නික්මයාම

40 යෙහෝවා දෙවි මෝසෙස්ට මෙසේ කීවේය. 2 “ඔබ පළමුවෙනි මාසයේ+ පළමුවෙනි දිනයේදී සම්මුඛ වීමේ කූඩාරම සාදන්න.+ 3 සම්මුඛ වීමේ කූඩාරමේ ගිවිසුම් පෙට්ටිය+ තැබීමට නියමිත ස්ථානයේ එය තබා, එම ස්ථානය නොපෙනෙන පිණිස තිර රෙද්ද එල්ලන්න.+ 4 මේසයද+ කූඩාරම ඇතුළට ගෙන එහි භාණ්ඩ පිළිවෙළට සකස් කරන්න. පහන් රුකද+ ගෙනැවිත් එහි පහන් දල්වා තබන්න.+ 5 සුවඳ ද්‍රව්‍ය+ ඔප්පු කරන රන් පූජාසනය ගිවිසුම් පෙට්ටියට සමාන්තරව තබන්න. කූඩාරමට ඇතුල් වන ස්ථානය සඳහා සෑදූ තිර රෙද්ද එල්ලන්න.+

6 “දවන පූජා ඔප්පු කරන පූජාසනය+ සම්මුඛ වීමේ කූඩාරමට ඇතුල් වන ස්ථානය ළඟ තබන්න. 7 වතුර භාජනය සම්මුඛ වීමේ කූඩාරම හා පූජාසනය අතරේ තබා එයට වතුර පුරවන්න.+ 8 සම්මුඛ වීමේ කූඩාරම වටේට තිර රෙදි එල්ලා මළුව සකස් කරගන්න.+ මළුවේ දොරටුව සඳහා සෑදූ තිරයද+ එල්ලන්න. 9 ශුද්ධ තෛලයෙන්+ සම්මුඛ වීමේ කූඩාරමද එහි සියලු භාණ්ඩ හා මෙවලම්ද+ කැප කරන්න. මෙසේ ඒ සියල්ල පරිශුද්ධ දේවල් ලෙස වෙන් කර තබන්න. මන්ද ඒවා ශුද්ධය. 10 දවන පූජා ඔප්පු කරන පූජාසනයද එහි සියලු භාණ්ඩද තෛලයෙන් කැප කර පූජාසනය පරිශුද්ධ දෙයක් ලෙස වෙන් කර තබන්න.+ මන්ද පූජාසනය ඉතා ශුද්ධය.+ 11 වතුර භාජනයද එම භාජනය තබන ආධාරකයද තෛලයෙන් කැප කර ඒවාද පරිශුද්ධ දේවල් ලෙස වෙන් කර තබන්න.

12 “ආරොන්ව සහ ඔහුගේ පුත්‍රයන්ව සම්මුඛ වීමේ කූඩාරමට ඇතුල් වන ස්ථානය ළඟට කැඳවා ඔවුන්ට ස්නානය කිරීමට සැලැස්විය යුතුයි.+ 13 ඉන්පසු පූජකයෙකු ලෙස මට පරිශුද්ධ සේවය පිරිනමන පිණිස ආරොන්ට ශුද්ධ වස්ත්‍ර අන්දවා+ ඔහුව අභිෂේක කරන්න.+ 14 ආරොන්ගේ පුත්‍රයන්වද කැඳවා ඔවුන්ට වස්ත්‍ර අන්දවා,+ 15 ඔවුන්ගේ පියා මෙන් ඔවුන්වද අභිෂේක කරන්න.+ ඉන්පසු ඔවුන් පූජකයන් ලෙස මට සේවය කළ යුතුයි. ඔවුන්ව අභිෂේක කිරීමෙන් අනතුරුව පරම්පරා ගණනාවකට පූජකයන් ලෙස සේවය කිරීමේ වරප්‍රසාදය ඔවුන්ට හිමි වනු ඇත. ඔවුන්ගේ සියලු පරම්පරාවලදී එම වරප්‍රසාදය ඔවුන් සතු වනු ඇත.”+

16 මෝසෙස් යෙහෝවා දෙවි අණ කළ සියල්ල එලෙසම කළේය.+

17 දෙවෙනි අවුරුද්දේ පළමුවෙනි මාසයේ පළමුවෙනි දිනයේදී ශුද්ධ කූඩාරම සාදන ලදි.+ 18 මෝසෙස් පළමුවෙන් කූඩාරමේ අඩි+ පොළොවට සවි කර රාමු+ අඩි මත තබා නියමිත ස්ථානවලට පොලු+ දැමුවේය. කණුද+ සිටෙව්වේය. 19 ඉන්පසු ඔහු කූඩාරමට උඩින් දමන රෙද්ද අතුරා+ ඊට උඩින් කූඩාරමේ අනික් ආවරණය+ දැමුවේය. යෙහෝවා දෙවි මෝසෙස්ට අණ කළ ලෙසම ඔහු කළේය.

20 ඉන්පසු මෝසෙස්, දෙවි සාක්ෂියක් පිණිස දුන් ගල් පුවරු දෙක+ ගිවිසුම් පෙට්ටිය+ ඇතුළේ තබා පියනෙන්+ පෙට්ටිය වැසුවේය.+ ගිවිසුම් පෙට්ටියේ පොලු දෙකද+ ඔහු වළලු තුළට දැමුවේය. 21 ඉන්පසු ශුද්ධ කූඩාරම තුළට ගිවිසුම් පෙට්ටිය ගෙන ගොස් එම ස්ථානය නොපෙනෙන පිණිස+ තිර රෙද්ද+ එල්ලුවේය. යෙහෝවා දෙවි අණ කළ ලෙසම මෝසෙස් කළේය.

