ගණන් කතාව

32 රූබෙන්වරුන්ට+ හා ගාද්වරුන්ට+ බොහෝ සත්ව රැළවල් සිටියෝය. යාසෙර්+ හා ගිලියද් යන ප්‍රදේශ සතුන් ඇති කිරීම සඳහා ඉතා හොඳ බව ඔවුහු දුටුවෝය. 2 එබැවින් ඔවුහු මෝසෙස්, පූජක එලියාසර් හා සෙනඟ අතරේ සිටි ප්‍රධානීන් වෙත ගොස් මෙසේ කීවෝය. 3 “අටාරොත්,+ දීබොන්,+ යාසෙර්, නිම්රා,+ හෙෂ්බොන්,+ එලෙයාලෙ,+ සෙබාම්, නෙබෝ+ හා බෙයොන්+ යන ප්‍රදේශ 4 යෙහෝවා දෙවි යටත් කරගෙන+ ඊශ්‍රායෙල්වරුන්ගේ අතට භාර දුන්නා. සතුන් ඇති කරන්න ඒ ප්‍රදේශ කදිමයි. ඔබේ සේවකයන් වන අපට විශාල සත්ව රැළක් සිටිනවා.+ 5 ඒ නිසා අපි කියන මේ දේ ගැන ටිකක් සිතා බලන්න කියා ඔබෙන් බැගෑපත්ව ඉල්ලා සිටිනවා. අපට යොර්දාන් ගඟෙන් එගොඩට යන්න කියන්න එපා. ඔබේ සේවකයන් වන අපට මේ ප්‍රදේශ උරුමයක් හැටියට දෙන්න.”+

6 එවිට මෝසෙස් රූබෙන්වරුන්ට හා ගාද්වරුන්ට මෙසේ කීවේය. “ඔබ මෙහේ නතර වී ඔබේ සහෝදරයන්ව විතරක් යුද්දෙට යවන එක හරිද?+ 7 ඊශ්‍රායෙල් සෙනඟව ඔබ අධෛර්යයට පත් කරන්නද හදන්නේ? ඔබ එසේ කළොත් යෙහෝවා දෙවි ඔවුන්ට දෙන්න පොරොන්දු වූ දේශයට ඔවුන් යන්න බැහැ කියයි. 8 දේශයේ තොරතුරු සොයා බලන්න මම කාදෙෂ්-බර්නේයේ+ සිට මිනිස්සු යැවූ අවස්ථාවේදී ඔබේ පියවරුනුත් කළේ ඒ දේමයි.+ 9 එෂ්කොල් නිම්නයේ+ සිට ඔවුන් දේශය දෙස බලා ආපසු ඇවිත් යෙහෝවා දෙවි දෙන්න පොරොන්දු වූ දේශයට යන්න බැහැයි කියමින් ඊශ්‍රායෙල් සෙනඟව අධෛර්යයට පත් කළා.+ 10 ඒ නිසා යෙහෝවා දෙවි ඊශ්‍රායෙල් සෙනඟ සමඟ උදහස් වී දිවුරා+ මෙහෙම කිව්වා. 11 ‘මේ සෙනඟ මුළු සිතින් මාව විශ්වාස නොකළ බැවින් මම ආබ්‍රහම්ට, ඊසාක්ට හා යාකොබ්ට දෙන්න පොරොන්දු වූ ඒ දේශය+ ඔවුන්ට දකින්නවත් ලැබෙන්නේ නැහැ. ඊජිප්තු දේශයෙන් පිටතට පැමිණි වයස අවුරුදු විස්සක් හෝ ඊට වඩා වැඩි+ කිසිම කෙනෙකුට ඒ දේශය දකින්න ලැබෙන්නේ නැහැ. 12 නමුත් කෙනිෂ්ෂිවරයෙක් වූ යෙෆුන්නෙගේ පුත්‍රයා වන කාලෙබ්+ හා නූන්ගේ පුත්‍රයා වන යොෂුවා+ යෙහෝවා දෙවි වන මාව මුළු සිතින්ම විශ්වාස කළ බැවින් ඒ පරම්පරාවෙන් එම දේශයට යන්නේ ඔවුන් දෙදෙනා පමණයි.’ 13 යෙහෝවා දෙවි ඊශ්‍රායෙල් සෙනඟ සමඟ උදහස් වූ නිසා යෙහෝවා දෙවිට විරුද්ධව කැරලිගැසූ සෑම කෙනෙක්ම විනාශ වන තුරු+ අවුරුදු හතළිහක් පුරා ඔවුන්ට පාළුකරයේ ඇවිදින්න සිදු වුණා.+ 14 පව්කාර සෙනඟෙනි, ඔබ ක්‍රියා කරන්නේ ඔබේ පියවරුන් ක්‍රියා කළ විදිහටමයි. ඔබ හදන්නේ ඊශ්‍රායෙල් සෙනඟට විරුද්ධව ඇවුළුණු යෙහෝවා දෙවිගේ උදහස+ තව තවත් වැඩි කරන්නද? 15 ඔබ දෙවිට අකීකරු වුණොත්+ ඔහු මේ සෙනඟට තවත් කාලයක් පාළුකරයේ ඉන්න ඉඩහරියි.+ ඔබ කරන දෙයින් මේ සෙනඟ පිටට මහත් විනාශයක් පැමිණෙයි.”+

