ද්විතීය කතාව

1 ඊශ්‍රායෙල් සෙනඟ යොර්දාන්+ ගඟ අසල පිහිටි පාළුකරයේ කඳවුරු බැඳගෙන සිටියදී මෝසෙස් ඔවුන් සමඟ කතා කිරීමට සූදානම් විය. ඊශ්‍රයෙල්වරුන් කඳවුරු බැඳගෙන සිටි එම පාළුකරය පිහිටා තිබුණේ සෆ් නම් ස්ථානයට ඉදිරියෙන්ය. පාරාන්+ පාළුකරයද තෝෆෙල්, ලාබන්, හෂේරොත්+ හා දීෂාහාබ් යන ස්ථානද ඒ අසල පිහිටා තිබිණ. 2 (හොරෙබ් කඳුකරයේ සිට සේයිර් කන්ද හරහා කාදෙෂ්-බර්නේය+ නම් ස්ථානය දක්වා යෑමට දවස් එකොළහක් ගත වේ.) 3 හතළිස්වන+ අවුරුද්දේ එකළොස්වන මාසයේ පළමුවනදා, මෝසෙස් යෙහෝවා දෙවි තමාට පැවසූ සියල්ල ගැන ඊශ්‍රායෙල් සෙනඟ සමඟ එම පාළුකරයේදී කතා කළේය. 4 ඒ අවස්ථාව වන විට ඊශ්‍රායෙල්වරු හෙෂ්බොන් නුවරේ ජීවත් වූ අමෝරිවරුන්ගේ රජු වූ සීහොන්වද+ අෂ්ටාරොත්+ නුවරේ ජීවත් වූ බාෂාන්හි රජු වූ ඕග්වද+ පරාජය කර තිබිණ. ඔවුන් ඕග් රජුව පරාජය කළේ එද්රෙයි+ නම් නුවරේදීය. 5 යොර්දාන් ගඟ අසල තිබූ පාළුකරය පිහිටා තිබුණේ මෝවබ් දේශයේය. එම ස්ථානයේදී ඊශ්‍රායෙල් සෙනඟට දෙවිගේ නීතිය+ පැහැදිලි කිරීමට සූදානම් වූ මෝසෙස් මුලින්ම ඔවුන්ට මෙසේ කීවේය.

6 “ඔබේ පියවරු සමඟ මම හොරෙබ්+ කඳුකරයේ සිටි කාලයේදී අපේ දෙවි වන යෙහෝවා අපට මෙසේ පැවසුවා. ‘ඔබ මේ කඳුකරයෙන් දැන් පිටත්ව යන්න.+ 7 මෙතැනින් පිටත් වී අමෝරිවරුන්+ ජීවත් වන කඳුකර ප්‍රදේශයටත් ඒ අවට පිහිටි සියලුම ප්‍රදේශවලටත් යන්න. ඒ අවට පිහිටි කඳුකර පළාත,+ නෙගෙබ් පළාත,+ පහත් බිම්* හා මහ අරබා+ නිම්නය වෙතටත් වෙරළබඩ තීරය+ වෙතටත් කානානිවරුන්+ ජීවත් වන ප්‍රදේශ වෙතටත් යන්න. ඔබ ලෙබනොන්+ දේශය දක්වාත් යුප්‍රටීස්+ නම් මහ ගඟ දක්වාත් යා යුතුයි. 8 ඒ මුළු දේශයම මම ඔබට අයිති කර දෙන්නම්. යෙහෝවා දෙවි වන මම ඔබේ මුතුන්මිත්තන් වන ආබ්‍රහම්ට, ඊසාක්ට+ හා යාකොබ්ට+ දෙන බවට පොරොන්දු වූ දේශය එයයි. ඔවුන්ටත් ඔවුන්ගෙන් පැවතෙන්නන්ටත් ඒ දේශය අයිති කර දෙන බවට මම ඔවුන්ට දිවුරා පොරොන්දු වුණා.+ එබැවින් ඔබ දැන් ගිහින් ඒ දේශය යටත් කරගන්න.’

