Dee soni dee Lukasi sikifi

19 Baka di dë, hën Jesosi go a Jelikou. A bi ta pasa a di köndë ganda. 2 Nöö wan womi de kai Zakeosi bi sai dë. A bi dë wan womi di bi ta pii lantimöni, nöö a bi gudu. 3 A bi kë saambë da Jesosi, ma an bi sa si ën a dee hia sëmbë dendu, biga a bi dë wan sati womi. 4 Nöö hën a kule go a fesi go subi a wan figa pau go dë a liba ala, sö taa te Jesosi bi o pasa dë, nöö a o si ën. 5 Te wan pisi, hën Jesosi ko pasa, nöö hën a hopo hedi luku liba, hën a taa: „Zakeosi! Saka hesihesi ko a goon. Biga tide mi musu ko a i pisi.” 6 Hën Zakeosi saka hesihesi ko a goon, nöö ku wai seei a tja Jesosi go nëën pisi. 7 Di dee woto sëmbë si sö, hën de bigi ta kuutu ta taki taa: „A go a di wosu u wan hogiduma.” 8 Nöö hën Zakeosi hopo taanpu, hën a piki Masa Jesosi taa: „Masa o, mi o paati dee gudu u mi leti mindi, nöö mi o da dee pootima hafu. Nöö ee mi bi ganjan wan sëmbë tei di möni fëën, nöö mi o dëën fö toon möön hia möön fa mi bi tei.” 9 Hën Jesosi piki ën taa: „Wë tide Gadu mbei dee sëmbë u di wosu aki feni gaan bunu. Biga di womi aki seei da wan womi mii u Abahamu. 10 Di sëmbë di ko dë Libisëmbë Miii ko u ko suku dee sëmbë dee bi lasi u heepi de.”

11 A di juu di Jesosi bi ta fan ku dee sëmbë dë, hën a konda wan woto da de möön, u di a bi dë zuntu ku Jelusalën, nöö de bi ta mëni taa Gadu bi o bigi tii wantewante dë. 12 A bi taa: „Wan könu mii bi go a wan longi köndë u de butëën ko könu, nöö baka di dë nöö a bi o toona ko. 13 A kai teni u dee saafu fëën ko nëën, hën a da de teni mina,* hën a piki de taa: ’Un wooko ku di möni aki u mi sa feni wini fëën u te mi toona ko.’ 14 Ma dee sëmbë u di köndë fëën bi buuse ën te de manda buka go da dee sëmbë u di köndë ka a nango ala taa: ’Wa kë di sëmbë aki toon könu fuu e.’

15 Ma tökuseei de butëën ko könu, hën a toona ko nëën pisi. Hën a kai dee saafu fëën dee a bi da di möni,* hën a hakisi de un mëni de feni baka di de wooko ku di möni di a bi da de. 16 Hën di fosuwan ko nëën, hën a taa: ’Masa o, i bi da mi wan mina, nöö mi feni teni mina a liba.’ 17 Hën di masa piki ën taa: ’Aai womi, i wooko bunu seei! I da wan bunu saafu. Wë nöö u di i dë u futööu ku di piki soni aki, mbei mi o buta i be i dë hedima u teni köndë.’ 18 Hën di u tu saafu ko, hën a taa: ’Masa o, i bi da mi wan mina, nöö mi feni feifi mina a liba.’ 19 Hën di masa piki di saafu dë tu taa: ’Mi o buta i be i dë hedima u feifi köndë.’ 20 Ma wan wotowan ko, hën a piki ën taa: ’Masa o, luku di mina fii aki. Mi bi butëën a wan koosu pisi, hën mi tjëën go tjubi. 21 Mi du di soni aki u di mi ta fëëë i. Biga i da wan hogihatima, i ta tei möni di an dë u fii, söseei i ta koti soni di ja paandi.’ 22 Hën di masa piki ën taa: ’I takuhati saafu ju! Mi o kuutu i ku dee soni dee i taki. I taki taa mi da wan hogihatima, taa mi ta tei möni di an dë u mi, söseei taa mi ta koti soni di ma paandi. Na sö u? 23 Wë nöö faandi mbei ja bi tei di möni* u mi tja go buta a banku, nöö te mi toona ko nöö a bi o ko möön hia?’

