Di möön satiwan u dee Hebelejën lëtë ta mbei u dë seiki u dee soni di Gadu paamusi u

U sa biibi tuutuu taa hii dee soni di Gadu paamusi u, o pasa tuutuu wan daka u? Jesosi bi ta biibi di soni aki, nöö dee sëmbë dee bi ta haikëën seei bi ko ta biibi di soni dë tu. Luku di woto di a bi konda a di taki di a bi hoi a di Kuun liba. U ta lesi a Mateosi 5:18 taa: „Wë mi sa taki da unu gbelin taa solanga dee soni u goonliba aki ku dee soni u liba ala dë eti, nöö na wan u dee soni sikifi a di Buku o fika di an o pasa e, te dou ku dee piki pisi fëën tuu. Hii de tuu seei o pasa.”

Di möön satiwan u dee Hebelejën lëtë da י (yod). Hën da di fosuwan u dee fö lëtë u di apaiti në u Gadu, Jehovah.a Dee sabima u Wëti ku dee Faliseima bi ta si hiniwan lëtë kuma wan gaan soni seei, leti kumafa de bi ta si dee wöutu ku dee lëtë dee sikifi a di Wëti u Gadu.

Jesosi bi taki taa a bi o sa dë taa liba ala ku goonliba aki lasi go, ma na wan u dee pikipiki pisi di sikifi a dee wëti, bi o misi. De o pasa tuu. Ma di Bëibel ta piki u taa liba ala ku goonliba aki o dë u nöömö (Psalöm 78:69). Di soni di Jesosi taki aki ta lei taa hii dee pikipiki soni dee sikifi a dee wëti o pasa tuutuu.

Jehovah Gadu ta booko hën hedi ku dee pikipiki soni dee a mbei sëmbë sikifi a di Wöutu fëën u? Aai. Luku di woto aki: A bi piki dee Isaëli sëmbë fu awooten taa de an bi musu booko di bonu u di sikapu di de bi ta njan a di Pasika piizii (Ëkisodesi 12:46). A sa djei wan piki soni. De bi fusutan faandi mbei de an bi musu booko na wan bonu u di mbeti ö? Kandë de an bi fusutëën. Ma Jehovah Gadu bi sabi taa di soni dë bi ta lei taa sëmbë an bi o booko na wan boonu u di Mësiasi te de bi o peekëën a di posu.​—Psalöm 34:20; Johanisi 19:31-33, 36.

Andi u ta lei a dee soni dee Jesosi bi taki? U seei sa abi di futoou taa hii dee soni dee Jehovah Gadu paamusi u o pasa tuutuu, te kisi dee pikipiki soni seei. U ta feni kötöhati seei a di möön satiwan u dee Hebelejën lëtë!