9 “දෙවි අපට ඒ ආඥාව දුන් පසු මම ඔබේ පියවරුන්ට මෙසේ යෝජනා කළා. ‘සෙනඟව බලාගන්න මට ලැබී තිබෙන මේ වගකීම මට තනියෙන් දරන්න බැහැ.+ 10 ඔබේ දෙවි වන යෙහෝවා ඊශ්‍රායෙල් සෙනඟව අහසේ තාරකා මෙන් බොහෝ සෙයින් වැඩි කර තිබෙනවා.+ 11 ඔබේ මුතුන්මිත්තන්ගේ දෙවි වන යෙහෝවා පොරොන්දු වූ ලෙසම+ ඔබට ආශීර්වාද+ කර ඔබේ ගණන තවත් දහස් ගුණයකින් වැඩි කරන්න+ කියා මම ප්‍රාර්ථනා කරනවා. 12 නමුත් මේ තරම් විශාල සෙනඟක් මම කොහොමද තනියෙන් බලාගන්නේ? ඔබේ ප්‍රශ්න, ගැටලු, ආරවුල් මට තනියෙන් නම් විසඳන්න බැහැ.+ 13 ඒ නිසා ඔබේ සියලු ගෝත්‍රවලින් ප්‍රඥාවන්ත, දක්ෂ,+ අද්දැකීම්+ ඇති පුරුෂයන්ව තෝරාගෙන මා වෙතට රැගෙන එන්න. ඔබව බලාගැනීමට මම ඔවුන්ව පත් කරන්නම්.’+ 14 එවිට ඔබේ පියවරුන්, ‘ඔබේ යෝජනාව හොඳයි’ කියා මට පිළිතුරු දුන්නා. 15 එබැවින් ඔවුන් සෑම ගෝත්‍රයකින්ම වගකීම් දරන, අද්දැකීම් ඇති, ප්‍රඥාවන්ත පුරුෂයන්ව තෝරාගත්තා. මමද දහස, සියය, පනහ හා දහය බැගින් වූ කණ්ඩායම්වලට සෙනඟව බෙදා ඔවුන්ව බලාගැනීමට ඒ පුරුෂයන්ව පත් කළා.+

16 “ඒ අවස්ථාවේදී, සෙනඟව විනිශ්චය කරන්න පත් කළ ඒ පුරුෂයන්ට මම මෙසේ අණ කළා. ‘ඔබ නඩු විසඳන විට සෙනඟට සාධාරණය+ ඉටු කරන්න. ඊශ්‍රායෙල් ජාතිකයන් දෙදෙනෙක් අතරේ ගැටලුවක් ඇති වන විටත් ඊශ්‍රායෙල් ජාතිකයෙක් හා විදේශිකයෙක් අතරේ ගැටලුවක් ඇති වන විටත් පැති නොගෙන යුක්තිය ඉටු කරන්න.+ 17 නඩු විභාගයකදී කිසිම කෙනෙකුගේ පැත්ත නොගන්න.+ තරාතිරම් නොබලා හැමෝටම එක හා සමානව සලකන්න.+ විනිශ්චය කරද්දී ඔබ නියෝජනය කරන්නේ දෙවිව බව හොඳින් මතක තබාගන්න.+ ඒ නිසා ඔබ මිනිසුන්ට භය විය යුතු නැහැ.+ ඔබට විසඳන්න අමාරු නඩු පමණක් මා වෙතට ගේන්න. මම ඒවා විභාග කරන්නම්.’+ 18 මෙසේ සෙනඟ කළ යුතු හැම දෙයක්ම මම ඔවුන්ට ඒ කාලයේදී කියා දුන්නා.

19 “අපේ දෙවි වන යෙහෝවා අපට පැවසූ ලෙසම අපි හොරෙබ් කඳුකරයෙන් පිටත් වී ඒ භයානක පාළුකරය මැදින් ගමන් කළා.+ අපි අමෝරිවරුන්ගේ+ කඳුකර පළාතට යන මාර්ගය ඔස්සේ ගමන් කර කාදෙෂ්-බර්නේය+ වෙතට පැමිණියා. 20 ඉන්පසු මම ඔබේ පියවරුන්ට මෙසේ පැවසුවා. ‘අපි දැන් ඉන්නේ අමෝරිවරුන්ගේ කඳුකර පළාත ළඟමයි. අපේ දෙවි වන යෙහෝවා අපිට ඒ දේශය ලබා දෙයි.+ ඒ ගැන කිසිම සැකයක් නැහැ. 21 ඒ නිසා ඔබේ මුතුන්මිත්තන්ගේ දෙවි වන යෙහෝවා ඔබට කියූ විදිහටම දැන් ගිහින් ඒ දේශය යටත් කරගන්න.+ ඔබේ දෙවි වන යෙහෝවා අනිවාර්යයෙන්ම ඔබට ඒ දේශය අයිති කර දෙයි.+ ඉතින් කිසි දෙයකට භය වෙන්න එපා. ධෛර්යවත් වෙන්න.’+