16 පසුව රූබෙන්වරු හා ගාද්වරු මෝසෙස්ට මෙසේ කීවෝය. “අපේ දරුවන්ට ජීවත් වෙන්න මෙහේ නුවරවල් ගොඩනඟන්නත් අපේ සතුන්ට ගාල් හදන්නත් අපට අවසර දෙන්න. 17 අපේ දරුවන්ව අවට දේශවල වැසියන්ගෙන් ආරක්ෂා කරන පිණිස අපි ගොඩනඟන නුවරවල ඔවුන්ව නතර කරන්නම්. නමුත් අපි, යුද්දෙට සැරසී+ ඊශ්‍රායෙල් සෙනඟ ඉදිරියෙන් ගමන් කරන්නම්. ඔවුන්ට හිමි දේශයට ඔවුන් පැමිණෙන තුරු අපි ඔවුන් සමඟ ඉන්නම්. 18 ඔවුන් සියලුදෙනාම තම තමන්ගේ උරුමය ලබාගන්නා තුරු අපි අපේ ගෙවල්වලට හැරී එන්නේ නැහැ.+ 19 යොර්දාන් ගඟෙන් එගොඩ තියෙන දේශය අයිති ඔවුන්ටයි. අපිට ඒ දේශයෙන් උරුමයක් එපා. යොර්දාන් ගඟේ නැඟෙනහිර පැත්තේ තියෙන මේ ප්‍රදේශ ටික අපිට උරුමයක් හැටියට දෙන්න.”+

20 එවිට මෝසෙස් ඔවුන්ට මෙසේ කීවේය. “ඔබ පැවසූ ලෙස යෙහෝවා දෙවි වෙනුවෙන් සටන් කරන පිණිස යුද්ධයට සැරසෙන්න.+ 21 ඔබ සමඟ ඉන්න සෑම පුරුෂයෙක්ම යොර්දාන් ගඟෙන් එගොඩ වෙන්න. යෙහෝවා දෙවි තම සතුරන්ව සම්පූර්ණයෙන්ම විනාශ කර දමන තුරු ආපසු හැරී නොඑන්න.+ 22 යෙහෝවා දෙවි දේශය යටත් කර දෙන තෙක්+ ඔබ ගොඩනැඟූ නුවරවලට නොයා+ දිගටම සටන් කළොත් ඔබ යෙහෝවා දෙවි හා ඊශ්‍රායෙල් සෙනඟ ඉදිරියේ නිදොස්. එවිට යෙහෝවා දෙවි මේ ප්‍රදේශය උරුමයක් හැටියට ඔබට දෙයි.+ 23 නමුත් ඔබ එලෙස ක්‍රියා නොකළොත් යෙහෝවා දෙවි ඔබව පව්කාරයන් හැටියට ගණන් ගනියි.+ එම පාපයට ඔබට කවදා හරි වන්දි ගෙවන්න සිදු වෙන බව අමතක කරන්න එපා.+ 24 දැන් ගිහින් ඔබේ දරුවන්ට ජීවත් වෙන්න නුවරවල් ගොඩනඟන්න. ඔබේ සතුන්ට ඉන්න ගාල් හදන්න. ඔබ පොරොන්දු වූ ලෙසම කරන්න.”+

25 එවිට ගාද්වරු හා රූබෙන්වරු මෝසෙස්ට මෙසේ කීවෝය. “ඔබේ සේවකයන් වන අප ඔබ පැවසූ ලෙස කරන්නම්.+ 26 අපේ භාර්යාවන්, දරුවන් හා සත්ව රැළවල් ගිලියද් ප්‍රදේශයේ නුවරවල නතර කර+ 27 යෙහෝවා දෙවි වෙනුවෙන් සටන් කරන පිණිස ගඟෙන් එගොඩට යන්න අපි කැමතියි.+ ඔබයි අපේ ස්වාමීන්. ඒ නිසා ඔබ කියන ලෙසම අපි කරන්නම්.”

