නික්මයාම

35 පසුව මෝසෙස් මුළු ඊශ්‍රායෙල් සෙනඟ එකට රැස් කර මෙසේ කීවේය. “ඔබ විසින් පිළිපැදිය යුතු යෙහෝවා දෙවි නියම කළ කාරණා මේවාය.+ 2 දින හයක් ඔබට වැඩ කිරීමට පුළුවන.+ නමුත් හත්වන දවස ශුද්ධ දවසක් වන නිසා ඔබ එදින යෙහෝවා දෙවිට ගෞරව කරන පිණිස සබතක් පැවැත්විය යුතුයි. කිසි වැඩක් නොකර එදින ඔබ විවේක ගන්න. එදින වැඩ කරන කවරෙකු නමුත් අනිවාර්යයෙන්ම මරා දැමිය යුතුයි.+ 3 සබත් දිනයේදී ඔබේ නිවසේ ගින්නක් නොදල්වන්න.”

4 මෝසෙස් තවදුරටත් ඊශ්‍රායෙල් සෙනඟ අමතමින් මෙසේ කීවේය. “යෙහෝවා දෙවි මෙසේ කිරීමටද අණ කළා. 5 ‘ඔබ යෙහෝවා දෙවිට සම්මාදමක් දිය යුතුයි.+ සතුටු සිතින්+ යෙහෝවා දෙවිට යමක් දීමට පෙලඹෙන සියලුදෙනා සම්මාදමක් හැටියට මෙවැනි දේවල් ගෙනෙන්න. රන්ද රිදීද තඹද+ 6 නිල් පැහැති නූල්ද රත්නිල් පැහැගැන්වූ ලොම්ද තද රතු පැහැති රෙදිද අගනා ලිනන් රෙදිද එළු රෝමද+ 7 රතු සායම් දැමූ බැටළු හම්ද සීල් මත්ස්‍යයන්ගේ හම්ද ෂිටිම් ලීද 8 පහන් සඳහා තෙල්ද ශුද්ධ තෛලය හා සුවඳ ද්‍රව්‍ය සඳහා බෝල්සම් තෙල්ද+ 9 ඒෆොද් හැට්ටය හා ළයවැස්ම+ සඳහා ඔනික්ස් ගල්ද අනර්ඝ ගල්ද ගෙනෙන්න.+

10 “‘විවිධ කර්මාන්තවලට දක්ෂ වූ+ සෑම කෙනෙකුම ඇවිත් යෙහෝවා දෙවි අණ කළ මේ සියලු දේවල් සෑදිය යුතුයි. 11 සම්මුඛ වීමේ කූඩාරම හා එහි සියලු උපකරණද රෙදි තිරද කොකුද එහි රාමුද පොලුද කණුද අඩිද සාදන්න. 12 ගිවිසුම් පෙට්ටිය+ සහ එහි පියනද+ පොලුද+ ගිවිසුම් පෙට්ටිය වෙන් කර තබන තිර රෙද්දද+ සාදන්න. 13 මේසය+ සහ ඒ මත තැබීමට භාණ්ඩද පොලුද දෙවිට පුදන රොටිද+ 14 පහන් රුක+ සහ එහි පහන්ද එහි සියලු මෙවලම්ද පහන් දැල්වීමට තෙල්ද+ සාදන්න. 15 සුවඳ ද්‍රව්‍ය ඔප්පු කරන පූජාසනයද+ එහි පොලුද ශුද්ධ තෛලයද සුගන්ධවත් ද්‍රව්‍යද+ සම්මුඛ වීමේ කූඩාරමට ඇතුල් වන ස්ථානය සඳහා තිර රෙද්දද සාදන්න. 16 දවන පූජා ඔප්පු කරන පූජාසනය+ සහ එහි උපකරණද එහි පොලුද වතුර භාජනය+ සහ එහි ආධාරකයද පූජාසනය ඇතුළට දැමීම සඳහා දැලක ආකාරයට තඹ මැස්සක්ද සාදන්න. 17 මළුව වටා එල්ලීමට තිරද+ මළුව සඳහා කණුද අඩිද එහි දොරටුව සඳහා තිරද 18 කූඩාරම හා මළුව සඳහා කූඤ්ඤද ඒවා සඳහා ලණුද සාදන්න.+ 19 ශුද්ධස්ථානයේ සේවය කරන අය සඳහා මනා ලෙස වියන ලද නිල වස්ත්‍රද+ පූජක ආරොන්ගේ ශුද්ධ වස්ත්‍රද+ පූජකයන් ලෙස සේවය කරන ඔහුගේ පුත්‍රයන්ගේ වස්ත්‍රද සාදන්න.’”

