යෙරෙමියා
30 යෙහෝවා දෙවිගෙන් යෙරෙමියාට ලැබුණු පණිවිඩය මෙයයි. 2 “ඊශ්‍රායෙල්හි දෙවි වන යෙහෝවා මෙසේ පවසන්නේය. ‘මා ඔබට පවසන සෑම දෙයක්ම ලියවිල්ලක සටහන් කරගන්න.+ 3 යෙහෝවා දෙවි වන මම මෙසේ පවසමි. “වහලුන්ව සිටින මාගේ සෙනඟ වන ඊශ්‍රායෙල්වරුන්ව සහ යූදා වැසියන්ව මා බේරාගන්නා කාලය ඉදිරියේදී පැමිණෙනු ඇත.”+ යෙහෝවා දෙවි වන මම තවදුරටත් මෙසේ පවසමි. “මම ඔවුන්ගේ මුතුන්මිත්තන්ට දුන් දේශයට ඔවුන්ව නැවත රැගෙන එන්නෙමි. ඔවුහු එම දේශය නැවත අයිති කරගන්නෝය.”’”+
4 යෙහෝවා දෙවි ඊශ්‍රායෙල්වරුන්ට සහ යූදා වැසියන්ට පණිවිඩයක් දුන්නේය. 5 යෙහෝවා දෙවි ඔවුන්ට මෙසේ පැවසුවේය. “භයෙන් කෑගසන හඬක් ඇසිණ. භීතිය හාත්පස පැතිර තිබේ.+ සාමයේ ඡායාවක්වත් නැත. 6 සෙනඟෙනි, ඔබ අතරේ සිටින පුරුෂයන්, දරුවන් ප්‍රසූත කරනවාද? ඔවුන් සිටින ආකාරය දෙස බලන්න. ප්‍රසව වේදනා විඳින ස්ත්‍රියක මෙන් ඔවුහුද අත් දෙක තුනටියේ තබාගෙන වේදනාවෙන් සිටිති.+ ඔවුන්ගේ මුහුණු හොඳටම සුදුමැලි වී තිබේ.+ 7 මේ දවස ඉතා භයානක දවසකි!+ අතීතයේ කිසිම දිනක් මීට සමාන කළ නොහැක.+ මෙය යාකොබ්ට විපත්තිවලට මුහුණ දීමට සිදු වන දවසකි.+ නමුත් මේ සියල්ලෙන් ඔහුට ගැලවීම ලැබෙන්නේය.”
8 ස්වර්ගයේ සේනාවල අධිපති වන යෙහෝවා දෙවි මෙසේ පවසන්නේය. “ඒ දවසේදී ඔවුන්ගේ ගෙල මත තිබෙන පීඩාකාරී වියගහ මම බිඳ දමන්නෙමි. එහි බැමි කඩා වීසි කර දමන්නෙමි.+ ඉන්පසු ඔවුන්ව දාසකමට ගෙන යෑමට කිසි විදේශිකයෙකුට හැකි වන්නේ නැත. 9 ඔවුන්ගේ දෙවි යෙහෝවා වන මට ඔවුහු නමස්කාර කරනු ඇත. ඔවුන්ගේ රජු ලෙස මා පත් කරන+ දාවිත්ට ඔවුහු නිසැකවම සේවය කරනු ඇත.”+
10 එහෙයින් යෙහෝවා දෙවි මෙසේ පවසන්නේය. “මාගේ සේවකයා වන යාකොබ්, භය වෙන්න එපා. ඊශ්‍රායෙල් සෙනඟෙනි, බියෙන් වෙවුලන්න එපා.+ මන්ද දුර ඈත දේශයක සිටින ඔබව මම බේරාගන්නෙමි. වහලුන් ලෙස සේවය කරන දේශයෙන් ඔබේ දරුවන්ව මම ගලවාගන්නෙමි.+ යාකොබ් නැවත හැරී ඇවිත් සතුරු උවදුරුවලින් තොර නිදහස් ජීවිතයක් ගත කරනු ඇත. කිසිවෙක් ඔහුව බියගන්වන්නේ නැත.”+
11 යෙහෝවා දෙවි තවදුරටත් මෙසේ පවසන්නේය. “ඔබව බේරාගැනීමට මම නිතරම ඔබ සමඟ සිටිමි.+ මා ඔබව විසුරුවාහැරිය දේශවල සිටින සියලු ජාතීන්ව මම සහමුලින්ම විනාශ කර දමන්නෙමි.+ මම ඔවුන්ට එසේ කළත් ඔබට එසේ නොකරමි.+ නමුත් මම ඔබට දඬුවම් නොකර සිටින්නේද නැත. සුදුසු ප්‍රමාණයට මම ඔබට අවශ්‍ය හික්මවීම දෙන්නෙමි.”+