24 Hën di masa piki dee sëmbë dee bi taanpu dë taa: ’Un tei di mina puu nëën, nöö un da di saafu di abi dee teni mina.’ 25 Nöö hën de piki ën taa: ’Wë masa o, a abi teni mina kaa!’— 26 ’Mi taki da unu e, di sëmbë di abi, o feni möön hia. Ma nöö di sëmbë di abi wan pikiwan nöö, nöö di pikiwan dë seei de o tei puu nëën maun. 27 Un tja dee felantima u mi dee an bi kë u mi dë könu u de ko aki, nöö un kii de leti a mi fesi aki.’”

28 Di Jesosi taki dee soni dë te a kaba, hën a tei pasi nango a Jelusalën. 29 Di a zuntu ku Bëtifaigi ku Betania di dë a di Olëifi Kuun, hën a manda tu u dee bakama fëën go. 30 A piki de taa: „Un go a di köndë di un ta si a unu fesi dë, nöö te un dou, nöö woon si wan buliki mii taitai. Na wan sëmbë sindo nëën liba wan daka. Un lusu ën, nöö un tjëën ko aki. 31 Ma ee wan sëmbë hakisi unu taa: ’Faandi mbei un ta lusu ën?’, nöö un musu piki ën taa: ’Masa abi ën fanöudu.’” 32 Hën dee tu bakama fëën go, hën de si di buliki leti kumafa a bi piki de. 33 Ma di de bi dë ta lusu ën, hën dee sëmbë dee bi abi ën hakisi de taa: „Faandi mbei un ta lusu di buliki mii u du?” 34 Hën de taa: „Masa abi ën fanöudu.” 35 Hën de tja di buliki mii go da Jesosi, hën de jabi dee koosu u de nëën liba, hën de mbei Jesosi sindo nëën liba.

36 Dee sëmbë dee bi ta waka a Jesosi fesi bi ta jabi dee koosu u de a di pasi liba. 37 Di a zuntu ku di pasi ka de ta bazia di Olëifi Kuun, hën hii dee bakama fëën bigi ta bai ta gafa Gadu, u di de bi ta wai taa de si sömëni foombo soni. 38 De bi ta bai taa: „Be di sëmbë di Jehoufa* manda ko faa tii kuma Könu feni gaan bunu! Be Gadu ku libisëmbë ko dë bunu ku deseei baka! U ta gafa Gadu di dë a di möön hei kamian a liba ala!” 39 Ma so u dee Faliseima dee bi dë a dee hia sëmbë dendu dë piki Jesosi taa: „Mësitë, bai dee bakama fii be de kabuka dë e.” 40 Hën Jesosi piki de taa: „Wë ee de kabuka, nöö dee sitonu aki de o bia ko ta fan a de kamian.”

41 Di Jesosi dou zuntu ku Jelusalën, hën a luku di köndë, hën a bai këë. 42 Hën a taa: „Mi wensi taa iseei bi sa fusutan andi i bi musu du fii feni bööböö libi, ma nöunöu dee soni aki dë tjubitjubi soni da i. 43 Biga wan ten o ko ka dee felantima fii o ko mbei wan peni ku wanlö saapu buka posu lontu i buta a djegi, nöö de o pena i. 44 De o naki i booko kaba a sösö, nöö de o naki dee mii fii kii tuu. Nöö na wan u dee sitonu fii o fika woto a woto liba. De tuu de o booko tuwë a goon. U di ja bi fusutan na u ten Gadu bi ko u ko kuutu i.”

45 Hën Jesosi denda go a di Wosu u Gadu, hën a bigi jaka hii dee sëmbë dee bi ta sei soni. 46 A bi piki de taa: „A sikifi a Gadu buku taa: ’Di Wosu u mi da wan kamian ka sëmbë musu ta ko begi.’ Ma uun butëën ko tan kamian u fufuuma.”

47 Hiniwan daka a bi ta dë a di Wosu u Gadu ta lei sëmbë soni. Ma dee fesima u dee begima ku dee sabima u Wëti, ku dee hedima u dee Dju bi ta suku u kii ën. 48 Ma de an bi saanfa u du u de sa feni ën kii, biga hii juu sëmbë bi ta dë nëën bandja u haika dee soni dee a ta taki.