28 මෝසෙස්, රූබෙන්වරුන් හා ගාද්වරුන් සම්බන්ධයෙන් පූජක එලියාසර්ටද නූන්ගේ පුත්‍රයා වන යොෂුවාටද ඊශ්‍රායෙල්හි ගෝත්‍රවල ප්‍රධානීන්ටද 29 මෙසේ කීවේය. “ගාද් හා රූබෙන් ගෝත්‍රවලට අයත් සියලු පුරුෂයන් යොර්දාන් ගඟෙන් එගොඩට ගොස් දේශය සම්පූර්ණයෙන්ම යටත් කරගන්නා තුරු යෙහෝවා දෙවි වෙනුවෙන් සටන් කළොත්+ පමණක් ඔවුන්ට ගිලියද් දේශය උරුමයක් හැටියට දෙන්න.+ 30 නමුත් ඔවුන් යුද්ධයට සැරසී ඔබ සමඟ ගඟෙන් එගොඩට යන්න ආවේ නැත්නම් ඔබ ඔවුන්වත් කානාන් දේශයට ගෙන ගොස් එහි පදිංචි කරවන්න.”+

31 එය අසා ගාද් හා රූබෙන් ගෝත්‍රවලට අයත් පුරුෂයෝ මෙසේ කීවෝය. “ඔබේ සේවකයන් වන අපි යෙහෝවා දෙවි පැවසූ ලෙසම කරන්න කැමතියි.+ 32 යෙහෝවා දෙවි වෙනුවෙන් සටන් කරන පිණිස අපි ගඟෙන් එගොඩ වී කානාන් දේශයට යන්නම්.+ නමුත් ගඟෙන් මේ පැත්තේ තියෙන ප්‍රදේශය අපේ උරුමය ලෙස අපට ලබා දෙන්න.”+ 33 මෝසෙස්, ගාද් ගෝත්‍රයටත්+ රූබෙන් ගෝත්‍රයටත්+ යෝසෙප්ගෙන් පැවත ආ මනස්සේ ගෝත්‍රයෙන්+ එක් කොටසකටත් අමෝරිවරුන්ගේ රජු වූ සීහොන්ගේ රාජධානියේ+ පිහිටි නුවරවල් හා ඒ අවට ප්‍රදේශද බාෂාන්හි රජු වූ ඕග්ගේ රාජධානියට+ අයිතිව තිබූ නුවරවල් හා ඒ අවට ප්‍රදේශද දුන්නේය.

34 පසුව ගාද් ගෝත්‍රයට අයත් අය දීබොන්,+ අටාරොත්,+ අරෝයේර්,+ 35 අට්රොත්-ෂොෆාන්, යාසෙර්, යොග්බෙහා, 36 බෙත්-නිම්රා,+ බෙත්-හාරාන්+ යන නුවරවල් ගොඩනඟා ඒවා වටා පවුරුද ඉදි කළෝය.+ ඔවුහු සත්ව රැළවල් සඳහා ගාල්ද සෑදුවෝය.+ 37 රූබෙන් ගෝත්‍රයට අයත් අය හෙෂ්බොන්,+ එලෙයාලෙ,+ කිර්යතායිම්,+ 38 නෙබෝ,+ බාල්-මෙයොන්,+ සිබ්මා යන නුවරවල් නැවත ගොඩනැඟුවෝය. ඉන්පසු ඔවුහු එම නුවරවලට අලුත් නම් තැබුවෝය.

39 මනස්සේගේ පුත්‍රයා වූ මාකීර්ගෙන්+ පැවත ආ අය ගිලියද් දෙසට ගමන් කර එහි ජීවත් වූ අමෝරිවරුන්ව පන්නා දමා එම ප්‍රදේශය යටත් කරගත්තෝය. 40 එබැවින් මනස්සේගේ පුත්‍රයා වූ මාකීර්ගෙන් පැවත ආ අයට මෝසෙස් ගිලියද් නම් ප්‍රදේශය* දුන්නේය.+ 41 මනස්සේ ගෝත්‍රයේ කෙනෙකු වූ යායිර් ගිලියද් ප්‍රදේශයේ තිබූ කුඩා නුවරවල් දෙසට ගමන් කර ඒවා යටත් කරගත්තේය. ඔහු එම නුවරවලට හව්වෝත්-යායිර්+ යන නම තැබුවේය. 42 කේනත්+ දෙසට ගමන් කළ නෝබා, එම නුවරද ඒ අවට තිබූ කුඩා නුවරවල්ද යටත් කරගත්තේය. ඔහු තමාගේ නමින් එම නුවර හැඳින්විය.