22 ඉන්පසු තිර රෙද්දට අනික් පැත්තෙන් ඔහු මේසය+ තැබුවේය. මේසය ශුද්ධ කූඩාරමේ උතුරු පැත්තේ තබන ලදි. 23 මෝසෙස් පිදීමේ රොටි+ යෙහෝවා දෙවි ඉදිරියේ තැබුවේය. යෙහෝවා දෙවි අණ කළ ලෙසම එම රොටි මේසය මත පේළියට තබන ලදි.

24 ඉන්පසු ඔහු මේසය ඉදිරිපිටින් පහන් රුක+ තැබුවේය. පහන් රුක කූඩාරමේ දකුණු පැත්තේ තබන ලදි. 25 මෝසෙස් එහි පහන් යෙහෝවා දෙවි ඉදිරියේ දල්වා+ තැබුවේය. ඔහු යෙහෝවා දෙවි අණ කළ ලෙසම කළේය.

26 ඊළඟට ඔහු සම්මුඛ වීමේ කූඩාරම ඇතුළේ තිබෙන තිරය ළඟ රන් පූජාසනය+ තැබුවේය. 27 යෙහෝවා දෙවි අණ කළ ලෙස පූජාසනය මත සුවඳ ද්‍රව්‍ය ඔප්පු කරන පිණිස+ මෝසෙස් එසේ කළේය.

28 අවසානයේදී ඔහු සම්මුඛ වීමේ කූඩාරමට ඇතුල් වන ස්ථානය සඳහා සෑදූ තිර රෙද්ද එල්ලුවේය.+

29 ඔහු සම්මුඛ වීමේ කූඩාරමට ඇතුල් වන ස්ථානය ළඟ දවන පූජා ඔප්පු කරන පූජාසනය+ තැබුවේය. යෙහෝවා දෙවි අණ කළ ලෙස ඒ මත දවන පූජා+ හා ධාන්‍ය පූජා ඔප්පු කරන පිණිස මෝසෙස් එසේ කළේය.

30 සම්මුඛ වීමේ කූඩාරම හා පූජාසනය අතරේ ඔහු වතුර භාජනය තබා එයට වතුර පිරෙව්වේය.+ 31 මෝසෙස්ද ආරොන්ද ආරොන්ගේ පුත්‍රයෝද එයින් තම අත් පා සෝදාගත්තෝය. 32 සම්මුඛ වීමේ කූඩාරමට ඇතුල් වන විටත් පූජාසනය ළඟට යන විටත් යෙහෝවා දෙවි මෝසෙස්ට අණ කළ ලෙස ඔවුහු තම අත් පා සෝදාගත්තෝය.+

33 ඔහු සම්මුඛ වීමේ කූඩාරම හා පූජාසනය වටේට තිර රෙදි එල්ලා මළුව+ සකස් කළේය. මළුවේ දොරටුව සඳහා සෑදූ තිරයද එල්ලුවේය.+

මෙසේ මෝසෙස් ශුද්ධ කූඩාරමේ සියලු වැඩකටයුතු අවසන් කළේය. 34 පසුව සම්මුඛ වීමේ කූඩාරම වලා ටැඹෙන්+ වැසී ගියේය. යෙහෝවා දෙවිගේ තේජස ශුද්ධ කූඩාරම පුරාම දක්නට ලැබිණ. 35 සම්මුඛ වීමේ කූඩාරමට ඉහළින් වලා ටැඹ+ තිබූ නිසාත් එය යෙහෝවා දෙවිගේ තේජසින් පිරී+ තිබූ නිසාත් කූඩාරම ඇතුළට යෑමට මෝසෙස්ට නොහැකි විය.

36 සම්මුඛ වීමේ කූඩාරමට ඉහළින් තිබූ වලා ටැඹ එතැනින් නැඟී ගිය විට ඊශ්‍රායෙල් සෙනඟ තම කූඩාරම් අකුළාගෙන තමන් සිටි ස්ථානයෙන් පිටත්ව ගියෝය. ඔවුහු තැනින් තැන ගමන් කළ කාලය පුරාම එලෙස කළෝය.+ 37 නමුත් වලා ටැඹ කූඩාරමට ඉහළින් තිබුණු විට තමන් සිටි ස්ථානයෙන් ඔවුහු පිටත්ව ගියේ නැත. වලා ටැඹ එතැනින් ඉහළට නැඟී යන තෙක් ඔවුහු එතැනම රැඳී සිටියෝය.+ 38 යෙහෝවා දෙවිගේ වලා ටැඹ දවාලේදී සම්මුඛ වීමේ කූඩාරමට ඉහළින් තිබිණ. රාත්‍රියේදී කූඩාරමට ඉහළින් ගිනි ජාලාවක් තිබිණ. ඊශ්‍රායෙල් සෙනඟ තැනින් තැන ගමන් කළ කාලය පුරාම වලා ටැඹද ගිනි ජාලාවද ඔවුන්ට දක්නට ලැබිණ.+