Sömëni sëmbë o pasa di kaba libilibi​—I sa pasëën tu

Di Bëibel ta piki u taa sëmbë o dëdë te di kaba dou: „Fu sensi di Masa Gadu mbei goonliba, nöö di lö gaan fuka dë an bi ko pasa wan daka eti. Nöö söseei tu an o pasa ufö di ten dë dou. Ka soni o hogi tjika dë, mi taki da unu taa ee Masa Gaangadu an tapëën hesi, nöö na wan sëmbë o dë ku libi a goonliba möön” (Mateosi 24:21, 22). Ma Gadu paamusi u taa sömëni sëmbë o pasa di kaba libilibi: „A a’ wan daka di goonliba aki o kaba . . . . Ma dee sëmbë dee ta piki Masa Gadu buka, de, de an o kaba möönsö, ma de o dë u teego.”​—1 Johanisi 2:17.

Andi i musu du ee i kë pasa di kaba u di goonliba aki libilibi, söseei ee i kë „dë u teego”? I musu bigi ta tjubi soni u seeka iseei da di ten dë u? Wë nönö. Di Bëibel ta da u taanga u du dee möön fanöudu soni. U ta lesi taa: „Di i si dee soni dë o pasa sö [o tjuma kaba a sösö, NW], nöö an fiti fuu libi limbolimbo da Gadu nö? Fa u ta luku di daka dë, nöö un boo ta watji ën seei ku wai ta biinga ta du soni fu di daka [u Jehovah] musu ko möön hesi” (2 Petuisi 3:10-12). Di Bëibel taki taa hii dee soni dee o tjuma kaba gbegedee, da dee tii u di goonliba aki, ku dee sëmbë dee ta dë ku dee tiima aki a wan së, ka u de dë ku Gadu a wan së. U ta fusutan gbelingbelin taa ee u bi o tjubi soni u pasa di kaba u di goonliba aki libilibi, di soni dë an bi o sa heepi u seepiseepi.

Awa, ee u kë pasa di kaba u di goonliba aki libilibi, nöö musu dini Jehovah Gadu ku hii u hati, nöö u ko lei unfa a kë taa u musu libi (Sefanja 2:3). Wa musu ta du kuma wa ta si dee soni dee ta lei taa u ta libi a wan apaiti pisiten, leti kumafa gaan hia sëmbë ta du. Ma u musu ’ta hoi a pakisei nöömö taa di daka u Jehovah dë zuntu’. Dee Jehovah Kotoigi sa lei i a di Bëibel andi i musu du fii sa pasa di kaba di ta ko libilibi.