Te wan sëmbë fii dëdë

Bebe bi lobi hën tata seei. Wan mati u de piki ën di soni aki, u di a bi kë kötö hën hati. Ma di soni di a taki dë, hati Bebe seei. Hii juu Bebe bi ta pakisei taa: „Di dëdë u mi tata an tja na wan bunu ko seepiseepi.” Sömëni jaa baka di dë, a bi dë gbelingbelin u si taa Bebe bi ta tjali jeti di a konda di soni di bi pasa a wan buku.

Bebe ko fusutan taa wan sëmbë sa ta tjali wan pisiten te wan sëmbë fëën dëdë. U sa fusutan faandi mbei di Bëibel ta taki taa dëdë da „di lasiti felantima” (1 Kolenti 15:26). Na wan soni sa tapa dëdë. Te wan sëmbë fuu dëdë, nöö a ta buuja hii u libi. A ta pasa möön gaanfa taa te wa dë ku hën mëni, nëën dëdë ta ko kii dee sëmbë fuu. Na wan fuu sa kule da dëdë ku dee hogi di a ta tja ko da sëmbë. Fëën mbei u ta fusutan taa a ta taanga da sëmbë te wan sëmbë u de dëdë.

Kandë i bi hakisi iseei dee soni aki wan daka kaa: ’Un longi a ta tei u wan sëmbë an ta tjali möön te wan sëmbë fëën dëdë? Andi sa heepi wan sëmbë u na ta tjali möön? Unfa mi sa heepi wan sëmbë di ta tjali u di wan sëmbë fëën dëdë? Te wan sëmbë fuu dëdë, a sa toona libi baka u?’