DI WOTO DI NAMA KU DI KAFITI | UN PEI SËMBË DA DEE JEHOVAH KOTOIGI?
Un pei sëmbë da dee Jehovah Kotoigi?
U dë wan ölganisaasi di dë a hii së u goonliba, nöö wa nama ku na wan woto keiki. Hii fa di hedikantoo fuu dë na Amëëkanköndë, tökuseei gaansë u dee Jehovah Kotoigi ta libi a dee woto köndë. Söwan aiti milion Jehovah Kotoigi ta lei sëmbë soni u Bëibel a möön leki 230 köndë. U ta du di wooko aki u di Jesosi bi taki taa: „Di bunu buka u di Njunjun Tii u Gadu musu paaja te dou hii goonliba e, be hii föluku musu jei”.—Mateosi 24:14.
U ta mbei möiti u hoi useei a dee wëti u lanti aluwasi ka u ta libi. Ma wa ta tja useei go nama ku politiki soni u di köndë. U ta du di soni aki, u di u ta hoi useei a di soni di Jesosi bi taki. A bi taki taa dee Keesitu sëmbë ’an dë sëmbë u di goonliba aki möön’. Fëën mbei wa nango nama ku na wan politiki soni u di goonliba aki, nöö wa nango a feti tu (Johanisi 15:19; 17:16). Wë a di u Tu Goonliba Feti, de bi buta dee Jehovah Kotoigi a dunguwosu, de bi ta pena de, nöö de bi du woto hogihati soni ku de u di de an bi kë go nama ku politiki soni u di köndë. Wan hedima u keiki na Alumanköndë bi taki taa: „De abi leti u taki taa de da dee möön hia sëmbë dee an bi tja deseei go nama ku di feti na Alumanköndë, u di háti u de an bi ta da de pasi u du di soni dë.”
„[Jehovah Kotoigi] abi bunu manii. Dee lö sëmbë aki ta booko de hedi ku woto sëmbë. De bi o sa dë heihei sëmbë a politiki. Ma wa o sa feni dee Jehovah Kotoigi u du dee lö wooko aki. . . . De ta saka deseei a lanti basu, ma de ta biibi taa di Könuköndë u Gadu wanwan tö sa puu hii dee fuka di libisëmbë abi.”—Di kolanti u Nová Svoboda, Czech Lepubiliki.
Boiti di dë, wa nango libi u wanwan a wan kamian. Di Jesosi bi begi Gadu da dee bakama fëën, hën a bi taki taa: „Ma ta begi fii puu de a goonliba e” (Johanisi 17:15). Fëën mbei joo si taa u nango a wooko, u nango bai soni a wënkë, söseei u nango a siköö kumafa hii sëmbë nango.