22 “නමුත් ඔබේ පියවරුන් මා ළඟට ඇවිත් මට මෙහෙම පැවසුවා. ‘මුලින්ම අපි ඒ දේශයේ තොරතුරු සොයා බලන්න මිනිසුන් කිහිපදෙනෙකුව යවමු. දේශයට ඇතුල් වෙන්න ඕනේ මොන මාර්ගයෙන්ද කියා ඔවුන් අපිට කියයි. අපි අල්ලාගන්න යන නුවරවල් ගැනත් ඔවුන්ගෙන් තොරතුරු දැනගන්න පුළුවන් වෙයි.’+ 23 ඔවුන් කියූ දේට මම එකඟ වුණා. ඒ නිසා මම සෑම ගෝත්‍රයකින්ම එක පුරුෂයෙක් බැගින් තෝරගෙන දේශයේ තොරතුරු සොයා බලන්න ඔවුන්ව පිටත් කර යැව්වා.+ 24 ඔවුන් ඒ කඳුකර පළාතට+ ගොස් එෂ්කොල්+ නිම්නය දක්වාම ගමන් කර දේශයේ තොරතුරු සොයා බැලුවා. 25 ඔවුන් ඒ දේශයෙන් පලතුරු කඩාගෙන ඇවිත් අපිට පෙන්වා,+ ‘යෙහෝවා දෙවි අපිට දෙන්න යන දේශය හරිම සරුසාර දේශයක්’ කියා පැවසුවා.+ 26 නමුත් ඔබේ පියවරුන් ඒ දේශයට යන්න කැමති වුණේ නැහැ.+ ඔවුන් යෙහෝවා දෙවි දුන් ඒ නියෝගයට විරුද්ධව කැරලිගැසුවා.+ 27 ඔවුන් කූඩාරම්වලට වී මැසිවිලි නඟමින් මෙසේ පැවසුවා. ‘යෙහෝවා දෙවි අපිට වෛර කරනවා.+ ඔහු ඊජිප්තු+ දේශයේ ඉඳන් අපිව මේ දේශයට ගෙනාවේ අමෝරිවරුන් අතින් අපිව නැති කර දමන්නයි.+ 28 ඔබ අපිව කොහෙටද මේ එක්කගෙන යන්නේ? දේශයේ තොරතුරු බලන්න ගිය අපේ සහෝදරයන් කිව්ව දේවල් ඔබට මතක නැද්ද?+ “ඒ දේශයේ ඉන්න මිනිස්සු යෝධයෝ වගේ.+ පවුරුවලින් වට කර තිබෙන ඔවුන්ගේ නුවරවල් අහසට ගෑවෙන තරම් උසයි.+ අනාක්ගෙන්+ පැවතෙන අයත් එහෙ ඉන්නවා” කියා ඔවුන් අපිට කිව්වා. ඉතින් අපේ හිතට මහත් භයක් දැනෙනවා.’

29 “එවිට මම ඔවුන්ට මෙසේ පැවසුවා. ‘අධෛර්යයට පත් වෙන්න එපා. ඒ මිනිසුන්ට භය වෙන්න ඔබට කිසිම හේතුවක් නැහැ.+ 30 ඔබේ දෙවි වන යෙහෝවා ඊජිප්තු දේශයේදී ඔබ වෙනුවෙන් සටන් කළ ආකාරය ඔබ ඇස් දෙකෙන්ම දැක්කා.+ ඒ නිසා ඔහු දැනුත් ඔබ ඉදිරියෙන් ගමන් කර ඔබ වෙනුවෙන් සටන් කරන බවට කිසිම සැකයක් නැහැ.+ 31 ඔබේ දෙවි වන යෙහෝවා පාළුකරයේදිත්+ ඔබව රැකබලා ගත් ආකාරය ඔබට හොඳින් මතක ඇති. පියෙක් තම පුතාව වඩාගෙන යන්නාක් මෙන් ඔබේ මුළු ගමනේදී+ ඔහු ඔබව උසුලාගෙන ගියා.’+ 32 මම ඒ තරම් දේවල් කියලත් ඔබේ පියවරු ඔවුන්ගේ දෙවි වන යෙහෝවාව විශ්වාස කළේ නැහැ.+ 33 නමුත් අපිට ඉදිරියෙන් ගමන් කර අපිට කඳවුරු බැඳගන්න සුදුසු තැන් සොයා දුන්නේ දෙවියි.+ ඔහු රාත්‍රියේදී ගිනි ජාලාවක් මගින්ද දවාලේදී වලා ටැඹක් මගින්ද අපිට මඟ පෙන්නුවා.+

