Dee soni dee Lukasi sikifi
13 A di ten dë, wanlö u dee sëmbë dee bi sai dë ko piki Jesosi taa Pilati bi kii wanlö Galilea sëmbë di de bi ta tja soni go da Gadu. 2 Hën Jesosi piki de taa: „Un si kuma hogi dee Galilea sëmbë dë bi hogi möön dee woto Galilea sëmbë mbei di gaan hogi dë bi miti de u? 3 Wë nönö, na di soni dë mbei e. Ma ee wan bia unu libi, nöö sö unuseei o dëdë tu. 4 Un si kuma dee 18 sëmbë dee di hei wosu u Siloa bi kai kii, bi hogi möön hii dee woto sëmbë dee ta libi a Jelusalën u? 5 Wë nönö, na di soni dë mbei e. Ma ee wan bia unu libi, nöö sö unuseei o dëdë tu.”
6 Baka di dë, hën a konda di woto aki da de: „Wan womi bi paandi wan fuuta pau de kai figa a di goon fëën. Ma di a go suku fuuta nëën an feni na wan. 7 Hën a piki di sëmbë di ta luku di goon taa: ’Dii jaa longi kaa mi ta ko ta suku njanjan a di pau aki, ma ma ta feni möönsö. Faa ën puu dë! Andi seei a dë a di goon ta du?’ 8 Hën di sëmbë di ta luku di goon piki ën taa: ’Masa o, boo disëën di jaa aki möön, nöö mi o diki wan ngötö lontu ën buta mësi dëën. 9 Nöö ee a ko pai njanjan bakaten, nöö a bunu. Ma ee an pai möönsö, nöö i sa faa ën.’”
10 A wan Saba daka, a bi ta lei sëmbë soni a wan u dee wosu ka dee Dju nango dini Gadu. 11 Wan mujëë bi dë naandë di bi abi wan taku soni nëën liba, nöö 18 jaa longi di soni dë bi ta mbei a ta suwaki. An bi sa ta hopo taanpu too. Dobadoba sö a bi ta dë. 12 Di Jesosi si di mujëë, hën a waka go miti ën, hën a piki ën taa: „Mujëë o, i böö u di siki fii e.” 13 Hën a buta maun a di mujëë liba. Hën wantewante dë di mujëë hopo taanpu tololoo, hën a bigi gafa Gadu. 14 Ma di hedima u di wosu ka dee Dju nango dini Gadu hati bi boonu te na soni, u di Jesosi kula di mujëë a Saba daka. Nöö hën a piki dee woto sëmbë dë taa: „Sikisi daka u abi u wooko, nöö a dee sikisi daka dë dendu un musu ko u de kula unu. Ma na a Saba daka e.” 15 Hën Masa Jesosi piki ën taa: „Un dee bödjëëma aki, hiniwan Saba daka un ta lusu dee kau ku dee buliki fuunu ta tja de go bebe wata. Na sö nö? 16 Nöö di mujëë aki wë? A dë wan bakamii u Abahamu di Saatan ta sitaafu 18 jaa longi kaa. Wan si kuma a fiti faa kumutu a di sitaafu aki a Saba daka nö?” 17 Di Jesosi fan sö te a kaba, hën sen kisi dee felantima fëën te na soni. Ma hii dee woto sëmbë tuu bi ta wai seei ku hii dee gaan wooko dee a bi ta du.
18 Baka di dë, hën a taa: „Ku andi u sa tei di Tii u Gadu maaka? 19 A dë kuma wan pau sii de kai mutaadi di wan womi paandi a di goon fëën. Nöö a ta göö te a toon wan gaan pau, nöö dee fou ta ko mbei wosu a dee maun fëën.”
20 Hën a toona taki taa: „Ku andi mi sa tei di Tii u Gadu maaka? 21 A dë kuma sooda di wan mujëë tei dian ku teni kilo boon, hën a soopu ko gindii.”
22 Di Jesosi bi dë a pasi nango a Jelusalën, nöö a bi ta lei sëmbë soni a dee gaangaan köndë ku dee pikipiki köndë tuu. 23 Hën wan womi hakisi ën taa: „Masa o, kondakonda sëmbë nöö o feni libi ö?” Hën Jesosi piki de taa: 24 „Un musu biinga fuun pasa a di piki döö e. Biga mi taki e, sömëni sëmbë o pooba u pasa a di piki döö, ma tökuseei de an o sa denda nëën. 25 Te di sëmbë di abi di wosu hopo go söötö di döö, nöö woon fika a dööbuka dë ta naki di döö ta bai taa: ’Masa, jabi di döö da u baa!’ Ma a o piki unu taa: ’Ma sa’ naasë un kumutu.’ 26 Nöö di juu dë woon piki taa: ’U ku i bi ta njan ta bebe makandi, nöö i bi ta lei sëmbë soni a dee gaan pasi fuu.’ 27 Ma a o piki unu taa: ’Ma sa’ naasë un kumutu. Un waka pasa go kumutu aki, un hogiduma unu!’ 28 Te un si Abahamu, Isaki, Jaköpu, ku hii dee tjabukama u Gadu a di Tii u Gadu dendu, nöö woon dë ta këë ta njan tanda* u di un fika a döö. 29 Boiti di dë, sömëni sëmbë o kumutu a hii së u goonliba, nöö de o sindo a tafa a di Tii u Gadu. 30 Mi taki e, so u dee sëmbë dee bi dë fosuwan, o ko dë lasitiwan, nöö so u dee lasitiwan o ko dë dee fosuwan.”
31 A di daka dë seei so u dee Faliseima ko piki Jesosi taa: „A bëtë i kumutu aki e, biga Helodi ta suku i u kii.” 32 Hën Jesosi piki de taa: „Un go piki di matu dagu dë taa: ’Mi ta jaka taku soni puu a sëmbë liba, söseei mi ta kula dee suwakima. Nöö mi o du dee soni aki tide ku amanjan, nöö a di u dii daka fëën mi o kaba.’ 33 Ma tide, amanjan, ku woto amanjan mi o go dou ku di wooko aki u te kuma mi go dou a Jelusalën. Biga de an ta kii wan tjabukama u Gadu a wan woto kamian, boiti Jelusalën. 34 Un dee sëmbë u Jelusalën, un kii dee tjabukama u Gadu, nöö dee sëmbë dee Gadu bi manda da unu tuu un vinde sitonu naki kii. Sömëni pasi mi bi kë tja dee mii fuunu ko a wan kumafa wan mama ganian ta kai dee mii fëën u de ko nëën hanza basu faa tjubi de. Ma nöö wan bi kë möönsö. 35 Gadu go disa di wosu fuunu. Mi taki da unu e, wan o si mi möön u te kuma un taki taa: ’Limbo pasi da di sëmbë di ta ko a di në u Jehoufa!’”*