹවූ+ නෙබාත්ගේ පුත් යෙරොබොවම්ගේද+ අඩිපාරේ ගමන් කරමින් යෙහෝවා දෙවි පිළිකුල් කළ දේ කළේය.+ 53 ඔහු දිගටම බාල්+ ඉදිරියේ වැඳ වැටී ඔහුට නමස්කාර කළේය. මෙසේ ඔහු තම පියා කළ සෑම වරදකම නියැලෙමින් ඊශ්‍රායෙල්හි දෙවි වන යෙහෝවාව උදහස් කළේය.+