20 පසුව ඊශ්‍රායෙල් සෙනඟ මෝසෙස් වෙතින් පිටත්ව ගියෝය. 21 යෙහෝවා දෙවිට සතුටු සිතින් යමක් දීමට පෙලඹුණු අය+ සම්මුඛ වීමේ කූඩාරම සෑදීමට අවශ්‍ය දේවල්ද එහි සේවාවන් සඳහා අවශ්‍ය දේවල්ද ශුද්ධ වස්ත්‍ර සෑදීමට අවශ්‍ය දේවල්ද ගෙනාවෝය. 22 ස්ත්‍රීහුද පුරුෂයෝද වැල නොකැඩී ආවෝය. ඔවුහු හාරිච්චිද කරාබුද මුදුද විවිධ වර්ගයේ රන් ආභරණද නොයෙකුත් වර්ගයේ රන් භාණ්ඩද සිය කැමැත්තෙන්ම ගෙනාවෝය. ඔවුහු එම රන් ආභරණ යෙහෝවා දෙවිට සෙලවීමේ පූජාවක් ලෙස ඔප්පු කළෝය.+ 23 තමන් සතුව නිල් පැහැති නූල්ද රත්නිල් පැහැගැන්වූ ලොම්ද තද රතු පැහැති රෙදිද අගනා ලිනන් රෙදිද එළු රෝමද රතු සායම් දැමූ බැටළු හම්ද සීල් මත්ස්‍යයන්ගේ හම්ද තිබූ අය ඒවා ගෙනැවිත් දුන්නෝය.+ 24 රිදී හා තඹ ඇති සියලුදෙනා ඒවා යෙහෝවා දෙවිට සම්මාදමක් හැටියට දුන්නෝය. ෂිටිම් ලී තිබූ සියලුදෙනාද වැඩකටයුතු සඳහා අවශ්‍ය ලී ගෙනාවෝය.

25 වැඩවලට දක්ෂ+ සියලු ස්ත්‍රීහු නූල් කටින්න පටන්ගත්තෝය. ඔවුහු කටින ලද නිල් පැහැති නූල්ද රත්නිල් පැහැගැන්වූ ලොම්ද තද රතු පැහැති නූල්ද අගනා ලිනන් නූල්ද දිගින් දිගටම ගෙනැවිත් දුන්නෝය. 26 එම ස්ත්‍රීහු එළු රෝමවලින්ද නූල් කටින්න කැමැත්තෙන්ම ඉදිරිපත් වූහ.

27 අධිපතීහු ඒෆොද් හැට්ටය හා ළයවැස්ම සඳහා ඔනික්ස් ගල්ද අනර්ඝ ගල්ද ගෙනාවෝය.+ 28 බෝල්සම් තෙල්ද පහන් සඳහා තෙල්ද ශුද්ධ තෛලය හා සුවඳ ද්‍රව්‍ය සඳහා තෙල්ද ඔවුහු ගෙනාවෝය.+ 29 දෙවිට සතුටු සිතින් යමක් දීමට පෙලඹුණු ස්ත්‍රීහු හා පුරුෂයෝ, යෙහෝවා දෙවි මෝසෙස්ට සාදන්න කියා පැවසූ දේවල් සඳහා අවශ්‍ය සියලු ද්‍රව්‍ය ගෙනැවිත් දුන්නෝය. ඊශ්‍රායෙල් සෙනඟ සිය කැමැත්තෙන්ම යෙහෝවා දෙවිට ඒ සියලු දේ ගෙනැවිත් දුන්නෝය.+

30 පසුව මෝසෙස් ඊශ්‍රායෙල් සෙනඟට මෙසේ කීවේය. “යෙහෝවා දෙවි යූදා ගෝත්‍රයේ හූර්ගේ පුත්‍රයා වන උරීගේ පුත් බෙසලෙල්ව+ කැඳවා තිබෙනවා. 31 ඔහුට ප්‍රඥාව, දැනුම හා තේරුම්ගැනීමේ හැකියාව ලැබෙන පිණිසත් සියලු ශිල්ප ක්‍රමවල ඉතා දක්ෂ ලෙස යෙදීමට හැකි වන පිණිසත් දෙවි තමාගේ බලය නොඅඩුව ඔහුට දී තිබෙනවා. 32 වැඩ සැලසුම් කිරීමට, රන්, රිදී හා තඹවලින් කැටයම් කිරීමට,+ 33 මැණික් ගල් කැපීමට, ඒවා එබ්බවීමට සහ වඩු වැඩ කිරීම ඇතුළු සියලු කර්මාන්ත කිරීමට අවශ්‍ය දක්ෂතාව දෙවි ඔහුට ලබා දී තිබෙනවා.+ 34 අන් අයට මේ දක්ෂතාවන් ඉගැන්වීම සඳහා අවශ්‍ය හැකියාව දෙවි බෙසලෙල්ට හා දාන් ගෝත්‍රයට අයත් අහිසාමක්ගේ පුත්‍රයා වන ඔහොලියාබ්ට+ ලබා දී තිබෙනවා. 35 සියලු ශිල්ප ක්‍රමවල යෙදීමටද නූල්වලින් මෝස්තර මැසීමටද නිල් පැහැති නූල්වලින්, රත්නිල් පැහැගැන්වූ ලොම්වලින්, තද රතු පැහැති නූල්වලින් හා අගනා ලිනන් නූල්වලින් රෙදි විවීමටද+ සියලු කර්මාන්ත කිරීමටද සියලු වැඩ සැලසුම් කිරීමටද අවශ්‍ය ප්‍රඥාවත් දෙවි ඔවුන්ට නොඅඩුව ලබා දී තිබෙනවා.+