සෙකරියා
4 මා සමඟ කතා කළ දේවදූතයා නැවත වරක් පැමිණ, නිදා සිටින කෙනෙකුව අවදි කරන්නාක් මෙන් ගැඹුරු කල්පනාවක සිටි මගේ අවධානය ඔහු වෙතට ඇදගත්තේය.+ 2 ඉන්පසු, “ඔබට පෙනෙන්නේ කුමක්ද”+ කියා ඔහු මගෙන් ඇසුවේය.
එවිට මම මෙසේ කීවෙමි. “සම්පූර්ණයෙන්ම රනින් නිමැවූ පහන් රුකක් මට පෙනේ.+ එහි මුදුනේ භාජනයක් තිබේ. ඒ පහන් රුක මත පහන් හතක් ඇත.+ ඒ පහන් හතට නළ හතක් සම්බන්ධ කර ඇත. 3 පහන් රුක දෙපැත්තේ ඔලීව ගස් දෙකක් තිබේ.+ එනම්, පහන් රුක මත තිබෙන භාජනයට දකුණු පැත්තෙන් එක් ගසක්ද වම් පැත්තෙන් අනික් ගසද තිබේ.”
4 එවිට මා සමඟ කතා කරමින් සිටි දේවදූතයාගෙන් මම මෙසේ ඇසුවෙමි. “මගේ ස්වාමීනි, මේ පෙනෙන දේවල තේරුම කුමක්ද?”+ 5 එවිට ඒ දේවදූතයා මට මෙසේ කීවේය. “ඔබ ඇත්තටම මේ දේවල තේරුම දන්නේ නැද්ද?”
“අනේ ස්වාමීනි, මට මේ දේවල් ගැන කිසිම වැටහීමක් නැහැ”+ කියා මම කීවෙමි.
6 එවිට දේවදූතයා මට මෙසේ කීවේය. “යෙහෝවා දෙවි සෙරුබාබෙල්ට දෙන පණිවිඩය මෙයයි. ‘“මේ සියල්ල ඉටු වන්නේ මගේ බලයෙන් මිසක+ ඔබේ ශක්තියෙන්වත්+ යුද බලයෙන්වත් නොවෙයි.”+ එසේ පවසන මා ස්වර්ගයේ සේනාවල අධිපති වන යෙහෝවා දෙවිය. 7 සෙරුබාබෙල්+ ඉදිරියේ අතිමහත් කන්දක් වැනි බාධකයක් තැබුවද+ එය සමතලා කරනු ලබයි. ඔහු මාගේ ගෘහයේ ප්‍රධාන ගල+ තබා එහි වැඩ අවසන් කරයි. ප්‍රධාන ගල දකින ජනයා, “මෙය ඉතා අලංකාරයි! ඉතා අලංකාරයි”+ කියා ප්‍රීති ඝෝෂා නඟනු ඇත.’”+
8 යෙහෝවා දෙවි තවදුරටත් මට මෙසේ පැවසුවේය. 9 “මේ ගෘහයේ අත්තිවාරම+ තැබුවේ සෙරුබාබෙල්ය. එහි වැඩ අවසන් කරන්නෙත් ඔහුමය.+ ‘මේ සියල්ල සිදු වන විට, මාව එවන ලද්දේ ස්වර්ගයේ සේනාවල අධිපති වන යෙහෝවා දෙවි බව ඔබ දැනගනු ඇත.’+ 10 එබැවින් සුළුවෙන් පටන්ගත් වැඩක් කිසිවිටෙක හෙළා නොදකින්න.+ සෙරුබාබෙල්ගේ අතේ තිබෙන ලඹය දැක ජනයා ප්‍රීති වන්නෝය.+ ‘ඇස් සතද මේ දේවල් දකින්නෝය.+ මුළු පොළොවම සෝදිසි කර බලන ඒ ඇස් යෙහෝවා දෙවිගේය.’”+
11 එවිට මම දේවදූතයාගෙන් මෙසේ ඇසුවෙමි. “පහන් රුකට දකුණු පැත්තෙන් සහ වම් පැත්තෙන් තිබෙන ඔලීව ගස් දෙකෙන් අදහස් වන්නේ කුමක්ද?”+ 12 මම ඔහුගෙන් මෙසේද ඇසුවෙමි. “රනින් නිමැවූ නළ දෙකකින් රන් පැහැති දියරයක් ගලා එනවා මට පෙනේ. ඒ නළ දෙක ඔලීව ගස් දෙකේ අතු දෙකකට සම්බන්ධ වී තිබේ. එම ඔලීව අතු දෙකෙන් අදහස් කරන්නේ කුමක්ද?”
13 එවිට ඔහු මගෙන් මෙසේ ඇසුවේය. “ඔබ ඇත්තටම මේ දේවල තේරුම දන්නේ නැද්ද?”
“අනේ ස්වාමීනි, මේ දේවල් ගැන මට කිසිම වැටහීමක් නැහැ”+ කියා මම කීවෙමි.
14 එවිට ඔහු මෙසේ කීවේය. “ඒ ගස්වලින් නියෝජනය වන්නේ මුළු පොළොවටම ස්වාමීන් වන+ දෙවි ළඟ සිටගෙන සිටින අභිෂේක ලත් තැනැත්තන් දෙදෙනාවය.”+