Dee dëdë sëmbë o toona libi baka—Unfa i sa dë seiki u di soni aki?

A dë wan don soni u pakisei taa dee dëdë sëmbë o toona ko a libi baka u? Apösutu Paulosu an bi ta pakisei sö. A bi sikifi taa: „Nöö hën da fa u hai kumutu disa hii soni u köndë ko ta biibi a [Jesosi] Keesitu liba aki, nöö ee te u dëdë nöö a kaba, nöö hën da u ko dë dee möön gaan hogihedima u mundu. Ma an dë sö e, dee sëmbë. Keesitu weki baka a dëdë tuu. U hii dee sëmbë dee bi dëdë kaa, nöö hën da di fosu wan di weki baka” (1 Kolenti 15:19, 20). Paulosu bi si di weki di sëmbë o weki ko a libi baka kuma wan soni di o pasa tuutuu. Di weki di Jesosi bi weki kumutu a dëdë ko a libi baka ta lei taa di soni aki o pasa tuutuu a (Tjabukama 17:31). Di soni aki mbei Paulosu bi kai Jesosi di „fosu wan di weki baka”. Hën da a bi dë di fosu sëmbë di bi weki kumutu a dëdë u feni di libi u teego. Ee Jesosi bi da di fosuwan di bi weki ko a libi baka, nöö u sa dë seiki taa wotowan bi o ko a libi baka tu.

Boo go luku wan woto soni di sa mbei i dë seiki taa sëmbë o toona weki ko a libi baka. Jehovah da wan Gadu di ta taki tuutuu soni. „Gadu an ta lëgëdë” (Titusi 1:2). Jehovah an mindi soni wan daka, nöö nöiti a o du ën tu. Jehovah bi lei u kaa taa a sa weki sëmbë ko a libi baka. Nöö i si kuma a o paamusi u taa a o weki sëmbë ko a libi baka, nöö an o du ën u? Kwetikweti!

Faandi mbei Jehovah seeka soni u weki dee dëdë sëmbë a di ten di ta ko? U di a lobi de. „Ee wan sëmbë dëdë, a sa toona libi baka u?” Sö Jöpu bi hakisi. „Joo kai mi, nöö mi o piki i. Joo hangi mi, mi di soni di i mbei ku iseei maun” (Jöpu 14:14, 15). Jöpu bi dë seiki taa di lobihati Tata fëën di dë a liba ala bi o kë weki ën ko a libi baka seei. Gadu tooka u? „Mi da Jehovah, nöö ma tooka” (Maleaki 3:6). Gadu kë u dee dëdë sëmbë toona ko a libi baka, nöö a kë u de dë gösöntu, söseei u de dë waiwai. Di soni dë wan mama nasö wan tata di lobi wan mii fëën bi o kë ee di mii fëën bi ko dëdë. Ma di soni di tooka, hën da Gadu hën a abi di makiti u du di soni di a kë.​—Psalöm 135:6.

Jehovah o da di Womi Mii fëën di makiti u du wan soni di o tja gaan piizii ko da dee sëmbë dee ta tjali u di dee lobiwan u de dëdë. Unfa Jesosi ta fii u di a sabi taa a o weki sëmbë ko a libi baka? Ufö Jesosi bi weki Lazalosi ko a libi baka, a bi si fa dee sisa u Lazalosi ku dee mati fëën bi ta tjali, nöö ’wata bi pasa a Jesosi wojo’ tu (Johanisi 11:35). Wan woto pasi Jesosi bi miti wan mujëë u di köndë Nain di manu fëën bi dëdë kaa. Nöö di wan kodo womi mii u di mujëë dë bi ko dëdë tu. Di Jesosi si di mujëë, nöö „tjali fëën kisi ën. Hën a fan ku ën taa: ’Mujëë o, kabuka.’” Hën wantewante dë a weki di womi mii ko a libi baka (Lukasi 7:13). U ta si taa Jesosi ta tjali tuutuu te wan sëmbë dëdë. A o dë wan piizii soni seei dëën te a o puu di tjali di sëmbë ta tjali a hii së u goonliba, u mbei de ko dë waiwai!

A bi hati i di wan sëmbë fii bi dëdë u? Kandë i ta si kuma dëdë da wan soni di an o kaba möönsö. Ma a o kaba, u di Gadu o mbei di Womi Mii fëën weki dee sëmbë dee dëdë ko a libi baka. Hoi a pakisei taa Gadu kë fii si fa a o du di soni dë. A kë fii dë a goonliba fii sa baasa dee lobiwan fii dee bi dëdë. Pakisei fa a o dë u seeka soni u libi makandi ku de u teego u di ja o ta fëëë möön taa wan soni o ko paati i ku de!

Lionel di bi taki wan soni a di fosu woto, taki taa: „Bakaten mi bi ko lei taa Gadu o weki dëdë sëmbë baka. Bigibigi a bi taanga da m’ u biibi di soni dë, nöö ma bi biibi di sëmbë di bi piki m’ di soni dë tu. Ma m’ bi go öndösuku ën a di Bëibel, hën m’ ko si taa a bi dë sö tuu! Mi kë toona si mi mma tata seei.”

I bi o kë ko sabi möön soni ö? Dee Jehovah Kotoigi bi o wai seei u lei a di fii seei Bëibel faandi mbei de dë seiki taa Gadu o weki dëdë sëmbë ko a libi baka.b