DI WOTO DI NAMA KU DI KAFITI | UNFA SONI DË TUUTUU A GADU KÖNDË ALA?
Dee soni di sëmbë ta taki u Gadu Köndë ala
I pakisei wan daka kaa unfa soni dë a Gadu Köndë ala u? Ee i bi pakisei ën wan daka, nöö na i wanwan ta pakisei ën e. Sömëni milionmilion jaa kaa sëmbë kë ko sabi di soni aki. So sëmbë ta si ën kuma wan kamian ka bööböö libi dë, nöö ëngëli ku dee bunuhati sëmbë dee dëdë, de ta libi ala, nöö de ta kai ën Gadu köndë. Woto sëmbë ta si Gadu Köndë kuma wan kamian ka milionmilion gadu ta libi.
Sömëni sëmbë ta taki taa wa sa sabi soni u Gadu Köndë, biga na wan sëmbë go si unfa soni dë ala, u ko konda da u. Di soni di dee sëmbë aki ta pakisei an dë sö tuutuu. Jesosi Keesitu bi dë a liba ala ufö a bi ko a goonliba aki. A bi piki dee hedima u keiki taa: „Biga fa mi kumutu a liba ala ko aki, dee sëmbë, ma ko u mi du kumafa mi kë e. Ma mi ko u mi du dee soni dee di Sëmbë manda mi ko kë u mi du.” Jesosi bi piki dee apösutu fëën wan soni di hënseei bi sabi. A bi piki de taa: „Biga ka mi Tata ta dë nöö kamian u libi sai dë te a hia.”—Johanisi 6:38; 14:2.
Gadu hën da Jesosi Tata, nöö hën në da Jehovah. Nöö Jehovah ta libi a liba ala (Psalöm 83:18). Fëën mbei na wan sëmbë sa konda da u unfa ala dë, möön Jehovah Gadu ku Jesosi Keesitu. De bi mbei dee dinima u de si wojolimbo sunjan, nöö fëën mbei u sa ko sabi sömëni soni u Gadu Köndë ala.
Di woto di ta ko o taki u dee pisi u Bëibel, di ta lei u andi wantu womi bi si a wanlö wojolimbo sunjan. Te joo ta lesi soni u dee wojolimbo sunjan aki, nöö hoi a pakisei taa Gadu Köndë an dë wan kamian di abi soni di i sa si nasö di i sa panjan. Fëën mbei de an konda soni da u di dee ëngëli wanwan sa fusutan, ma Gadu lei u a dee wojolimbo sunjan unfa Gadu Köndë dë, söseei a kondëën da u a wan fasi di an taanga u fusutan. Dee wojolimbo sunjan o heepi i fii ko fusutan unfa soni dë a Gadu Köndë tuutuu.