12 යෙහෝවා දෙවි මෙසේද පවසන්නේය. “ගොඩ ඒමට නොහැකි වන ලෙස ඔබ වැටී ඇත.+ ඔබේ තුවාලය සුව කිරීමට නොහැකි තරම් බරපතළය.+ 13 එය සුව කිරීමට කිසිවෙක් ඉදිරිපත් වන්නේ නැත.+ ඔබව සුව කිරීමට කිසිම මඟක් නැත.+ 14 ඔබට බොහෝ සෙයින් ආලය කළ අයම දැන් ඔබව අමතක කර ඇත.+ ඔවුන් තවදුරටත් සොයන්නේ ඔබව නොවේ. ඔබ බොහෝ වැරදි කළහුය.+ ගණන් කිරීමට නොහැකි තරම් පාප කළහුය.+ සතුරෙකු පහර දෙන්නාක් මෙන් මා ඔබට පහර දුන්නෙත්+ කෲර මිනිසෙකු දඬුවම් කරන්නාක් මෙන් මා ඔබට දඬුවම් කළෙත්+ ඒ නිසාය. 15 ඔබේ වැටීම ගැන ඔබ හඬා වැලපෙන්නේ ඇයි?+ ඔබට දැනෙන වේදනාව නැති කිරීමට කිසිවෙකුට නොහැක. මා මේ දේවල් ඔබට කළේ ඔබ බොහෝ වැරදි කළ නිසාය. ගණන් කිරීමට නොහැකි තරම් පාප කළ නිසාය.+ 16 නමුත් ඔබව විනාශ කර දමන සියල්ලෝද විනාශ වී යනු ඇත.+ ඔබේ සතුරන් සියලුදෙනාවම වහලුන් ලෙස ගෙන යනු ලැබේ.+ ඔබෙන් කොල්ල කන අයව වෙනත් අය විසින් කොල්ල කනු ඇත. ඔබේ දේපළ පැහැරගන්නා අයගේ වස්තු නැති වී යනු ඇත.”+
17 “පන්නා දැමූ තැනැත්තිය ලෙස සියොන් දියණියව ඇගේ සතුරෝ හඳුන්වති.+ ‘ඇය ගැන කිසිවෙක් සැලකිල්ලක් දක්වන්නේ නැත’+ කියා ඔවුහු පවසන්නෝය. නමුත් මම ඇයව සුව කරන්නෙමි. ඇගේ තුවාල සනීප කරන්නෙමි”+ කියා යෙහෝවා දෙවි පවසන්නේය.
18 යෙහෝවා දෙවි මෙසේද පවසන්නේය. “වහල්භාවයේ සිටින යාකොබ්ගෙන් පැවතෙන්නන්ව මම එකතු කරගන්නෙමි.+ ඔවුන්ට මම අනුකම්පාවෙන් සලකා ඔවුන්ගේ වාසස්ථාන යළි පිහිටුවන්නෙමි. කලින් පිහිටා තිබූ කන්ද මතම ඒ නුවර නැවත ගොඩනඟනු ලැබේ.+ එහි බලකොටු, ඒවා තිබුණු ස්ථානවලම නැවත ඉදි කරනු ලැබේ.+ 19 ප්‍රශංසා ගී ගයන හඬද ප්‍රීතියෙන් සිනාසෙන්නන්ගේ හඬද+ එදෙසින් ඇසෙනු ඇත. සෙනඟ ගණනින් අඩු නොවී තව තවත් වර්ධනය වීමට මම සලස්වන්නෙමි.+ සුළු ජාතියක් වීමට ඉඩ නොදී මම ඔවුන්ව මහත් ජාතියක් බවට පත් කරන්නෙමි.+ 20 යාකොබ්ගේ පුත්‍රයන්ව කලින් සිටි තත්වයටම ගෙනැවිත් ඔවුන්ව ස්ථිර ලෙස පිහිටුවන්නෙමි.+ නමුත් ඔවුන්ගේ සතුරන් සියලුදෙනාටම මම දඬුවම් කරන්නෙමි.+ 21 යාකොබ්ගෙන් පැවතෙන්නන් අතරින්ම කෙනෙක් ඔහුගේ උත්තමයා වන්නේය.+ ඔහුගේ පාලකයා වන්නේද ඔහුගෙන් පැවතෙන කෙනෙකි.+ ඒ පාලකයාට මා වෙතට පැමිණීමට මම අවසර දෙමි. එවිට ඔහු මා ළඟට පැමිණෙනු ඇත.”+
“මා ළඟට පිවිසීමට තම ජීවිතය පවා පරදුවට තබන මේ තැනැත්තා කවුද”+ කියා යෙහෝවා දෙවි අසන්නේය. 22 “මම ඔබේ දෙවි වන්නෙමි.+ ඔබව මාගේ සෙනඟ ලෙස පිළිගන්නෙමි.”+
23 යෙහෝවා දෙවිගේ උදහස දරුණු සුළිසුළඟක් මෙන් හමා ඇවිත්+ දුෂ්ටයන්ව සුනුවිසුනු කර දමනු ඇත.+ 24 තමා අරමුණු කළ දේ සම්පූර්ණයෙන්ම ඉටු වන තුරු+ යෙහෝවා දෙවිගේ දැවෙන උදහස පහව නොයයි. අවසාන කාලයේදී ඔබ එය හොඳින් තේරුම්ගනු ඇත.+