ගීතයකි.
98 යෙහෝවා දෙවිට අලුත් ගීයක් ගයන්න.+
මන්ද ඔහු කර ඇති දේවල් පුදුමාකාරය.+
ඔහු තම දකුණතින් එනම්, ශුද්ධ හස්තයෙන් ගැලවීම සලසා දෙන්නේය.+
2 ගැලවීම සලසා දීමට තමාට හැකි බව යෙහෝවා දෙවි පෙන්වා ඇත.+
ඔහු තම ධර්මිෂ්ඨකම ජාතීන්ට දකින්න සලස්වා ඇත.+
3 ඊශ්‍රායෙල් පෙළපතට තම ප්‍රේමයත් විශ්වාසවන්තකමත් පෙන්වන බවට දුන් පොරොන්දුව ඔහු සිහි කළේය.+
අපේ දෙවි සලසා දුන් ගැලවීම පොළොවේ ඈත කෙළවර දක්වාම සිටින සියලු ජනයා දුටුවෝය.+
4 පොළොවේ වසන සියලු ජනයෙනි, ප්‍රීතියෙන් යෙහෝවා දෙවිට ජය නාද නඟන්න.+
ප්‍රීති ඝෝෂා නඟමින් ඔහුට ගී ගයන්න.+
5 වීණා වාදනය කරමින් යෙහෝවා දෙවිට ප්‍රශංසා කරන්න.+
වීණා වයමින් ඔහුට ගී ගයන්න.+
6 හොරණෑ හා නළා පිඹිමින්+
රජු වූ යෙහෝවා දෙවි ඉදිරියේ ජය නාද නඟන්න.
7 මුහුදත් එහි ඇති සියල්ලත් ඝෝෂා නඟත්වා!+
භූමිය හා එහි ජීවත් වන සියල්ලෝ ප්‍රීති ඝෝෂා නඟත්වා!+
8 ගංගාවෝ අත්පොළසන් දෙත්වා!
සියලු කඳු එක්ව යෙහෝවා දෙවි ඉදිරියේ ප්‍රීති නාද නඟාවා!+
9 මන්ද ඔහු පොළොව විනිශ්චය කිරීමට පැමිණියේය.+
ඔහු ධර්මිෂ්ඨකමින් ලෝකය විනිශ්චය කරන්නේය.+
ඔහු සාධාරණකමින් ජනයාව විනිශ්චය කරන්නේය.+