Dee soni dee Lukasi sikifi
17 Hën Jesosi piki dee bakama fëën taa: „Hii juu soni o dë di sa hai sëmbë puu a di pasi u Gadu. Ma mi bai helu da di sëmbë di o du soni di o mbei wotowan kumutu a di pasi u Gadu! 2 A bi o möön bunu u de tei wan gaan gindi sitonu* tai nëën gangaa, nöö de tjëën go tuwë a di ze ka faa mbei wan u dee pikiwan aki kumutu a di pasi u Gadu. 3 Un musu luku bunu e. Ee i baaa du wan hogi, nöö i musu gandji dëën. Nöö ee a lei taa di soni di a du hati ën, nöö i musu dëën paadon. 4 Aluwasi ee seibi pasi a wan daka a du soni ku i, hën a ko a i seibi pasi ko piki i taa: ’Da mi paadon baa.’ Nöö i musu dëën paadon e.”
5 Hën dee apösutu piki Masa Jesosi taa: „Heepi u be di biibi fuu ko möön taanga.” 6 Hën Masa Jesosi piki de taa: „Ee di biibi fuunu piki kuma di sii de kai mutaadi,* nöö joo sa taki da di pau aki taa: ’Hön kumutu aki go paandi iseei a di ze,’ nöö a o piki i buka.
7 Undi fuunu o abi wan saafu, nöö te a go a wooko a goon dendu, nasö te a go luku dee sikapu te a ko, nöö i taki dëën taa: ’Ko sindo njan’? 8 Wë na wan fuunu bi o taki sö. Ma joo taki dëën taa: ’Seeka hesihesi, nöö i go boi soni seti tafa da mi be mi njan. Go bisi wan fesiköki,* nöö i tja soni ko da mi be mi njan bebe te mi kaba. Nöö baka di dë, nöö i sa go njan awaa.’ 9 Un pakisei taa di masa u di saafu o dëën tangi u di a du di wooko di a mandëën faa du ö? Wë nönö. 10 Sö nöö a dë ku unu tu. Te un du dee soni dee Gadu manda unu fuun du, nöö un musu taki taa: ’U da saafu di an fiti u kisi gafa. Dee soni dee u bi musu du, de u du dë kaa.’”
11 Di a bi dë a pasi nango a Jelusalën, hën a pasa a wan pasi di ta paati Samalia ku Galilea. 12 Di a go dou a wan köndë, hën a miti teni womi di bi abi kököbë. De bi dë longi ku ën. 13 Hën de bai taa: „Mësitë, abi tjalihati fuu baa!” 14 Di Jesosi si de, hën a piki de taa: „Un go a dee begima be de si unu fa un dë.” Di de bi dë a pasi nango, hën de ko bëtë djee. 15 Di wan u de si taa a ko bëtë, hën a bia toona go miti Jesosi. A bi ta bai ta gafa Gadu. 16 A tjökö kini a goon bendi hedi a Jesosi fesi, ta dëën tangi. Di womi aki bi dë wan Samalia sëmbë. 17 Hën Jesosi hakisi ën taa: „Teni sëmbë ko bëtë, na sö nö? Wë nöö naasë dee wotowan dë? 18 Na wan u de toona ko gafa Gadu möön leki di woto köndë sëmbë aki nö?” 19 Hën Jesosi piki di womi taa: „Hopo, nöö i go fii e. Di biibi fii, hën mbei i ko bëtë.”
20 Di dee Faliseima hakisi Jesosi na un ten di Tii u Gadu o ko, hën a piki de taa: „Te di Tii u Gadu o ko, nöö an o ko a wan fasi u hii sëmbë sa si gbelingbelin taa a ko. 21 Na wan sëmbë o sa taki taa: ’Luku ën aki!’, nasö ’luku ën ala!’ Biga mi taki da unu e, di Tii u Gadu dë a unu mindi.”
22 Hën a piki dee bakama fëën taa: „Wan ten o ko ka woon kë u di sëmbë di ko dë Libisëmbë Miii dë ku unu, ma tökuseei wan o si di ten dë möönsö. 23 Nöö sëmbë o ko piki unu taa: ’Un luku ën aki’, nasö ’un luku ën ala’, nöö wan musu biibi e, söseei wan musu waka a de baka. 24 Biga leti kumafa faja ta koti a liba ala, sö nöö soni o dë a di ten u di sëmbë di ko dë Libisëmbë Miii. 25 Ma ufö di ten dë dou, a o tja sömëni sitaafu, söseei dee sëmbë u di ten aki o ta sösö ën. 26 Nöö leti kumafa soni bi waka a di ten u Noa, sö nöö soni o dë a di ten u di sëmbë di ko dë Libisëmbë Miii. 27 Dee sëmbë u di ten u Noa bi ta njan ta bebe, söseei womi ku mujëë bi ta tööu u tee di daka dou ka Noa go a di gaan boto. Hën di Gaan Wata ko kii hii de tuu fiaa. 28 Di seei soni aki bi miti dee sëmbë u di ten u Lötu. De bi ta njan ta bebe, ta bai soni, ta sei soni, söseei de bi ta paandi soni ta mbei wosu. 29 Ma di daka di Lötu kumutu a Sodöm go, hën faja kumutu a liba ala ku wanlö sitonu di ta kisi faja, hën de kai ko tjuma hii dee sëmbë u Sodöm kii fiaa. 30 Sö nöö soni o dë a di ten u di sëmbë di ko dë Libisëmbë Miii.
31 A di daka dë, di sëmbë di dë a wosu liba an musu saka ko a wosu ko tei lai fëën möön. Söseei di sëmbë di dë a goon dendu an musu bia go a wosu go tei dee soni fëën dee bi fika a baka. 32 Un mëni di soni di bi pasa ku di mujëë u Lötu e. 33 Biga di sëmbë di kë tjubi di libi fëën, o lasi ën. Ma di sëmbë di lasi hën libi o tjubi ën. 34 Mi taki da unu taa a di ndeti dë, tu sëmbë o dë a wan bedi, nöö Gadu o tei wan tja go, nöö a o disa di wotowan. 35 Tu mujëë o dë ta fon alisi, nöö Gadu o tei wan tja go, nöö a o disa di wotowan.” 36* —— 37 Hën de hakisi Jesosi taa: „Wë, Masa o, naasë di soni dë o pasa? Hën a piki de taa: „Ka soni dëdë pondi a wan kamian, nöö naandë dee tingifou ta hai ko zunta.”