34 “ඔවුන් කියූ හැම දෙයක්ම අසාගෙන සිටි යෙහෝවා දෙවි අන්තිමේදී මහත් උදහසකින් මෙසේ පැවසුවා.+ 35 ‘මා ඔබේ පියවරුන්ට දෙන්න පොරොන්දු වූ දේශය, මේ දුෂ්ට පරම්පරාවේ කිසිවෙකුට දකින්න ලැබෙන්නේ නැහැ.+ 36 නමුත් යෙෆුන්නෙගේ පුත්‍රයා+ වන කාලෙබ්ට ඒ අවස්ථාව ලැබෙයි. ඔහු යෙහෝවා දෙවි වන මට මුළු හදවතින්ම සේවය කරනවා. ඒ නිසා ඔහු බලන්න ගිය ඒ දේශයෙන් කොටසක් මම ඔහුටත් ඔහුගේ පුත්‍රයන්ටත් දෙනවා.+ 37 (ඔබේ පියවරුන් නිසා යෙහෝවා දෙවි මා සමඟත් උදහස් වී මෙසේ පැවසුවා. ‘ඔබටත් ඒ දේශයට යන්න ලැබෙන්නේ නැහැ.+ 38 ඒ අවස්ථාව ලැබෙන්නේ ඔබේ සේවකයා වන නූන්ගේ පුත් යොෂුවාටයි.’+ ඊශ්‍රායෙල් පුත්‍රයන්ට ඒ දේශය උරුමයක් ලෙස ලබා දීමට පත් කර තිබෙන්නේ යොෂුවාවයි. දෙවි ඒ කාර්යය සඳහා ඔහුව ශක්තිමත් කළා.)+ 39 “මේ දේශයට ගියොත් සතුරන් අපේ දරුදැරියන්ව පැහැරගනී”+ කියා ඔබ පැවසුවා මතකද? එහෙත් ඒ දේශයට යන්නේ කිසිම දෙයක් නොතේරෙන ඒ දරුදැරියන් පමණයි. මා ඒ දේශය උරුම කර දෙන්නේ ඔවුන්ටයි. 40 ඔබ සියලුදෙනාම දැන් මෙතැනින් පිටත් වී රතු මුහුදට යන මාර්ගය ඔස්සේ නැවත පාළුකරයට යන්න.’+

41 “ඒ අවස්ථාවේදී ඔබේ පියවරුන් මෙසේ පැවසුවා. ‘අපි යෙහෝවා දෙවිට විරුද්ධව පව් කළා.+ යෙහෝවා දෙවි අපට පැවසූ විදිහටම අපි දැන් ගිහින් ඒ ජාතීන්ට විරුද්ධව සටන් කරමු.’ කඳුකරයට ගිහින් යුද්ධ කරන එක සුළු දෙයක් කියා ඔවුන් සිතුවා. ඒ නිසා ඔවුන් යුද්ධායුධ රැගෙන යන්න සූදානම් වුණා.+ 42 නමුත් යෙහෝවා දෙවි ඔවුන්ට මේ දේ පවසන ලෙස මට අණ කළා. ‘මගේ ආශීර්වාදය ඔබට නැහැ.+ ඒ නිසා කඳුකරයට යන්න එපා. ඔබ ගියොත් ඔබ අනිවාර්යයෙන්ම සතුරන්ගේ අතින් පරාජයට පත් වෙයි.’+ 43 නමුත් ඔබේ පියවරුන් යෙහෝවා දෙවිගේ ඒ නියෝගය කිසි ගණනකට ගත්තේ නැහැ. ඔවුන් කැරලිගසා+ හිතුවක්කාර ලෙස කඳුකරයට ගියා.+ 44 එවිට කඳුකරයේ ජීවත් වූ අමෝරිවරුන් ඔවුන්ට විරුද්ධව ඇවිත් ඔවුන්ට පහර දුන්නා.+ අමෝරිවරුන් මීමැසි රංචුවක් මෙන් ඔවුන් පසුපස එළවාගෙන ඇවිත්, සේයිර් කඳුකරයේ පිහිටි හොර්මා+ නම් ස්ථානය දක්වාම ඔවුන්ව පන්නා දැමුවා. 45 ඉන්පසු ඔවුන් නැවත කඳවුරට ඇවිත් යෙහෝවා දෙවි ඉදිරියේ හඬා වැලපුණා. නමුත් යෙහෝවා දෙවි ඔවුන්ට සවන් දුන්නේ නැහැ.+ ඔහු ඔවුන්ට කිසි පිළිතුරක් දුන්නේ නැහැ.+ 46 එබැවින් අපට බොහෝ කාලයක් කාදෙෂ්හි ඉන්න සිදු වුණා.+